សៀមរាប វិទ្យាស្ថានខុងជឺ នៃ រាជបណ្ឌិត្យសភាកម្ពុជា បានរៀបចំពិធីស្វែងយល់អំពីបុណ្យចូលឆ្នាំថ្មី ប្រពៃណីវប្បធម៌របស់ប្រជាជនចិន នៅគ្រប់បណ្តាសាខាទាំង១៨ នៃវិទ្យាស្ថានប្រចាំនៅរាជធានីភ្នំពេញ និង ខេត្តចំនួន៦ ទូទាំងព្រះរាជាណាចក្រកម្ពុជា ចាប់ពីថ្ងៃទី២៨ ខែមករា ដល់ថ្ងៃទី១៧ ខែកុម្ភៈ ឆ្នាំ២០១៥ នៅក្នុងនេះ សាខាវិទ្យាស្ថានខុងជឺ នៃរាជបណ្ឌិត្យសភាកម្ពុជា ប្រចាំនៅខេត្តសៀមរាប បានរៀបចំពិព័រណ៌ស្វែងយល់ អំពីបុណ្យចូលឆ្នាំថ្មី ប្រពៃណី វប្បធម៌របស់ប្រជាជនចិន នារសៀលថ្ងៃទី១៥ ខែកុម្ភៈនេះ នៅវិទ្យាល័យអង្គរ ក្រោមការអញ្ជើញចូលរួមពីសំនាក់ លោកម៉ៅ វុឌ្ឍី អភិបាលរងខេត្ត ។
លោកបណ្ឌិត ជា មុនីឬទ្ធិ នាយកវិទ្យាស្ថានខុងជឺ នៃរាជបណ្ឌិតសភាកម្ពុជា បានបញ្ជាក់ថា៖ ប្រជាជនចិន មានវប្បធម៌ចំណាស់របស់ខ្លួន មិនតិចជាង ៥ ០០០ ឆ្នាំនោះឡើយ ហើយពិធីបុណ្យចូលឆ្នាំ គឺជាជ្រុងមួយនៃវប្បធម៌របស់ប្រជាជនចិន ដែលបង្កប់នូវសេចក្តីសប្បាយរីករាយ ក្នុងការជួបជុំញាតិមិត្ត បងប្អូន សួរសុខទុក្ខគ្នា កំសាន្តសប្បាយជាមួយគ្នា បន្ទាប់ពីបានបែកគ្នា ប្រកបមុខរបររៀងៗខ្លួន អស់រយៈពេល១ឆ្នាំកន្លងមក ។ ឯកឧត្តម បានបញ្ជាក់ថា បុណ្យចូលឆ្នាំចិន គឺមានប្រវត្តិបែបរឿងនិទាន ។ អក្សរជូនពរ ត្រូវបានគេបិទនៅតាមមាត់ទ្វា មាត់បង្អួច និងខ្លោងទ្វា នៃគេហដ្ឋាន ហើយពាក្យជូនពរក៏ត្រូវបានគេជូនឲ្យគ្នាទៅវិញទៅមកផងដែរ ។
លោកម៉ៅ វុឌ្ឍី បានថ្លែថា៖ ព្រះរាជាណាចក្រកម្ពុជា ក្រោមការដឹកនាំរបស់រាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ត្រី បានរឹតចំណងមិត្តភាពជាមួយបណ្តាប្រទេសជាច្រើនលើសាកលលោក ជាពិសេសគឺសាធារណរដ្ឋប្រជាមានិតចិន ដែលសព្វថ្ងៃចំណងមិត្តភាពនៃប្រទេសទាំង២ កម្ពុជា-ចិនបានក្លាយជាមិត្តភាពយុទ្ធសាស្ត្រគ្រប់ជ្រុងជ្រោយ ។ ឯកឧត្តមបានថ្លែងនូវអំណរសាទរ ចំពោះវិទ្យាស្ថានខុងជឺ ដែលកន្លងមក បានជួយណែនាំមិត្តភក្តិចិនជាច្រើនមកដល់ខេត្តសៀមរាប និងបានរួមសហការជាមួយគ្នា ដើម្បីបណ្តុះបណ្តាលភាសាចិន ដល់សិស្សនិងនិស្សិត និងបានផ្តល់អាហារូបករណ៍ផងដែរ ដើម្បីបាននិស្សិតកម្ពុជា ទៅបន្តការសិក្សានៅប្រទេសចិន ហើយថ្ងៃនេះ យើងក៏បានយល់កាន់ច្បាស់ អំពីជ្រុងមួយនៃវប្បធម៌ចិន នោះគឺពិធីបុណ្យចូលឆ្នាំថ្មី ។
ពិព័រណ៌ ស្វែងយល់អំពីបុណ្យចូលឆ្នាំចិននៅខេត្តសៀមរាប បានបង្ហាញដល់មិត្តភក្តិកម្ពុជា ឲ្យបានយល់ជ្រាបអំពីប្រវត្តិចូលឆ្នាំចិន បង្ហាញអំពីវប្បធម៌នៃការសម្តែង ក្បាច់គុន សិល្បៈរបាំទេវៈ របាំក្ងោកចិន សិល្បៈក្រងចំណង សិល្បៈនៃការកាត់ក្រដាស់ និងប្រពៃណីនៃការវេចខ្ចប់ធ្វើនំគាវ ។ ឯកឧត្តម បណ្ឌិត ជា មុនីឬទ្ធិ បានបកស្រាយឲ្យដឹងផងដែរ អំពីជំនឿប្រពៃណីនៃការវេចខ្ចប់ធ្វើនំគាវ ។ គ្រូបង្រៀនភាសាចិននៃវិទ្យាស្ថានខុងជឺ ប្រចាំនៅខេត្តសៀមរាប បានរៀបចំ
កម្មវិធីវេចខ្ចប់ធ្វើនំគាវ ។ ឯកឧត្តម បានបញ្ជាក់ប្រាប់ថា ពាក្យថា នំគាវ តាមភាសាចិន មានន័យថា ទ្រព្យ គឺ ទ្រព្យសម្បត្តិ ។ អាស្រ័យយ៉ាងដូច្នេះហើយ ទើបប្រជាជនចិនមានជំនឿប្រពៃណី ធ្វើនំគាវ ចែកកូនចៅទទួលទាន ក្រោមអបិយជំនឿថា បានបរិភោគនំគាវចូលពោះ ដូចមានទ្រព្យហូរចូលផ្ទះ ៕ ដោយគឿនវ៉េត
