ភ្នំពេញៈ សាលាដំបូងរាជធានីភ្នំពេញ កាលពីរសៀលថ្ងៃទី២៤ ខែមីនា ឆ្នាំ២០១៤ បានប្រកាសសាលក្រមផ្តន្ទាទោស បុរសចំណាស់ម្នាក់ជាអតីតគ្រូបង្រៀនភាសាអង់គ្លេស ឲ្យជាប់ ពន្ឋនាគាររយៈពេល២ឆ្នាំ និង ពិន័យជាប្រាក់៤លានរៀល ពីបទ អំពើអាសប្រឆាំងនឹងអនីតិជន អាយុក្រោម១៥ឆ្នាំ តាមមាត្រា៤៣ នៃច្បាប់ស្តីពីការបង្ក្រាបអំពើជួញដូរមនុស្ស និង អំពើធ្វើអាជីវកម្ម ផ្លូវភេទ។
លោកចៅក្រម គឹម រ័ត្នណារិន បានប្រកាសផ្តន្ទាទោស ឈ្មោះ Richard Michael William Fruin អាយុ៣៦ឆ្នាំ ជនជាតិអង់គ្លេស ជាអតីតគ្រូបង្រៀនជនជាតិអង់គ្លេសនៅសាលា Universal English School ។ ក្នុងសាលក្រមដដែល ចៅក្រមក៏បានបង្គាបឲ្យជនជាប់ចោទ សងប្រាក់ជម្ងឺចិត្ត ដល់ជនរងគ្រោះក្នុងម្នាក់ៗ៣លានរៀល ផងដែរ ។
ជនជាប់ចោទ ត្រូវបានសមត្ថកិច្ចនគរបាលនាយកដ្ឋានប្រឆាំងការជួញដូរមនុស្សនិងការពារអនីតិជនក្រសួងមហាផ្ទៃ សហការជាមួយអាជ្ញាធរមូលដ្ឋាន ដឹកនាំដោយតំណាងអយ្យការឃាត់ខ្លួនកាលពីយប់ថ្ងៃទី២៧ ខែតុលា ឆ្នាំ២០១៣ ខណៈពេលដែលបុរសអង់គ្លេសរូបនេះ បាននាំក្មេងប្រុសអាយុ៨ឆ្នាំចូលបន្ទប់លេខ២០៦ក្នុងផ្ទះសំណាក់យីហោ «បឹងមាស»
ដែលមានទីតាំងស្ថិតនៅផ្ទះលេខ២៤៣ផ្លូវលេខ៨៦សង្កាត់ស្រះចកខណ្ឌដូនពេញ ដើម្បីប្រព្រឹត្ត អំពើអាស។ក្នុងនោះក៏មានជនរងគ្រោះអាយុក្រោម១៥ឆ្នាំចំនួន២នាក់ទៀត ដែលត្រូវជនជាប់ចោទ ជនជាតិអង់គ្លេសលួងលោមនាំទៅប្រព្រឹត្តអំពើអាសនេះផងដែរ៕ 
