ភ្នំពេញ៖រថយន្តទូរីសដឹកសំបកធុងហ្គាស ពណ៌ស ពាក់ស្លាកលេខ ភ្នំពេញ 2D-2284 មួយគ្រឿង ត្រូវបានភ្លើងឆាបឆេះទាំងស្រុង ប៉ុន្តែសំណាងល្អមិនបណ្តាលឲ្យមនុស្សរងរបួសធ្ងន់ធ្ងរនោះទេ ដោយសារករណីទុស្សេភ្លើងនៅក្នុងរថយន្តកាលពីវេលាម៉ោង១៦និង៥០នាទីល្ងាចថ្ងៃទី២៤ ខែមីនា ឆ្នាំ២០១៤ នៅចំណុចតាមបណ្តោយជាតិលេខ៦អា ស្ថិតក្នុងភូមិព្រែកលៀប សង្កាត់ព្រែកលៀប ខណ្ឌឬស្សី កែវ រាធានីភ្នំពេញ ។
ប្រជាពលរដ្ឋប្រាប់ឲ្យដឹងថា មុនពេលកើតហេតុពួកគាត់បានឃើញរថយន្តទូរីសដឹកធុង ហ្គាសខាងលើបើកបរពីត្បូងទៅជើង ដោយមានផ្ទុកមនុស្សចំនួន៥នាក់ លុះមកដល់ចំណុចកើតហេតុខាងលើ ស្រាប់តែទុស្សេខ្សែភ្លើងក្នុងរថយន្តធ្វើឲ្យអណ្តាលឆាបឆេះលើរថយន្តទាំងស្រុង ដោយមិនអាចជួយសង្គ្រោះបានឡើយ។ ប៉ុន្តែសំណាងល្អដែរ ដោយគ្រាន់តែមានរងរបួសអ្នកបើកបរថយន្តតិចតួចប៉ុណ្ណោះ។
ប្រភពព័ត៌មានពីសមត្ថកិច្ចប្រាប់បញ្ជាក់ថា នៅក្នុងករណីទុស្សេខ្សែភ្លើងឆាបឆេះរថយន្ត ដឹកធុងហ្គាសនេះ គឺត្រូវប្រើប្រាស់រថយន្តពន្លត់អគ្គិភ័យអស់ចំនួនពីរគ្រឿងក្នុងនោះរថយន្តពន្លត់អគ្គិភ័យរបស់មជ្ឈមណ្ឌលកោះពេជ្រ ០១គ្រឿង និងរថយន្តសង្គ្រោះ និងបង្កាអគ្គិភ័យរបស់ការិយាល័យពន្លត់អគ្គិភ័យ នៃស្នងការនគរបាលរាជធានីភ្នំពេញចំនួន ០១គ្រឿង ទើបអណ្តាតភ្លើងរលត់ទាំងស្រុងនៅវេលាម៉ោង ១៧និង៣០នាទី ប៉ុន្តែរថយន្តត្រូវភ្លើងឆេះខ្ទេចទាំងស្រុង។
សមត្ថកិច្ចប្រាប់បន្តទៀតថា រថយន្តទូរីសនេះដឹកសំបកធុងហ្គាសចេញពីរាជធានីភ្នំពេញ ឆ្ពោះទៅខេត្តស្វាយរៀង ដោយមានមនុស្សក្នុងរថយន្តចំនួន ៥នាក់ លុះមកដល់ចំណុចកើតហេតុខាងលើ មិនដឹងជាមានមូលហេតុអ្វីនោះទេ ស្រាប់តែទុស្សេខ្សែភ្លើងក្នុងរថយន្តបណ្តាលឲ្យឆាបឆេះរថយន្តទាំងស្រុងតែម្តង បណ្តាលឲ្យអ្នកបើកបររងរបួសតិចតូច ចំណែកអ្នកផ្សេងមិនមានរងរបួសនោះទេ។
ជាមួយនេះដែរសមត្ថកិច្ចនគរបាលជំនាញក៏បានធ្វើការផ្តាំផ្ញើដល់ទៅដល់អ្នកបើកបរទាំងអស់ ត្រូវបង្កើនការប្រុងប្រយ័ត្ន ដោយពិនិត្យរថយន្តមុនពេលបើកបរ ចៀសវាងកើតមានដូចករណីខាងលើ៕ 
