កំពង់ឆ្នាំង៖យុវជនម្នាក់បានបែកក្បាលនិងបាក់កស្លាប់ភ្លាមៗនៅកន្លែងកើតហេតុ និងម្នាក់ទៀតបានរងរបួសជើងធ្ងន់ ដោយសារតែត្រូវរថយន្តស៊ីទែនដឹកប្រេង១គ្រឿង បុកម៉ូតូជនរងគ្រោះនៅវេលាម៉ោង១០និង១០នាទីយប់ថ្ងៃទី១៦ ខែកុម្ភៈ ឆ្នាំ២០១៥ នៅលើផ្លូវជាតិ
លេខ៥ មុខវិទ្យាល័យព្រះបាទសុរាម្រឹត ស្ថិតក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ដែលពួកគេជិះចេញមកពីស៊ីផឹកក្នុងពិធីខួបកំណើតមិត្តភ័ក្រ ហើយត្រូវជនរងគ្រោះមិនបានពាក់មួកសុវត្តិភាពផង ទើបរងគ្រោះដល់ស្លាប់បែបនេះ ។
លោក ឈឹម សារុន នាយរងការិយាល័យនគរបាលចរាចរណ៍ផ្លូវគោកខេត្តបានអោយដឹងថា៖ជងរងគ្រោះទាំង២នាក់មាន ១ឈ្មោះ ដួង សំឡូត អាយុ២៨ឆ្នាំ រស់នៅភូមិគោកបន្ទាយ ឃុំគោកបន្ទាយ ស្រុករលាប្អៀរ ជាអ្នកបើកម៉ូតូបានបែកក្បាលនិងបាក់កស្លាប់នៅកន្លែងកើតហេតុ ២ឈ្មោះ អ៊ុង រដ្ឋា អាយុ១៨ឆ្នាំ រស់នៅភូមិឃុំជាមួយគ្នា ជិះពីក្រោយបានរងរបួសជើងឆ្វេងធ្ងន់ធ្ងរ។
មុនពេលកើតហេតុពួកគេបានជិះម៉ូតូម៉ាកហុងដាឌ្រីមសេរីឆ្នាំ២០០៣ ពណ៌ខ្មៅ ពាក់ស្លាកលេខ កំពង់ឆ្នាំង 2A 3667 ចេញពីស៊ីផឹកក្នុងពិធីខួបកំណើតមិត្តភ័ក្រនៅភូមិឃ្លៃ ឃុំជ្រៃបាក់ ទៅច្រៀងការ៉ាអូខេបន្តទៀតនៅក្នុងក្រុងកំពង់ឆ្នាំង បើកបរក្នុងទិសដៅពីត្បូងទៅជើង លុះទៅដល់កន្លែងកើតហេតុក៏ត្រូវរថយន្តស៊ីទែនដឹកប្រេង១គ្រឿងមិនស្គាល់ភិនភាគបុកចំកណ្តាលទ្រូងថ្នល់ បណ្តាលអោយជនរងគ្រោះស្លាប់និងរបួសធ្ងន់តែម្តង។
ក្រោយពេលកើតហេតុរថយន្តដឹកប្រេងបានបើកទៅមុខគេចខ្លួនបាត់ ចំណែកអ្នករបួធ្ងន់ត្រូវបានគេដឹកទៅសង្គ្រោះព្យាបាល និងវះកាត់របួសនៅមន្ទីរពេទ្យខេត្តកំពង់ឆ្នាំង។ចំណែកសពជនរងគ្រោះ ត្រូវបានរថយន្តសាមុយរបស់មន្ទីរពេទ្យខេត្ត ជួយដឹកបញ្ជូនទៅកាន់លំនៅដ្ឋានជូនក្រុមគ្រួសារធ្វើបុណ្យទានតាមប្រពៃណី។
សមត្ថកិច្ចចុះទៅពិនិត្យកន្លែងកើតហេតុបានអោយដឹងថា៖ករណីគ្រោះថ្នាក់នេះមិន
ត្រូវបានគេដឹងថាបណ្តាលមកពីមូលហេតុអ្វីច្បាស់ឡើយ ប៉ុន្តែតាមការពិនិត្យស្លាកស្នាមគ្រោះថ្នាក់នៅកន្លែងកើតហេតុអោយដឹងថា ជនរងគ្រោះបានជិះម៉ូតូចូលចំណែកផ្លូវរថយន្តដឹកប្រេង ដែលសមត្ថកិច្ចសង្ស័យថាជនរងគ្រោះជិះម៉ូតូជែងរថយន្តណាមួយ ហើយក៏ត្រូវរថយន្តដឹកប្រេងមកពីមុខបុកឬគៀរដួលតែម្តង និងដោយសារពួកគេអត់បានពាក់មួកសុវត្តិភាពផងនោះ យុវជនម្នាក់ក៏បានដួលបោកក្បាលនិងថ្នល់បែកនិងបាក់កស្លាប់ ហើយម្នាក់ទៀតរងរបួសធ្ងន់៕
