ព្រះវិហារ៖ កាលពីព្រឹកថ្ងៃទី២២ ខែមិនា ឆ្នាំ២០១៤ មានកិច្ចប្រជុំពិគ្រោះយោបល់ថ្នាក់ក្រោមជាតិស្តីពីគំរូនៃការចែករំលែកផលប្រយោជន៍រេដ+កម្ពុជា ក្រោមអធិបតីភាពឯកឧត្តម ហ៊ុន អៀង នាយអធិការរដ្ឋបាលព្រៃឈើខាងជើងបឹងទន្លេសាប និងលោក អ៊ិត ភូម្រា នាយខ័ណ្ឌរដ្ឋបាលព្រៃឈើព្រះវិហារ និងអស់លោកប្រធានមន្ទីរពាក់ព័ន្ធជុំវិញខេត្ត អភិបាលស្រុក.ក្រុងចូលរួមផងដែរ ។
ឯកឧត្តម ហ៊ុន អៀង នាយអធិការរដ្ឋបាលព្រៃឈើខាងជើងបឹងទន្លេសាបបានមានប្រសាសន៍ថាៈ រាជរដ្ឋាភិបាលកម្ពុជាទទួលស្គាល់ថា យន្តការនៃការកាត់បន្ថយការបញ្ចេញឧស្ម័នដែលបណ្តាលមកពីការបាត់បង់រេចរឹលព្រៃឈើ(REDD+) អាចជាមធ្យោបាយមួយដ៍មានប្រសិទ្ធិភាពសម្រាប់ជួយការពារព្រៃឈើធម្មជាតិ និងចូលរួមចំណែកកាត់បន្ថយភាពក្រីក្រនៅប្រទេសកម្ពុជា ។
ដោយឃើញពីសារៈសំខាន់នៃយន្តការនេះ និងផ្អែកលើមូលដ្ឋានគោលនយោបាយ ច្បាប់ និងលិខិតបទដ្ឋានគតិយុទ្ធក្រោមច្បាប់ ជាពិសេសកម្មវិធីព្រៃឈើជាតិ រដ្ឋាបាលព្រៃឈើ និងអគ្គនាយកដ្ឋានរដ្ឋបាលការពារអភិរក្សធម្មជាតិ រួមជាមួយនឹងស្ថាប័នពាក់ព័ន្ធដោយមានការគាំទ្រអង្គការមិនមែនរដ្ឋាភិបាលអន្តរជាតិ និងដៃគូរអភិវឌ្ឍន៍បានសហការរៀបចំផែនទីបង្ហាញផ្លូវរេដ+ (REDD Roadmap) នៅឆ្នាំ២០១០ ។ ផែនទីបង្ហាញផ្លូវរេដ+ គឺជាផែនការជាតិ និងជាឯកសារគោលមួយដ៍សំខាន់សំរាប់កម្ពុជា ជាពិសេសស្ថាប័នជាតិដែលមានអាណត្តិការងារ ពាក់ព័ន្ធនឹងរេដ+ ប្រើប្រាស់ជាមូលដ្ឋាន ដើម្បីបង្កើតយុទ្ធសាស្ត្រ និងក្របខ័ណ្ឌការងាររេដ+ ។
តាមរយៈផែនទីបង្ហាញផ្លូវរេដ+កម្ពុជានឹងអាចស្រូបយកមូលនិធិតាមរយៈយន្តការនេះ ហើយមូលនិធិនេះនឹងអាចយកទៅប្រើប្រាស់ឲ្យមានប្រសិទ្ធិភាព ដើម្បីកាត់បន្ថយការបាត់បង់ព្រៃឈើ និងចូលរួមចំនែកជាមួយរាជរដ្ឋាភិបាលកាត់បន្ថយភាពក្រីក្រនៅតាមជនបទ ។
តែនេះគ្រាន់តែជាការរំពឹងទុករបស់យើងទាំងអស់គ្នា ប៉ុន្តែនាពេលបច្ចុប្បន្នយន្តការគ្រប់គ្រងមូលនិធិដែលរំពឹងបានទទួលពីយន្តការរេដ+នៅមានកិច្ចការងារ និងឧបសគ្គជាច្រើនទៀតដែលក្រុមការងាររេដ+កម្ពុជា និងដៃគូររបស់ខ្លួនត្រូវជួយដោះស្រាយ ដូចជា ពុំទាន់មានគោលនយោបាយ និងលិខិតបទដ្ឋានច្បាប់ជាក់លាក់ណាមួយសំរាប់គ្រប់គ្រង នឹងបែងចែក
មូលនិធិដែលទទួលបានពីរេដ+ ការអនុវត្តយន្តការរេដ+ទាំងថ្នាក់ជាតិ និងថ្នាក់ក្រោមជាតិ តំរូវឲ្យមានការពិគ្រោះយោបល់ និងមានការឯកភាពពីគ្រប់ភាគីពាក់ព័ន្ធ មូលនិធិរេដ+ដែលរំពឹងថានឹងទទួលបានគឺជាមូលនិធិអន្តរជាតិ ។ ឯកឧត្តមក៍បានបន្តទៀតថាៈ ការរៀបចំយន្តការនៃការបែងចែកផលប្រយោជន៍រេដ+កម្ពុជា នឹងក្លាយទៅជាកាលានុវត្តភាព និងជាឧត្តមប្រយោជន៍ដ៍ថ្លៃថ្លាសំរាប់ការអភិវឌ្ឍន៍វិស័យព្រៃឈើ ជាពិសេសការអនុវត្តកម្មវិធីរេដ+នៅកម្ពុជានាពេលអនាគត ៕
