រាជធានីភ្នំពេញ ៖ រថយន្ត រ៉េវហ្វ័រ មួយគ្រឿងបើកបរដោយបុរសជនជាតិវៀតណាមរួមដំណើរជាមួយបុរសចំនួន៣នាក់ទៀតស្រវឹងស្រា បានធ្វើដំណើរមកដល់ចំណុចផ្លូវកែងក៏មានរថយន្តហ្វត មួយបើកមកប៉ះចំពីជំហៀងខាងឆ្វេងរថយន្តរ៉េវហ្វ័រ ហើយក៏ផ្ទុះហិង្សាមួយកើតឡើង។
ករណីគ្រោះថ្នាក់ចរាចរបន្តិចបន្តួចនេះបានកើតឡើងវេលាម៉ោង៨និង២០នាទីយប់ថ្ងៃទី២៤ខែមីនា ឆ្នាំ២០១៤ ត្រង់ចំណុចមុខវត្តដំដែក ផ្លូវលេខ៤៧កែងផ្លូវលេខ៨៤ ស្ថិតនៅក្នុងសង្កាត់វត្តភ្នំ ខណ្ឌដូនពេញ ។
ប្រភពព័ត៌មានពីប្រជាពលរដ្ឋដែលបានឃើញហេតុការណ៍បានអោយដឹងថា គេបានឃើញរថយន្ត រ៉េវហ្វ័រមួយគ្រឿង ពណ៌ខ្មៅ ពាក់ស្លាកលេខ ភ្នំពេញ 2P-7186 បើកបរដោយបុរសជនជាតិវៀតណាម និងរួមដំណើរដោយបុរសចំនួន៣នាក់ទៀត សុទ្ធតែស្រវឹងជោក បានធ្វើដំណើរតាមបណ្ដោយផ្លូវ៤៧ក្នុងទិសដៅ ពីកើតទៅលិច ពេលនោះក៏មានរថយន្តម៉ាកហ្វត ពណ៌ស ពាក់ស្លាកលេខ អង្គការ O1-7325 បើកក្នុងទិសដៅពីត្បូងទៅជើង តាមបណ្ដោយផ្លូវលេខ៨៤ ស្រាប់តែមកដល់ចំណុចមុខវត្តដំដែក ជាផ្លូវកែងរថយន្តហ្វត ក៏ប៉ះគ្នាចំហៀង ខាងឆ្វេងជាមួយរថយន្តរ៉េវហ្វ័រ។
បន្ទាប់ពីប៉ះគ្នារថយន្តម៉ាក រ៉េវហ្វ័រ ព្យាយាមបើករត់គេច ហើយត្រូវបានរថយន្ត ហ្វត បើកដេញតាមពីក្រោយ រហូតដល់ចំណុចជិតសណ្ឋាគារ សាន់វេ ម្តុំវត្តភ្នំ នៅពេលនោះអ្នកជិះរថយន្ត រ៉េវហ្វ័រ បានចុះ មកក្របួច កអាវ អ្នកជិះរថយន្ត ហ្វត និងបានវាយប៉ូលីស ដោយចាប់ទាញឯកសារប៉ូលីសខ្ទេចខ្ទីអស់ ដោយគេបានអួតខ្លួនថា គេជាមន្ត្រីប៉ូលីសជាន់ខ្ពស់ម្នាក់។
ប្រជាពលរដ្ឋដែលនៅកន្លែងកើតហេតុបាន នាំគ្នានិយាយរិះគន់ទៅលើបុរសដែលមានកាយវិការ ច្រងេងច្រងាងថា ប្រសិនបើថាខ្លួនជាប៉ូលីសជាន់ខ្ពស់ហើយ ម្តេចមិនគោរពច្បាប់ ហើយបែរជាបំពានច្បាប់ទៅវិញ ?
ក្រោយពេលកើតហេតុ សមត្ថកិច្ចនៅតែធ្វើការវាស់វែងនិងយករថយន្តទាំង២គ្រឿងទៅរក្សាទុកនៅ អធិការដ្ឋាននគរបាលខណ្ឌដូនពេញរង់ចាំធ្វើការដោះស្រាយ៕
