នេះជាការលើកទ្បើង របស់ឯកឧត្តម ឧត្តមសេនីយ៍ ហ៊ុន ម៉ាណែត អគ្គមេបញ្ជាការរង និងជានាយរងសេនាធិការចំរុះ នៃកងយោធពលខេមរភូមិន្ទ ក្នុងគ្រាដែលបានអញ្ជើញជាអធិបតី ក្នុងពិធីបូកសរុបលទ្ធផលការងារឆ្នាំ២០១៤ និងផ្សព្វផ្សាយទិសដៅបន្ត ឆ្នាំ២០១៥ របស់កងពលតូល អន្តរាគមន៍លេខ១៤ ក្នុងខេត្តពោធិ៍សាត់
ឯកឧត្តម ឧត្តមសេនីយ៍ ហ៊ុន ម៉ាណែត អគ្គមេបញ្ជាការរង និងជានាយរងសេនាធិការចំរុះ អគ្គបញ្ជាការដ្ឋានកងយោធពលខេមរភូមិន្ទ បានអញ្ជើញជាអធិបតី ក្នុងពិធីបូកសរុបលទ្ធផលការងារ យោធា សន្តិសុខ ឆ្នាំ២០១៤ និងផ្សព្វផ្សាយទិសដៅបន្ត ឆ្នាំ២០១៥ របស់កងពលតូច អន្តរាគមន៍លេខ១៤ ដែលស្ថិតនៅភ្នំបាយឃ្លះ ស្រុកក្រគរ ខេត្តពោធិ៍សាត់ កាលពីថ្ងៃទី១២ ខែកុម្ភៈ ឆ្នាំ២០១៥ ។ ក្នុងកិច្ចប្រជុំនេះដែរ ក៍មានការអញ្ជើញចូលរួម ពីសំណាក់ ឯកឧត្តម គង់ វិបុល ប្រតិភូរាជរដ្ឋាភិបាល ទទួលបន្ទុកអគ្គនាយកពន្ធដា ឯកឧត្តមបណ្ឌិតម៉ៅ ធនិន អភិបាលនៃគណអភិបាល ខេត្តពោធិ៍សាត់ និង ថ្នាក់ឧត្តមសេនីយ៍ វរសេនីយ៍មួយចំនួនទៀត ។
ឯកឧត្តម ឧត្តមសេនីយ៍ទោ គឹម សេងងន មេបញ្ជាការកងពល បានទ្បើងអានរបាយការណ៍ ស្តីពី សភាពការណ៍ភូមិសាស្ត្រទទួលខុសត្រូវ ទាំងនៅព្រំដែន និងផ្ទៃក្នុង កងពលបានអនុវត្តន៍តាមបទបញ្ជា របស់ឯកឧត្តម នាយឧត្តមសេនីយ៍ មេបញ្ជាការកងទ័ពជើងគោក គណៈបញ្ជាការឯកភាពទិស យោធភូមិភាគទី៥ ត្រៀមកម្លាំងសម្រាប់អន្តរាគមន៍ឲ្យទិសយោធភូមិភាគទី៥ និងបណ្ដាទិសផ្សេងៗ ពេលមានបទបញ្ជារ ។ នៅព្រំដែនទោះបីសភាពការណ៍មានការធូរស្រាលក៍ដោយ ក៍យើងពង្រឹងគ្រប់លេណដ្ឋានទាំងអស់ ចាត់តាំងត្រៀមប្រយុទ្ធ យាមល្បាតការពារព្រំដែន ដែលមានប្រវែង៤៩គម ដោយសហការល្អ ជាមួយអង្គភាពវរសេនាតូច នគរបាល
ការពារព្រំដែនគោក លេខ៨២៥,វរសេ នាតូចលេខ៥០៨ របស់តំបន់ប្រតិបត្តិការសឹករងខេត្ត ពិសេសបានអនុវត្តន៍តាមអនុសាសន៍ដ៍ខ្ពង់ខ្ពស់ របស់សម្ដេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលកម្ពុជា មាន០៤ចំណុច គឺអត់ធ្មត់ ជួបទំនាក់ទំនងឲ្យបានញឹកញាប់ បន្តកិច្ចសហប្រតិបត្តិការ រវាងកងកម្លាំងទាំងពីរកម្ពុជា-ថៃ និងបញ្ជៀសជម្លោះយោធា ធ្វើឲ្យព្រំដែនមានស្ថេរភាព សន្តិសុខ សណ្ដាប់ធ្នាប់ ជូនប្រជាពលរដ្ឋទាំងសងខាង ដើម្បីងាយស្រូលក្នុងការចេញចូល ប្រកបមុខរបរទទួលទានជាធម្មតា ។
