ខេត្តព្រះវិហារហេតុការណ៍គ្រោះថ្នាក់ចរាចរក្រទ្បាប់រថយន្ដស៊េរីទំនើប១គ្រឿងជាច្រើនជុំបានកើតទ្បើងបណ្តាលអោយមនុស្សចាស់ក្មេងចំនួន៥នាក់ជិះក្នុងរថយន្ដនោះនសំណាងល្អគ្រាន់តែរងរបួសស្រាលរលាត់ដៃជើងនិងបែកក្បាលចេញឈាមបន្ដិចបន្តួចប៉ុណ្ណោះកាលពីវេលាម៉ោង១រសៀលថ្ងៃទី១២កុម្ភះ២០១៥ស្ថិតចំណុចអូរប៉េសភូមិបុស្បធំឃុំប្រមេរស្រុកត្បែងមានជ័យ។សាក្សីឃើញហេតុការណ៍បានរាយការណ៍អោយដឹងថាចំណុចគ្រោះថ្នាក់ក្រទ្បាប់រថយន្ដនោះបណ្តាលមកពីតៃកុងបើកបរធ្វេសប្រហែសមិនគោរពច្បាប់ចរាចរនិងមិនគោរពស្លាកប្រាប់ទិសគិតតែពីបើកបន្ថែមល្បឿនលឿនស្ថិតនៅលើដងផ្លូវកោងខ្លាំងក្នុងទិសដៅចេញពីខេត្តព្រះវិហារ។ពេលនោះចៃដន្យអាក្រក់បែកកង់ខាងក្រោយទើបបណ្តាលអោយរថយន្ដម៉ាកលុចស៊ីសRX៣០០ពណ៌ស្កពាក់ស្លាកលេខសៀមរាប២A៥៣៤៧ក្រទ្បាប់ចំនួន៣ជុំធ្លាក់ផ្លូវជាតិលេខ៩យ៉ាងទាន់ហន់ហើយរថយន្ដរងការខូចខាតប្រមាណ៨០ភាគរយ។លោកប៉ាងវ៉ាន់ឌីអធិការនគរបាលស្រុកត្បែងមានជ័យបានអោយដឹងថាករណីគ្រោះថ្នាក់ចរាចរខាងលើនេះបណ្តាលអោយមនុស្សជិះក្នុងរថយន្ដទាំង៥នាក់នោះគ្រាន់តែរងរបួសស្រាលប៉ុណ្ណោះគឺហេតុការណ៍អាក្រក់នេះកើតទ្បើងក្នុងចន្លោះម៉ោង១ទៅ១និង៣០នាទីរសៀលថ្ងៃទី១២កុម្ភះ២០១៥។អ្នករងរបួសស្រាលទាំងនោះជាអ្នកដំណើរមកពីខេត្តកំពង់ចាម។
ហេតុការណ៍គ្រោះថ្នាក់ចរាចរគួរអោយរន្ធត់១ករណីទៀតបានកើតទ្បើងនៅវេលាម៉ោង៥ទាបភ្លឺលើដងផ្លូវជាតិលេខ៦២ក្នុងភូមិរំចេកឃុំរមណីយស្រុករវៀងខេត្តព្រះវិហាររវាងរថយន្ដបង្កម៉ាកសាំយ៉ុងពណ៌សពាក់ស្លាកលេខភ្នំពេញ២P៨០១៧ទៅបុកពេញទំហឹងចំពីមុខកាប៊ីនរថយន្ដធុនធំម៉ាកហុងយ៉ាន់ពណ៌លឿងដឹកគ្រឿងចក្រដែលចតស្ងៀមទិសដៅបញ្ច្រាសគ្នា។លោកគឹមសុគុណអធិការរងស្រុករវៀងទទួលបន្ទុកផ្នែកចរាចរណ៍និងសណ្ដាប់ធ្នាប់បានអោយដឹងថាហេតុការណ៍គ្រោះថ្នាក់ចរាចរនេះបណ្តាលអោយតៃកុងម្នាក់ស្លាប់បាត់បង់ជីវិតភ្លាមៗនិងអ្នកជិះអែបតៃកុងម្នាក់ទៀតបានដាច់ខ្យល់ស្លាប់ក្នុងពេលជាមួយគ្នាផងដែរដោយសារកៀបខ្លួនជនរងគ្រោះទាំង២នាក់ជាប់នឹងកាប៊ីនរថយន្ដបង្ក។រថយន្ដបង្កធ្វើដំណើរពីត្បូងទៅជើងបើកចូលទីរួមខេត្តព្រះវិហាររីឯរថយន្តហុងយ៉ាន់ចតស្ងៀមពីជើងទៅត្បូងអែបចិញ្ចើមផ្លូវគឺរថយន្តសាំយ៉ុងខូចខាតខ្ទេច១កំណាត់ខាងមុខ។
លោកអធិការរងបន្តទៀតថាសពជនរងគ្រោះមានទី១ឈ្មោះភាពវាសនាភេទប្រុសអាយុ២២ឆ្នាំរស់នៅភូមិអណ្តូងពោធិ៍សង្កាត់កំពង់ប្រណាកក្រុងព្រះវិហារនិងទី២ឈ្មោះវ៉នកុម្ភះហៅក្រៅឈ្មោះចៀនភេទប្រុសអាយុ២៤ឆ្នាំរស់នៅភូមិតាំងក្រសាំងឃុំកំពង់ថ្មស្រុកសន្ទុកខេត្តកំពង់ធំត្រូវបានក្រុមគ្រួសារមកទទួលសាកសពយកទៅធ្វើបុណ្យនៅស្រុកកំណើតរៀងៗខ្លួន។រីឯវត្ថុតាងរថយន្តទាំង២គ្រឿងត្រូវបានសមត្ថកិច្ចជំនាញនគរបាលចរាចរណ៍ស្រុករវៀងបញ្ជូនយកទៅរក្សាទុកនៅបុស្ដិ៍នគរបាលឃុំរមណីយជាបណ្តោះអាសន្ដដើម្បីកសាងសំណុំរឿងបញ្ជូនទៅកាន់តុលាការខេត្តចាត់ការទៅតាមផ្លូវច្បាប់៕
មង្គល
