កំពង់ឆ្នាំង៖សមត្ថកិច្ចនគរបាលព្រហ្មទណ្ឌ័កំរិតស្រាលបានកសាងសំណុំរឿងបញ្ជូនជនសង្ស័យម្នាក់ទៅតុលាការនៅព្រឹកថ្ងៃទី ១៦ ខែកុម្ភះ ឆ្នាំ២០១៥នេះ បន្ទាប់ជនសង្ស័យរូបនោះ បានវាយមនុស្ស ២នាក់បណ្តាលអោយរងរបួសធ្ងន់និងស្រាល កាលពីវេលាម៉ោង១១និង៣០នាទីយប់ថ្ងៃទី១៤ខែកុម្ភះ ឆ្នាំ២០១៥ នៅក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ខណៈដែលមានទំនាស់នឹងគ្នាពេលផឹកស៊ី ស្រវឹង ។
លោក ញ៉ោក ប៊ុនធី អធិការរងនគរបាលក្រុងកំពង់ឆ្នាំងបាននិយាយអោយដឹងថាៈ ជនរងគ្រោះមានឈ្មោះ គង់ ប្រុស អាយុ៣១ឆ្នាំ រងរបួសបាក់ដើមដៃឆ្វេង៣កំណាត់ និងម្នាក់ទៀតរងរបួសស្រាលមានឈ្មោះ គង់ សំណាង អាយុ២៨ ឆ្នាំ ទាំង២នាក់មានទីលំនៅភូមិឃុំកើតហេតុខាងលើ ។
ចំណែកជនដៃដល់មានឈ្មោះ ហ៊ែល ចិន្តា ហៅដា អាយុ២៥ឆ្នាំ មានទីលំនៅជាមួយគ្នា និងត្រូវបានចាប់ខ្លួនក្រោយពេលកើតហេតុ។ មុនពេលកើតហេតុ ជនរងគ្រោះនិងមិត្តភក្រ័មួយក្រុមកំពុងអង្គុយផឹកស៊ីរហូតដល់យប់ជ្រៅ ពេលនោះជនដៃដល់ដែលមានតែម្នាក់ឯងបានដើរទៅដល់វង់ផឹកស៊ីក៏បានបង្កររឿងឈ្លោះ ដោយរំឮក រឿងចាស់ដែលធ្លាប់មានទំនាស់គ្នាពីមុនមកជាមួយជនរងគ្រោះ ហើយក៏ឈានដល់ការវ៉ៃ តប់គ្នាខណៈដែលជនដៃដល់មានតែម្នាក់ឯងបានស្រវ៉ាបានដែកបំពង់ទីបមកវាយលើជនរងគ្រោះឈ្មោះ គង់ ប្រុស បណ្តាលអោយបាក់ដើមដៃឆ្វេង៣កំណាត់ និងបានវាយទៅលើឈ្មោះ គង់ សំណាងត្រូវ ខ្នងរងរបួសស្រាល ។
ក្រោយពេលកើតហេតុ ជនដៃដល់ដែលជាមុខសញ្ញាចាស់បានរត់គេចខ្លួន តែត្រូវសមត្ថកិច្ចតាមចាប់ខ្លួនបាន និងកសាងសំណុំរឿងបញ្ជូនទៅតុលាការតាមនិតិវិធី ។ចំណែកជនរងគ្រោះឈ្មោះ គង់ ប្រុស ក្រោយពីដឹកទៅសង្គ្រោះនៅមន្ទីរពេទ្យខេត្តកំពង់ឆ្នាំង ក្រុមគ្រូពេទ្យបានបញ្ជូនបន្តទៅសង្គ្រោះ នៅមន្ទីរ ពេទ្យខេត្តបាត់ដំបងដែលជំនាញខាងតឆ្អឺងបន្តទៀត ៕ 