បន្ទាប់មក ឯកឧត្តម ឧត្តមសេនីយ៍ ហ៊ុន ម៉ាណែត មានប្រសាសន៍ក្នុងកិច្ចប្រជុំនេះថា សូមឲ្យកងកម្លាំងទាំងអស់ ពង្រឹងកម្លាំងគ្រប់ពេលវេលា ក្ដាប់សភាពការណ៍ឲ្យបាន រក្សាការសម្ងាត់ បន្តសហការជាមួយភាគីថៃឲ្យបានស្អិតរមួត ដោះស្រាយបញ្ហាដោយសន្តិវិធី ទៅតាមយន្តការផ្សេងៗ ដើម្បីរក្សាបូរណភាពទឹកដី និងអភិវឌ្ព្យន៍ព្រំដែនរបស់យើង ។
ឯកឧត្តម ក៏បានសង្កត់ធ្ងន់ថា កងកម្លាំងប្រដាប់អាវុធទាំងអស់ មិនមែនជារបស់គណបក្សនយោបាយ ណាមួយទេ តែកម្លាំងប្រដាប់អាវុធ មានតួនាទីការពារទឹកដី ការពាររដ្ឋធម្មនុញ្ញ និងការពាររាជរដ្ឋាភិបាលស្របច្បាប់ ដែលកើតចេញពីការបោះឆ្នោត ។ ហើយកងកម្លាំងក្រៅពីការងារស្នូង ក្នុងអង្គភាព ក៏ត្រូវចូលរួមឲ្យបានសកម្ម ក្នុងការអនុវត្តគោលនយោបាយ ភូមិឃុំមានសុវត្ថិភាព ក្នុងមូលដ្ឋានឲ្យបានជាប្រចាំ ។
ចុងបញ្ចប់កម្មវិធី ក៏មានធ្វើពិធីបំពាក់ឋានន្តរស័ក្កិ ថ្នាក់វរសេនីយ៍ទោ ចំនួន០៣នាក់ វរសេនីយ៍ត្រី១៣នាក់ បំពាក់គ្រឿងឥស្សរិយយសជាច្រើននាក់ ជូនមេដាយការងារ និងជូនប័ណ្ណសរសើរ លិខិតសរសើរជាច្រើនទៀត ។
ឯកឧត្តម ឧត្តមសេនីយ៍ហ៊ុន ម៉ាណែត បានឧបត្ថម្ភថវិការផ្ទាល់ខ្លួន ចំនួន១០លានរៀល និង១.០០០ដុល្លា ដល់អង្គភាពកងពលតូចអន្តរាគមន៍លេខ១៤ ជូនម៉ូតូចំនួន០៥គ្រឿង ដល់វរសេនាតូចការពារព្រំដែគោក លេខ៥០៨ សម្រាប់បម្រើការងារ ក្នុងនោះ០៣គ្រឿង ជាអំណោយរបស់ឯកឧត្តម បណ្ឌិត ម៉ៅ ធនិន និង០២គ្រឿងទៀត ជាអំណោយរបស់ ឯកឧត្តម គង់ វិបុល ។ យោធិនចំនួន៣២៣នាក់ ក្នុងម្នាក់ៗ ទទួលបាន៤ម៉ឺនរៀល ។
រីឯអំណោយរបស់អគ្គនាយកដ្ឋានពន្ធដា រួមជាមួយលោកឧកញ៉ា សំ អាង និងលោកជំទាវ ឈុន លាង ដែលចងសម្ព័ន្ធភាពជាមួយកងពល រួមមានមីយើង៣០០កែស ត្រីខកំប៉ុង៥០កែស ទឹកស៊ីអ៊ីវ៥០យួរទឹកត្រី៥០យួរ កុំព្យួទ័រលើតុ០២គ្រឿង កុំព្យូទ័រយួរដៃ០២គ្រឿង ព្រីនធ័រ០២គ្រឿង ស៊ីទែនដាក់ទឹក ចំណុះ២ពាន់លីត្រ ចំនួន០៧ កង់ត្រាក់ទ័រ ទាំងមុខទាំងក្រោយ០៤ និងអគារផ្ទះបាយ០២ខ្នង ដែលសរុបជាថវិការ ស្នើនិង ២១.៨៧៧ ដុល្លាសហរដ្ឋអាមេរិក ៕
