ភ្នំពេញ៖ ជនសង្ស័យ ២នាក់ ត្រូវកម្លាំងសមត្ថកិច្ចមូលដ្ឋាននគរបាលប៉ុស្តិ៍ផ្សារដើមថ្កូវចេញប្រតិបត្តិការណ៍ចុះ ឃាត់ខ្លួនបាននៅបន្ទប់លេខ ៣០៣ ក្នុងផ្ទះសំណាក់យីហោ ហាក់ ឆាយ ផ្លូវលេខ២៧១ ក្រុមទី ១ ភូមិ១ សង្កាត់ផ្សារដើមថ្កូវ ខណ្ឌចំការមន ខណៈជនសង្ស័យទាំង ២នាក់កំពុងលួចជួញដូរ នឹងប្រើប្រាស់ថ្នាំញៀន ។
ហេតុការណ៍នេះបានកើតឡើងកាលពីវេលាម៉ោង ២៣ នឹង ៣០ នាទីយប់ថ្ងៃទី ២៥ ខែមីនា ឆ្នាំ ២០១៤ ។ ជនសង្ស័យទាំង ២នាក់ដែលត្រូវសមត្ថកិច្ចឃាត់ខ្លួនខាងលើនេះទី ១ ឈ្មោះ តឹប អៀប ភេទប្រុស អាយុ៣០ឆ្នាំ ស្នាក់នៅផ្ទះលេខ ១១៩ផ្លូវលេខ ៣៦៩ សង្កាត់ច្បារអំពៅទី២ ខណ្ឌមានជ័យ នឹងទី២ ឈ្មោះ ឆាយ ឃាង ( ឆាយ វិសិទ្ធ ) ភេទប្រុស អាយុ ២៨ ឆ្នាំ ស្នាក់នៅនឹងមុខរបរមិនពិតប្រាកដ ហើយអ្នកទើបតែចេញពីគុក បានប៉ុន្មានខែប៉ុណ្តោះ ។
សមត្ថកិច្ចមូលដ្ឋានបានឲ្យដឹងថា មុនពេលឈានដល់ការឃាត់ខ្លួនជនសង្ស័យខាងលើ គឺ ដោយសារថៅកែផ្ទះសំណាក់ទាំងអស់ដែលនៅក្នុងភូមិសាស្ត្រសង្កាត់ផ្សារដើមថ្កូវ បានសហការជាមួយ សមត្ថកិច្ចយើងយ៉ាងល្អបំផុត ឲ្យតែមានអំពើណាមួយផ្ទុយពីច្បាប់កំណត់នោះគឺថៅកែផ្ទះសំណាក់តែងតែ រាយការណ៍ប្រាប់សមត្ថកិច្ចជានិច្ច ដូចជាករណីនេះពេលជនសង្ស័យចូលទៅពួកសម្ងំប្រើប្រាស់ នឹងជួញដូរ ក្នុងបន្ទប់នៃផ្ទះសំណាក់ ហាក់ ឆាយ នោះ ភាគីផ្ទះសំណាក់បានទូរស័ព្ទរាយការណ៍ដល់នគរបាលមូលដ្ឋានភ្លាមៗ។
បន្ទាប់ពីទទួលបានការរាយការណ៍របស់ថៅកែផ្ទះសំណាក់នោះ លោកនាយប៉ុស្តិ៍ផ្សារដើមថ្កូវបានដឹកនាំ កម្លាំងរបស់ខ្លួនចុះទៅឡោព័ទ្ធផ្ទះសំណាក់ខាងលើ នឹងចាប់ឃាត់ខ្លួនបានជនសង្ស័យទាំង២នាក់ នៅក្នុងបន្ទប់លេខ ៣០៣ នឹងរកឃើញវត្ថុតាំងមួយចំនួន ដូចជា ថ្នាំញៀនក្រាបសថ្លា មួយចំនួនធំ ឧបករណ៍ប្រើប្រាស់ថ្នាំញៀនផងដែរ ។
ដោយយោងតាមវត្ថុតាំងជាក់ស្តែងបែបនេះសមត្ថកិច្ចសម្រេចឃាត់ ខ្លួនជនសង្ស័យយកមកកាន់ទីស្នាក់ការនគរបាលប៉ុស្តិ៍ផ្សារដើមថ្កូវដើម្បីបន្តការសាកសួរ ។ ក្រោយធ្វើសាកសួរហើយជនសង្ស័យទាំង ២នាក់ ត្រូវកសាងសំណុំរឿងបញ្ជូនទៅឃុំខ្លួនបណ្តោះអាសន្ន នៅអធិការដ្ឋាននគរបាលខណ្ឌចំការមនរង់ចាំបញ្ជូនបន្តទៅតុលាការផ្តន្ទាទោសតាមផ្លូវច្បាប់ ៕ 
