សៀមរាប នៅឆ្នាំ ២០១៥ នេះ សហគ្រាសសង្គមហ្វារ នឹងសហការ ជាមួយ ធនាគារ ANZ Royal ក្នុងការអភិវឌ្ឍន៏បន្ថែមទៀតទៅលើផលប៉ះពាល់និងការរីកលូតលាស់នៃសិល្បៈខ្មែរនៅក្នុងសហគមន៍។ធនាគារ ANZ Royal បានបង្ហាញការគាំទ្រយ៉ាងផុសផុលក្នុងការរួមចំណែកលើកស្ទួយសិល្បៈក្នុងប្រទេសកម្ពុជាតាមរយៈភាពជាដៃគូដ៏រឹងមាំជាមួយនិង សហគ្រាសសង្គមហ្វារ ដែលរួមមានការផ្តល់មូលនិធិក្នុងការរៀបចំព្រឹត្តិការណ៍សហគមន៍និងសិក្ខាសាលានានា រយៈពេលពេញមួយឆ្នាំ។
បន្ទាប់ពីបានតស៊ូយ៉ាងសស្រាក់សស្រាំអស់រយៈពេលជាង ២០ ឆ្នាំ ក្នុងការពាំនាំមកវិញនូវសិល្បៈល្ខោនសៀកសម្តែងលើឆាក សហគ្រាសសង្គមហ្វារ បានបន្តត្រួសត្រាយផ្លូវ ក្នុងការបង្ហាញ និងលើកស្ទួយសិល្បៈ វប្បធម៌ខ្មែរ ទាំងនៅក្នុងប្រទេសនិងក្រៅប្រទេស ដែលសិល្បករ-សិល្បការនី ភាគច្រើនធ្លាប់មានប្រវត្តិជីវភាពជូរចត់ តែដោយសារតែពួកគាត់ទទួលបានការបណ្តុះបណ្តាលយ៉ាងយកចិត្តទុកដាក់ពីសមាគមនេះ ទើបពួកគាត់អាចមានលទ្ធភាពស្វែងរកគោលដៅជីវិតមួយច្បាស់លាស់។
សហគ្រាសសង្គមហ្វារ មានទស្សនវិស័យមើលឃើញនូវគំនិតច្នៃប្រឌិតរបស់សិល្បៈដែលគ្រប់គ្នាប្រដូចទៅនិងទ្រព្យសម្បត្តិដ៏មានតម្លៃដែលជាយុទ្ធសាស្ត្រដ៏សំខាន់សម្រាប់ការអភិវឌ្ឍរបស់សង្គម និង សេដ្ឋកិច្ចឲ្យមានការរីកចំរើននិងរស់រវើក។ វាបង្កើតការងារដែលមានគុណភាពខ្ពស់ រក្សាទុកនូវផលប្រយោជន៍ដែលបានពីវិស័យទេសចរណ៍សម្រាប់ប្រជាជនក្នុងតំបន់ ពង្រឹងអត្ដសញ្ញាណវប្បធម៌ខ្មែរ និងធ្វើអោយប្រសើរឡើងនូវការទទួលបានការអប់រំសម្រាប់មនុស្សវ័យក្មេងដែលមានជីវភាពតោកយ៉ាក។
ជាមួយនឹងការសម្តែងនៅតាមសហគមន៍ដោយឥតគិតថ្លៃ រួមទាំងសិក្ខាសាលានានាសម្រាប់កុមារតូចៗដែលមកពីអង្គការក្រៅរដ្ឋាភិបាលផ្សេងៗ និងការឧបត្ថម្ភក្នុងមហោស្រពសៀកអន្តរជាតិដែលមានឈ្មោះថា «ទីនេះទីនោះ» ភាគីទាំងពីរមានគោលបំណងផ្សព្វផ្សាយរាល់ការសម្តែងទាំងឡាយទៅដល់ ទស្សនិកជន នៅទូទាំងប្រទេសកម្ពុជាក្នុងការរួមដំណើរនិងទទួលជ្រួតជ្រាបអំពីសិល្បៈនិងវប្បធម៌ ខ្មែរ។
លោក ហួត តារា នាយកប្រតិបត្តិនៃសហគ្រាសសង្គមហ្វារ បានមានប្រសាសន៏ថា៖«សារក្នុងសិល្បៈ គឺមានលក្ខណៈជាសកលដែលងាយយល់និងមានប្រសិទ្ធភាពក្នុងការបញ្ជូនទៅកាន់អ្នកទស្សនា។ទស្សនិកជនអាចយំ សើច ហើយបន្ទាប់មកពួកគេនឹងចងចាំគន្លឹះក្នុងការទទួលយកសារពីសិល្បករ។ នោះគឺជាឧបករណ៍ដ៏សំខាន់ណាស់សម្រាប់ការផ្លាស់ប្តូរសង្គមនិងការអប់រំ។ ភាពជាដៃគូជាមួយនេះ ធនាគារ ANZ Royal អនុញ្ញាតឱ្យ សិល្បករនៃសមាគមហ្វារ បង្កើនលទ្ធភាពក្នុងការជម្រុញនិងនាំមកនូវភាពផ្លាស់ប្តូរជាវិជ្ជមាន និងគំនិតច្នៃប្រឌិតទៅក្នុងបណ្តាញយុវវ័យកម្ពុជា»។
លោក តារា បន្តទៀតថា ភាពជាដៃគូយុទ្ធសាស្ត្ររបស់ធនាគារ ANZ រ៉ូយ៉ាល់ ជាមួយនឹងការប្តេជ្ញាចិត្តរបស់សហគ្រាសសង្គមហ្វារ នឹងឆ្លុះបញ្ចាំងអំពីទំនួលខុសត្រូវក្នុងសង្គមរបស់ក្រុមហ៊ុនក្នុងប្រទេសកម្ពុជា។
លោក Grant Knuckey នាយកប្រតិបត្តិនៃធនាគារ ANZ Royal បានឱ្យដឹងថា៖ «យើងមានការប្តេជ្ញាចិត្តយ៉ាងខ្លាំងចំពោះសហគមន៍ដែលយើងកំពុងរស់នៅនិង ប្រកបការងារ។ទំនួលខុសត្រូវស្នូលរបស់ក្រុមហ៊ុនរបស់យើងគឺ ជួយបង្កើតនិរន្តន៏ភាពតាមរយៈការអប់រំ»។
លោក បន្តទៀតថា៖«តាមរយៈការផ្តួចផ្តើមនេះ យើងនឹងអភិវឌ្ឍចំណេះដឹងនិងការបង្កើតឱកាស សម្រាប់យុវជនដែលក្រីក្រនិងគ្មានចំណេះដឹងដូចគេឯង។ ហ្វារ គឺជាដៃគូដ៏អស្ចារ្យមួយ ព្រោះ ហ្វារ បានផ្ដល់ការគាំទ្រដល់ការអប់រំ និង ផ្តល់នូវការបំផុសគំនិតជាពិសេសសម្រាប់យុវជនកម្ពុជា។ តម្លៃនេះ នឹងធ្វើឲ្យកិច្ចសហការរវាង ធនាគារANZ Royal និង សហគ្រាសសង្គមហ្វារ កាន់តែគួរឲ្យចាប់អារម្មណ៏»។
