កាលពីម៉ោ១២យប់ រំលងអធ្រាត្រ ឈានចូលថ្ងៃទី១២ ខែកុម្ភៈ ឆ្នាំ២០១៥ ម៉ូតូម៉ាកហុងដា សេ១២៥មួយគ្រឿង ត្រូវបានចោលួចយកទៅបាត់ ខណៈពេលដែលម្ចាស់ទុកម៉ូតូចោល ក្នុងបរិវេណវត្តអង្គ ហើយបានទៅចូលរួមក្នុងពិធីបុណ្យ បច្ចុះសីមាដែលជាថ្ងៃទី១ ស្ថិតក្នុងឃុំខុនរ៉ង ស្រុកបរិបូរណ៌ ខេត្តកំពង់ឆ្នាំង ។
ម្ចាស់ម៉ូតូមានឈ្មោះ រ័ត្ន ភាវ បានអោយដឹងថា ម៉ូតូរបស់គាត់ពាក់ស្លាកលេខ កំពង់ឆ្នាំង 1C-8876 បានបាត់នៅពេលដែលគាត់យកទៅដាក់ក្នុងមហារោង រួចបានដើរមើលពិធីក្នុងវត្ត លុះពេលត្រឡប់មកវិញ ក៍ត្រូវបាត់ម៉ូតូតែម្តង ទើបមានភាពឆោឡោឡើង និង នាំគ្នាតាមរកដែរ តែមិនឃើញនោះទេ ។
ប្រជាពលរដ្ឋក្នុងឃុំខុនរ៉ង ស្រុកបរិបូរណ៍ បាននាំគ្នារិះគន់ថា ពិធីបុណ្យបញ្ចុះសីមា ក្នុងវត្តអង្គនេះមានរយៈពេល៤យប់៥ថ្ងៃ ប៉ុន្តែនៅថ្ងៃទី១ ក៍ត្រូវបាត់ម៉ូតូរបស់ប្រជាពលរដ្ឋ ១ភ្លាមៗដែរ ។ នៅក្នុងពិធីបុណ្យនេះផងដែរ គេសង្កេតឃើញមានវង់ល្បែងស៊ីសងជាច្រើន ដូចជា អាប៉ោង បៀរ គ្រាប់ឡុកឡាក់ បានបើកលេងយ៉ាងអាណាធិបតេយ្យ ពេញក្នុងបរិវេណវត្ត ។
ប្រជាពលរដ្ឋបានឲ្យដឹងទៀត វង់ល្បែងជាច្រើននៅក្នុងវត្ត គេពុំឃើញមានសមត្ថកិច្ចណា មកទប់ស្កាត់នោះទេ បែរជាឃើញមានសមត្ថកិច្ច ទៅឈរមើលវង់ល្បែងទាំងនោះទៅវិញ ។ ហើយការដែលសមត្ថកិច្ចមិនទប់ស្កាត់ការល្បែងទាំងអស់នេះ ដោយសារតែម្ចាស់វង់ល្បែងទាំងនោះ បានលុយទៅសមត្ថកិច្ចអស់ហើយ ។
ដោយសារតែដូចនេះហើយ ទើបធ្វើឲ្យមានចោលួចម៉ូតូដល់ក្នុងវត្ត ។ ទាំងនេះបង្ហាញអោយឃើញពីការធ្លាក់ចុះ នៃការអនុវត្ត គោលនយោបាយ ភូមិ ឃុំ មានសុវត្ថិភាព នៅក្នុងមូលដ្ឋាននេះផងដែរ ។
សមត្ថកិច្ចបានបដិសេធ ពាក់ព័ន្ធនិងករណីនេះថា ខ្លួនមិនបានយកលុយ ពីវង់ល្បែង ដែលបានដាក់លេងក្នុងបរិវេណវត្តនេះឡើយ ទាំងនេះ គឺមានគេម៉ៅការយកអស់ហើយ ។
ប្រជាពលរដ្ឋបានសំណូមពរ ដល់អាជ្ញាធរខេត្ត និងសមត្ថកិច្ចពាក់ព័ន្ធ មេត្តាជួយចាត់វិធានការទប់ស្កាត់ល្បែងទាំងនេះ កុំឲ្យមានក្នុងបរិវេណវត្តអង្គនេះបន្តទៀត ៕
