កំពង់ឆ្នាំង៖គូរស្រករថ្មោងថ្មី នៃពីធីអាពាហ៏ពីពាហ៏ដែលត្រូវបានបញ្ចប់ដោយពិធី
“ព្រះថោងតោងស្បៃនាងនាគ” គឺ កូនក្រមុំដឹកដៃកូនកម្លោះចូលបន្ទប់ គ្រប់គ្នាសង្ឃឹមថានិងមានសេចក្តី
សុខសុភមង្គលយ៉ាងពិតប្រាកដ ព្រោះតែមង្គលការតាមប្រពៃណីពីបុរាណរបស់ខ្មែរដែលមិនអាចខ្វះបានក្រោមកិច្ច ម្តាយទុកឪពុកដាក់ពិតជាគ្មានអ្វីមកជាឧបសគ្គឡើយ ។
ផ្ទុយទៅវិញគូស្រករមួយគូដែលនឹងលើកយកមកអធិបាយខាងក្រោមនេះ គឺពិតជាធ្វើអោយកូនក្រមុំ និងកូនកម្លោះពោះម៉ាយកូន២សក់ ល្បាយអាចម៏ខ្លា បានខកចិត្តត្បិតរាត្រីទឹកឃ្មុំក្លាយជាទឹកខ្មេះ ទាល់តម្រេះខាងប្រុសប្តឹងទាមទារបណ្តាការ ៣ពាន់៥រយដុល្លា ពីខាងស្រីវិញ ដែលបញ្ហានេះធ្វើអោយភាគីទាំងសងខាងដែលមុននេះមិនប៉ុន្មានផងធ្លាប់តែល្អូកល្អឿនដាក់គ្នា ប្រែក្លាយជាមើលមុខគ្នាមិនត្រង់ ថែមទាំងប្តឹងផ្តល់គ្នាទៅវិញ ។
នៅលើគ្រែឬស្សីក្រោមផ្ទះពីអំពីឈើប្រក់ស័ង្កសីតូចល្មម នាងជាកូនក្រមុំដែលខកចិត្តក្នុងមង្គលការមិនដូចបំណង បានព្យាយាមបង្ហាញរូបថតរៀបការ និងបានប្រាប់ថាៈ នាងមានឈ្មោះ សឹម ម៉ារី អាយុ១៨ឆ្នាំ ជាកូនពៅគេក្នុងចំណោមបងប្អូន៥នាក់ (ប្រុស២ស្រី៣) ម្តាយនាងជាស្ត្រីមេម៉ាយមានឈ្មោះ ម៉ាត់
នូណាត អាយុ៦០ឆ្នាំ បច្ចុប្បន្នគ្រួសារនាងមានទីលំនៅភូមិចារ្យថ្មី ឃុំអណ្ទូងស្នាយ ស្រុករលាប្អៀរ ខេត្តកំពង់ឆ្នាំង។
រូបនាងបានរៀបការនៅថ្ងៃទី១៥ ខែមករា ឆ្នាំ២០១៥ ជាមួយបុរសពោះម៉ាយកូន២ម្នាក់ មានឈ្មោះណុប គឹមសូ អាយុ ៤៣ឆ្នាំ មានទីលំនៅ ភូមិធម្មត្រ័យ សង្កាត់ព្រៃស ខណ្ឌ័ដង្កោ រាជធានីភ្នំពេញ ។ នាងបានស្គាល់គ្នានិងព្រមភ្ជាប់និស្ស័យស្នេហ៏ជាមួយបុរសខាងលើនេះតាមរយៈបងថ្លៃរបស់បងស្រីនាង មុនពេលរៀបមង្គលការតែប៉ុន្មានថ្ងៃប៉ុណ្ណោះ ។
ក្រោយពីបានព្រមព្រាងជាមួយម្តាយនាងហើយកូនកម្លោះ ជាគូដណ្តឹងនាង បានប្រគល់ប្រាក់សម្រាប់រៀបមង្គលការ អោយទៅម្តាយនាងចំនួន៣ពាន់ដុល្លា និងបាន បំពាក់ជញ្ជៀនពេជ១វង់ ម៉ូតូ០១៤មួយគ្រឿង ខ្សែ ក មាស ១ខ្សែ និងផ្លាកដៃមាស១ខ្សែអោយនាង មុន ពេលរៀបការទៀតផង ។
