ខេត្តប៉ៃលិន ៖ បុរសម្នាក់ត្រូវគេស្គាល់ថា ជាថៅកែទឹកកកនិងជាកូនប្រសាររបស់លោក អៀង សារី បានស្លាប់ភ្លាមៗនៅនឹងកន្លែង ក្នុងករណីគ្រោះថ្នាក់ចរាចរណ៍មួយ ដោយ បើកបររថយន្តក្នុងល្បឿនលឿនត្រង់ចំណុចផ្លូវកោង ក៏ជ្រុលទៅបុកម៉ូតូចំពីក្រោយពេញទំហឹង រេចង្កូត ធ្លាក់ទៅប្រឡាយមានទឹកនៅខាងឆ្វេងដៃ បណ្តាលឱ្យខ្ទាចចេញមកក្រៅ បត់ក.ក្នុងទឹកស្លាប់តែម្តង ។ ចំណែកម្ចាស់ម៉ូតូរងរបួសធ្ងន់ ត្រូវបានសាច់ញាតិបញ្ជូនទៅកាន់មន្ទីរពេទ្យ ។
ហេតុការណ៍នេះ បានកើតឡើងកាលពីវេលាម៉ោង១០និង៤០នាទីព្រឹកថ្ងៃទី១៧ ខែកុម្ភៈ ឆ្នាំ២០ ១៥នេះ ស្ថិតនៅបណ្តោយផ្លូវជាតិលេខ៥៧ ក្នុងភូមិអូររអិល ឃុំស្ទឹងកាច់ ស្រុកសាលាក្រៅ ។ ជនរងគ្រោះ ឈ្មោះ ប៊ុន លឹម ភេទប្រុស អាយុ៥៥ឆ្នាំ ត្រូវជាកូនប្រសាររបស់លោក អៀង សារី ជាថៅកែទឹកកក រស់នៅភូមិអូរតាប្រាង សង្កាត់ប៉ៃលិន ក្រុងប៉ៃលិន រងរបួសបាក់ក.ស្លាប់នៅនឹងកន្លែង ដោយបើកបររថយន្តម៉ាកតូយ៉ូតាពណ៌សំបកឪឡឹកមួយបាំងកន្លះ ពាក់ស្លាកលេខថៃចានបូរី រងការខូចខាតទាំងស្រុង ។
ចំណែកអ្នកបើកបរម៉ូតូ ឈ្មោះ ផល ភេទប្រុស អាយុ៣៥ឆ្នាំ របួសធ្ងន់ធ្ងរ រស់នៅភូមិកើតហេតុខា ងលើ ដោយបើកបរម៉ូតូម៉ាកឌ្រីមស៊េរីឆ្នាំ២០០៧ ពណ៌ខ្មៅ អត់ស្លាកលេខ រងការខូចខាតទាំងស្រុង ។
ប្រភពព័ត៌មានបានឱ្យដឹងថា មុនពេលកើតហេតុ គេឃើញរថយន្តតូយ៉ូតា របស់ថៅកែទឹកកក ខាងលើពាក់ស្លាកលេខថៃ បើកបរក្នុងទិសដៅពីកើតទៅលិច ដោយល្បឿនយ៉ាងលឿន លុះដល់ផ្លូវ កោង ក៏រេចង្កូតទៅបុកម៉ូតូចំពីក្រោយយ៉ាងពេញទំហឹង បណ្តាលឱ្យអូសប្រហែល៦០ម៉ែត្រ បណ្តាលឱ្យ រថយន្តរេចង្កូតធ្លាក់ទៅក្នុងប្រឡាយមានទឹកពីរបីត្រឡប់ ។ ចំណែកអ្នកបើកបររថយន្តបានខ្ទាតចេញពី រថយន្តបោកក្បាលទៅនឹងថ្ម បាក់ក.ស្លាប់នៅក្នុងទឹកតែម្តង ។
បច្ចុប្បន្នរថយន្តត្រូវសមត្ថកិច្ចនគរបាលចរាចរដឹកយកមករក្សាទុកនៅស្នងការនគរបាលខេត្ត ចំណែកសាកសពត្រូវបានគេបញ្ជូនយកទៅធ្វើបុណ្យនៅគេហដ្ឋាន ហើយជនរងគ្រោះត្រូវគេបញ្ជូនទៅ សង្គ្រោះនៅមន្ទីរពេទ្យ ។
