ភ្នំភ្លើងដ៏មាន ឥទ្ធិពលមួយ បានផ្ទុះឡើង នៅភាគខាងជើងខេត្ត ស៊ូឡាវ៉េស៊ី នៃភាគកណ្តាល របស់ប្រទេសឥណ្ឌូណេស៊ី នៅថ្ងៃពុធ ទី ១១ខែកុម្ភៈ ឆ្នាំ២០១៥ នេះ ដែល បណ្តាល ឲ្យកម្អែលផេះផង់ជាច្រើន បានខ្ទាត ឡើងកំពស់ ៣,៥គីទ្បូម៉ែត្រទៅលើអាកាស ។ នេះបើយោង តាមការអះអាងពី ទីភ្នាក់ងារគ្រប់គ្រងគ្រោះមហន្តរាយជាតិ។
សារព័ត៌មានជប៉ុនក្យូដូ បានបន្ដឲ្យដឹងទៀតថា ផេះផង់ទាំងអស់នេះ បាន សាយភាយដល់ភាគអាគ្នេយ៍ ប៉ុន្តែគេ នៅមិនទាន់ទទួលដំណឹងច្បាស់លាស់ថាមានមនុស្សស្លាប់ ឫ របួសនៅទ្បើយទេ។ នេះបើយោងតាម អ្នកនាំពាក្យ របស់ទីភ្នាក់ងារគ្រប់គ្រងគ្រោះ មហន្តរាយ ជាតិ លោក ស៊ូតូផូ ផួវ៉ូ នូគ្រូហូ។
ទន្ទឹមនឹងពេលនោះផងដែរ ប្រជាជននៅក្បែរកន្លែង កើតហេតុ ត្រូវបានសមត្ថកិច្ច ហាមឃាត់ឲ្យនៅឆ្ងាយពីទីនោះ ៦,៥គីទ្បូម៉ែត្រ។ ការផ្ទុះភ្នំភ្លើងដែលបានកើត ស្ថិតនៅ ក្នុងស្រុក Minahasa នេះ ក៏ធ្លាប់កើតឡើងម្តងដែរកាលពី ខែមករា ដែលការផ្ទុះលើកនោះក៏បាន បណ្តាលឲ្យកម្អែលផេះ ជះឡើងលើអាកាស បួនគីទ្បូម៉ែត្រ ផងដែរ៕