នាង សឹម ម៉ារី ជាកូនក្រមុំបានបន្តថាៈ នៅថ្ងៃរៀបមង្គលការ ក្រោយពីពិធីទទួលភ្ញៀវបានបញ្ចប់ជាបណ្តើរៗ មានភ្ញៀវដែលជាសាច់ញាត្តិបានហៅនាងអោយចូលរួមតុផឹកជាមួយ ស្រាប់តែពេលនោះកូនកម្លោះបានមានចិត្តប្រច័ណ្ឌមកលើនាង ហើយបានផឹកស្រារហូតយប់ជ្រៅ ខណៈដែលនាងអស់កម្លាំងព្រោះហត់នឿយចាត់ចែងក្នុងពីធីមង្គលការ ក៏បានចូលទៅដេកនៅបន្ទប់មុន ។
នៅវេលារំលងអាធ្រាតុ ស្ងាត់ភ្ញៀវបងប្អូនរបស់បុរសជាកូនកម្លោះសុំដេកជាមួយនាង តែនាងប្រាប់ថាៈ “ខ្ញុំអស់កម្លាំងណាស់ចាំថ្ងៃស្អែកទៅ” ស្រាប់តែពេលនោះ បុរសជាប្តីនាងបានច្រឡោតខឹងនិងបានឡូឡា ព្រមជាមួយគ្នានោះបានយករូបថតកូនក្រមុំកម្លោះដែលគេសម្រាប់ដាក់តាំងមុខរោងការ យកបោកចោលរួចរត់ទៅដេកនៅក្រោមផ្ទះ បើទោះនាងខំចុះមកអង្វរប្តីអោយទៅដេកលើផ្ទះ និងបានព្យាយាមពន្យល់ថាៈ
វាមិនល្អមើលទេបង ថ្ងៃផ្សំដំណេកបងមកដេកក្រោមផ្ទះអញ្ចឹង ពេលនេះអោយតែបងឡើងសម្រានលើផ្ទះខ្ញុំព្រមតាមបងទាំងអស់ តែគាត់ជាប្តីមិនស្តាប់គាត់ឡើយ ។
នាង សឹម ម៉ារី បានបន្តថាៈស្អែកឡើងប្តីគាត់មិនបាននិយាយអ្វីទេ គិតតែខឹងនិងចោទនាងនិងម្តាយនាងគ្រប់បែបយ៉ាងហើយបានផឹកស្រានិងដេកក្រោមផ្ទះទៀត ។ លុះព្រឹកឡើងថ្ងៃទី ១៧ ខែមករា ឆ្នាំ២០១៥គាត់បាននិយាយថាៈ “យើងគ្មាននិស្ស័យនិងគ្នាទេ” គាត់ក៏បានធ្វើលិខិតលែងលះមួយសន្លឹក ( នាងជាប្រពន្ឋបានយកក្រដាស់ពាក្យលិខិតលែងលះ១ស្លឹកមកបង្ហាញ) ដោយក្នុងខ្លឹមសារដាក់ថា យើងទាំង២បានព្រមព្រាងលែងលះគ្នា ដោយមិនប្តឹងផ្តល់និងទាមទារសំណងអ្វីនឹងគ្នាឡើយ ហើយក៏បានផ្តឹតមេដៃទាំងអស់គ្នា និងមានសាក្សីទាំងសងខាងដឹងឮផងដែរ ។
ក៏ប៉ុន្តែពេលគាត់ត្រឡប់ទៅផ្ទះនៅរាជធានីភ្នំពេញ
វិញស្រាប់តែ ប្តីគាត់បាននាំក្រុមគ្រួសារគាត់មករករឿងឈ្លោះ ដោយបានសម្លុតថាៈ ត្រូវសងប្រាក់ចំនួន៣៥០០ដុល្លាទៅខាងប្តីវិញបើមិនដូចឆ្នោះទេ និងប្តឹងចាប់ដាក់គុកដាក់
