កាសែត The Nation បាន រាយការណ៍ថា នាយករដ្ឋមន្ដ្រីថៃ លោកឧត្ដមសេនីយ៍ប្រាយុទ្ធ ចាន់អូចា បានអញ្ជើញវិស័យឯកជនឲ្យកសាងផ្លូវរថភ្លើងល្បឿនលឿន និងចម្ងាយខ្លីនៅកន្លែងដែលមានការទាក់ទាញនៅជិតទីក្រុងបាងកក ដើម្បីសម្រួលដល់វិស័យទេសចរណ៍។លោក ប្រាយុទ្ធ និយាយថា រដ្ឋាភិបាលនឹងផ្ដល់ការគាំទ្រនៅក្នុងក្របខណ្ឌនៃការទទួលបានដី
ដើម្បី សាងសង់ជាមួយនឹងគ្រឿងលើកទឹកចិត្ដដោយបង់ពន្ធ និងមិនបង់ពន្ធ ប្រហាក់ប្រហែលនឹងគំរូដៃគូសាធារណៈ និងឯកជនជប៉ុន។ អាល្លឺម៉ង់ ត្រូវបានគេជឿថា បានបង្ហាញនូវការចាប់អារម្មណ៍នៅក្នុងការវិនិយោគផ្លូវរថភ្លើង នេះ។
ផ្លូវដែក ដែលត្រូវបានចាត់ទុកថា សម្រាប់គម្រោងរថភ្លើងល្បឿនលឿននេះ គឺភ្ជាប់រវាងទីក្រុងបាងកក-ប៉ាតាយ៉ា និងបាងកក-ហួ ហ៊ីន។ លោកប្រាយុទ្ធ បានបន្ដថា តម្លៃ លក្ខខណ្ឌនានា ផែនការផ្ដល់មូលនិធិ និងការសាងសង់ជាមួយលទ្ធភាពគ្រឿងលើកទឹកចិត្ដ អាចត្រូវបានស្នើដោយវិស័យឯកជន ហើយរដ្ឋាភិបាលមានបំណងដើម្បីពិភាក្សាជាមួយអ្នកណាក៏ដោយអំពីបញ្ហា នេះ។
លោកប្រាយុទ្ធ បានបន្ថែមថា គណៈកម្មការវិនិយោគ (BOI) បានពិភាក្សា គ្នានៅថ្ងៃសុក្រ អំពីលទ្ធភាពនៃការវិនិយោគ នៅក្នុងបញ្ហារថភ្លើងល្បឿនលឿននេះ ដើម្បីគាំទ្រវិស័យទេសចរណ៍។ លោកប្រាយុទ្ធ បានបញ្ជាក់ថា ការវិនិយោគ នឹងមានលក្ខណៈជាដៃគូសាធារណៈ និងឯកជន ដោយសារមានក្រុមហ៊ុនផ្ដល់មូលនិធិល្អជាច្រើនដែលអាចមានលទ្ធភាព គ្រប់គ្រាន់នៅក្នុងការវិនិយោគបែបនេះ ហើយរដ្ឋាភិបាលអាចផ្ដល់ដីសម្រាប់ការរកស៊ីផ្សងព្រេងនេះ។ លោកនាយករដ្ឋមន្ដ្រី បាននិយាយដូច្នេះ បន្ទាប់ពីធ្វើជាអធិបតីនៃកិច្ចប្រជុំលើកដំបូងរបស់ BOI នៅក្នុងឆ្នាំ នេះ។ លោកប្រាយុទ្ធ បានបន្ដទៀតថា គម្រោងប្រហាក់ប្រហែលគ្នានេះនៅប្រទេសជប៉ុន សម្រាប់ផ្លូវរថភ្លើងល្បឿនលឿនប្រវែង៧០០គីឡូម៉ែត្រ មានតម្លៃប្រហែល៤០០ពាន់លានបាត។
លោក ប្រាយុទ្ធ បានបន្ថែមទៀតថា រដ្ឋាភិបាលនឹងផ្ដល់ដីដែលកាន់កាប់រួចហើយដោយផ្លូវដែករដ្ឋប្រទេសថៃ សម្រាប់ការវិនិយោគបែបនេះ។ យ៉ាងណាក៏ដោយ ក៏ការសាងសង់នូវផ្លូវរថភ្លើងល្បឿនលឿននេះ ដែលតម្រូវឲ្យសាងសង់ផ្លូវត្រង់នោះអាចតម្រូវឲ្យរដ្ឋាភិបាលរឹបអូស យកដី និងផ្ដល់នូវសំណង់ប៉ះប៉ូវដល់ប្រជាជនដែលអាចប៉ះពាល់នៅក្នុងដំណើរ ការនេះនោះ។
លោក ចាក្រាម៉ុន ផាស៊ូកាវ៉ានិច រដ្ឋមន្ដ្រីក្រសួងឧស្សាហកម្មបាននិយាយថា ឯកអគ្គរដ្ឋទូតអាល្លឺម៉ង់ ប្រចាំប្រទេសថៃ បានបង្ហើបប្រាប់លោកនៅសប្ដាហ៍នេះថា ក្រុមហ៊ុន Siemens AG បានបង្ហាញ នូវការចាប់អារម្មណ៍នៅក្នុងគម្រោងនេះ ដោយសារពួកគេមានបទពិសោធន៍យ៉ាងខ្លាំងនៅក្នុងការកសាងផ្លូវដែក ល្បឿនលឿននេះ។
ផ្លូវដែកដែលត្រូវបានពិភាក្សានោះគឺផ្លូវពីបាងកកទៅហួហ៊ីន កាត់តាមខេត្ដផេតចាប៊ូរី។ លោកជឿថា ផ្លូវបាងកក-ប៉ាតាយ៉ា នឹងត្រូវធ្វើការសិក្សាថែមទៀត ដោយសារវាត្រូវឆ្លងកាត់ស្រុកស្រ៊ីរ៉ាចា និងកំពង់ផែល្អែមចាបាង នៅមុនដល់ប៉ាតាយ៉ា និងអាចពង្រីកដល់ម៉ាប់តាភូត នៅក្នុងអនាគត៕
