ឧត្តមានជ័យ ៖ ក្រុមហ៊ុនសំរោងរ៉ាប់ប៊ើ ជាក្រុមហ៊ុនអភិវឌ្ឍដំណាំ កសិរឧស្សាហកម្ម ប្រភេទដំណាំកៅស៊ូ បានសុំដីសម្ទានសេដ្ឋកិច្ច ពីរដ្ឋាភិបាលមួយកន្លែង ស្ថិតនៅក្នុងស្រុកវ៉ារិន ខេត្តសៀមរាប និងអន្លង់វែង ខេត្តឧត្តរមានជ័យ ដែលមានផ្ទៃដីសរុបចំនួន ៩៦៥៨ ហិចតា ដែលមានព្រំប្រទល់ជាប់នឹងព្រែសហគមន៍សាមគ្គីសង្គ្រោះព្រៃឈើឃុំអន្លង់វែង ។
សព្វថ្ងៃសកម្មភាពក្រុមហ៊ុនខាងលើ កំពុងតែឈួសបំផ្លិចបំផ្លាញព្រៃឈើ នៅក្នុងតំបន់អភិរក្ស របស់សហគមន៍សាមគ្គីសង្គ្រោះ ព្រៃឈើឃុំអន្លង់វែង ដែលមានគោលបំណងរំលោភយកដីធ្វើជាកម្មសិទ្ធិ របស់ក្រុមហ៊ុន ដើម្បីដាំដំណាំកៅស៊ូ ។ កាលពីថ្មីៗនេះ អភិបាលរងខេត្តឧត្តរមានជ័យ ជាអ្នកទទួលបន្ទុកដោះស្រាយដីធ្លី រវាងក្រុមហ៊ុន និងសហគមន៍ខាងលើ បានចុះទៅជួបជាមួយនិងអគ្គនាយកក្រុមហ៊ុន អមដំណើរជាមួយរដ្ឋបាលព្រៃឈើខេត្តផងដែរ ដើម្បីរកដំណោះស្រាយកំណត់ព្រំប្រទល់រវាងសហគមន៍ និង ក្រុមហ៊ុន ដើម្បីជៀសវាងការបាត់បង់ដី និងព្រៃឈើ ដែលនៅក្នុងតំបន់អភិរក្ស របស់សហគមន៍បន្តទៀត ។
តែកិច្ចចរចាររវាងអាជ្ញាធរខេត្ត មន្ត្រីជំនាញរដ្ឋបាលព្រៃឈើខេត្ត និងអគ្គនាយកក្រុមហ៊ុន ពុំទាន់មានការព្រមព្រៀងគ្នានៅឡើយទេ ដោយសូមឱ្យក្រុមហ៊ុនផ្អាកធ្វើការឈួសឆាយ ។ តែក្រុមហ៊ុនខាងលើ ពុំបានគោរព និងអនុវត្តតាមការស្នើរសុំ របស់អាជ្ញាធរខេត្ត និងមន្ត្រីជំនាញរដ្ឋបាលព្រៃឈើខេត្ត ឧត្តរមានជ័យនោះទេ ដោយនៅតែបន្ត ឱ្យគ្រឿងចក្រឈួសឆាយរំលោភមកលើដីព្រៃ របស់សហគមន៍យ៉ាងគគ្រឹកគ្រេងដដែល ។
ជាក់ស្តែងនៅល្ងាចថ្ងៃសៅរ៍ទី២២ ខែមីនា ឆ្នាំ២០១៤ មានគ្រឿងចក្រប្រភេទអាប៊ុល របស់ក្រុមហ៊ុនខាងលើចំនួន៣គ្រឿង កំពុងតែធ្វើសកម្មភាពឈួសឆាយដីព្រៃ ក្នុងតំបន់អភិរក្ស របស់សហគមន៍មួយកន្លែងត្រង់ចំនុចជុបតាកួនស្ថិតនៅក្នុងភូមិ អូរតាម៉ែង ឃុំអន្លង់វែង ស្រុកអន្លង់វែង ខេត្តឧត្តរមានជ័យ ។
នៅក្នុងសកម្មភាពខាងលើ លោក ឡុង ប៊ុនថេង ជាអនុប្រធានគណៈកម្មការព្រៃសហគមន៍ បានដឹកនាំកំលាំងរបស់សហគមន៍ចំនួន១១នាក់ ទៅត្រួតពិនិត្យគ្រឿងចក្ររបស់ក្រុមហ៊ុនខាងលើ ដែលកំពុងធ្វើសកម្មភាពឈួសឆាយបំផ្លិចបំផ្លាញព្រៃឈើ យ៉ាងគគ្រឹកគគ្រេងផងដែរ ដែលមានទាហ៊ានចាំការពារគ្រឿងចក្រនៅគស៊ើបការនៃកងពលធំលេខ២ ចំនួន២០នាក់ ។
តាមការរៀបរាប់របស់លោក ឡុង ប៊ុនថេង បានឱ្យដឹងថា យោងទៅតាមផែនទី ជីភីអេស របស់សហគមន៍ក្រុមហ៊ុនខាងលើ បានរំលោភយកដីព្រៃរបស់សហគមន៍ជំនួន៦៧៩ហិចតា ដែលក្រុមហ៊ុនខាងលើ ទើបតែឈួសឆាយបានជាង១០ហិចតាបតែប៉ុណ្ណោះ ។ ជុំវិញករណីខាងលើ ក្រុមការងារយើង មិនអាចស្វែងរកការទំនាក់ទំនង ដើម្បីសូមការបំភ្លឺ ពីលោកអគ្គនាយកក្រុមហ៊ុនខាងលើបានទ្បើយ ៕