ច្រវ៉ាក់ជាពុំខាន ។ នាងបាននិយាយថាៈ ប្រាក់៣ពាន់ដុល្លាបានចាត់ចែងថ្លៃមង្គលការអស់ហើយ ចំណែកជញ្ជៀនពេជ១វង់ ប្តីគាត់ជាអ្នកបញ្ជាអោយគាត់លក់ដើម្បីសងថ្លៃបណ្តាការដែលខាត បានប្រាក់ចំនួន១៧០០ដុលា្ល ហើយប្រាក់ទាំងនោះបានចាត់ចែងសងគេអោយហើយ ចំណែកខ្សែ ក ខ្សែដៃ និងម៉ូតូនាងបានដោះអោយទៅប្តីវិញអស់ហើយដែរ ។
នាងបានខំអង្វភាគីខាងប្តីថា ខ្ញុំសុខចិត្តសងទៅប្តីចំនួន២ពាន់ដុល្លាចុះ តែក្រុមគ្រួសារខាងប្តីនៅតែមិនព្រម ហើយបានចោទគ្រួសារនាងជាអ្នករៀបចំគំនិតបោកប្រាស់ បើគ្មានប្រាក់ចំនួន៣៥០០ដុល្លាទេខាងប្តីនិងប្តឹងដាក់គុកជាពុំខាន។ នាងបានបញ្ជាក់ថា នាងនិងគ្រួសារនាងគ្មានគំនិតបោកប្រាស់ឡើយបើមានគំនិតបោកប្រាស់មែន ខ្សែ ក ខ្សែដៃ និងម៉ូតូ ០១៤ ១គ្រឿងដែលនៅនឹងនាងនោះនាងយករត់ទៅបាត់ហើយ មិនមែននាងអោយទៅប្តីវិញទេ ។
លោក សុខ យ៉ាន មេឃុំអណ្តូងស្នាយ បានមានប្រសាសន៏ថាៈ គ្រួសារនេះពេលមកសុំច្បាប់ការលោកមិនបានអោយនុញ្ញាត្តិអោយច្បាប់នោះទេ ព្រោះខាងស្រីមិនទាន់គ្រប់អាយុ នៅខ្វះខែនេះបើតាមច្បាប់ចាស់ ឯច្បាប់ថ្មីនៅមិនទាន់អនុមត្តិនៅឡើយ ។
តែទោះបីឃុំមិនអនុញ្ញាត្តិ ក៏គេបានរៀបចំការហើយដែរ តែពេលរៀបការហើយស្រាប់តែមានរឿងសុំលែងលះគ្នាទៅវិញ គឺប្តឹងទៅលោកមេឃុំអណ្តូងស្នាយអោយដោះស្រាយក្នុងរឿងនេះ។
នៅថ្ងៃទី១៦ ខែកុម្ភះ ឆ្នាំ២០១២ នេះខាងកូនស្រីក៏បាននាំម្តាយរបស់នាងមកប្តឹងនៅមន្ទីរកិច្ចការនារីខេត្តកំពង់ឆ្នាំង ដើម្បីអោយជួយរកខុសត្រូវក្នុងរឿងខាងលើនេះផងដែរ។ហើយនៅរសៀលថ្ងៃទី១៧ ខែកុម្ភះនេះ នាង សឹម ម៉ារី ជាកូនស្រីបានទូរស័ព្ទមកប្រាប់អ្នកយកពត៏មានយើងថា ថ្ងៃនេះខាងក្រុមគ្រួសារកូនកម្លោះគេបានមកយកឯកសារពីសាលាឃុំអណ្តូងស្នាយទៅដាក់ពាក្យប្តឹង នៅសាលាដំបូងខេត្តកំពង់ឆ្នាំងហើយ ។
ទោះយ៉ាងណារឿងរ៉ាវខាងលើនេះគឺជាការបកស្រាយរបស់ភាគីនាងជាប្រពន្ឋតែប៉ុណ្ណោះ ចំណែកភាគីបុរជាប្តីមិនអាចសុំការបំភ្លឺបានទេ ព្រោះគ្មានលេខទូរស័ព្ទ តែសង្ឃឹមថាបន្ទាប់ពីមានការចុះផ្សាយនេះទៅភាគីខាងប្រុសនិងពិតជាមានប្រតិកម្មតវ៉ាជាពុំខាន ដែលសារព៏ត៌មានយើងនិងរង់ចាំទទួលការស្រាយបំភ្លឺដោយរីករាយ ៕
