ខេត្តស្ទឹងត្រែង៖កម្លាំងអាវុធហត្ថបានបើកប្រតិបត្តិបន្តចុះឃាត់ខ្លួនជនសង្ស័យចំនួន៣នាក់ ខណៈពេលកំពុងប្រើ ប្រាស់និងចែកចាយគ្រឿងញៀនខុសច្បាប់ នៅចំនុចគីឡូ៨ភូមិថ្មី សង្កាត់សាមគ្គី ក្រុងស្ទឹងត្រែង កាលពី វេលាម៉ោង១៦និង៣០នាទីល្ងាចថ្ងៃទី១៩ ខែកុម្ភះ ឆ្នាំ២០១៥បញ្ជូនមកកាន់ទីបញ្ជាការដ្ឋានអាវុធហត្ថខេត្ត ដើម្បីសួរនាំ ។
មន្ត្រីអាវុធហត្ថបានប្រាប់ឲ្យដឹងថា៖ជនសង្ស័យទាំង៣ដែលប្រើប្រាស់និងចែកចាយ គ្រឿងញៀន ហើយត្រូវបានកម្លាំងអាវុធហត្ថឃាត់ខ្លួននោះទី១/មានឈ្មោះមាស ចូច ភេទប្រុស អាយុ២៧ ឆ្នាំ ជនជាតិខ្មែរ មុខរបរជាងសំណង់ មានទីលំនៅក្នុងភូមិថ្មី សង្កាត់សាមគ្គី
ក្រុងស្ទឹងត្រែង ទី២/ឈ្មោះកន ពើរ ភេទប្រុស អាយុ៣៦ឆ្នាំ ជនជាតិខ្មែរ មុខរបរកសិករ រស់នៅភូមិហាងខូបាន សង្កាត់សាមគ្គី ក្រុងស្ទឹងត្រែងនិងទី៣/ឈ្មោះបាន រ៉ាម៉ី ភេទប្រុស អាយុ២៤ឆ្នាំ ជនជាតិខ្មែរ មុខរបរកសិករ រស់នៅភូមិហាងខូបាន សង្កាត់សាមគ្គី ក្រុងស្ទឹងត្រែង ។
មន្ត្រីអាវុធហត្ថបានបន្តអោយដឹងទៀតថាក្នុងករណីឃាត់ខ្លួនជនសង្ស័យ៣នាក់នេះ សមត្ថកិច្ច
ជំនាញប្រើបច្ចេកទេស ដាក់ភ្នាក់ងារសម្ងាត់ចូល ក្រោយពីមានសេចក្តីរាយការណ៍ អាវុធហត្ថបានស្លៀកពាក់ស៊ីវិលចុះបង្ក្រាបនៅពេលឡោមព័ទ្ធ ជនសង្ស័យទាំងបីនាក់បានរត់បុកសមត្ថកិច្ច និងបានតដៃវ៉ៃសមត្ថកិច្ច បណ្តាលខ្លះប៉ោងមុខ បែកបបេមាត់ទៀតផង។
សមត្ថកិច្ចបន្តថាក្រោយពីធ្វើការបង្ក្រាប និងឃាត់ខ្លួនជនសង្ស័យទាំង៣នាក់ខាងលើនេះ រួចមក កម្លាំងអាវុធហត្ថដកហូតបានវត្ថុតាងគ្រឿងញៀន ប្រភេទមេតំហ្វេតាមីន(ICE) ចំនួន២កញ្ចប់តូច និងសម្ភារៈប្រើប្រាស់ក្នុងការជក់ ក្នុងនោះដែរអាវុធហត្ថដកហូត បានម៉ូតូចំនួន៥គ្រឿងទូរស័ព្ទដៃ២គ្រឿង ចិញ្ជៀន១វង់ និងលុយចំនួន២០ម៉ឺនរៀលផងដែរ ។
បច្ចុប្បន្នជនសង្ស័យទាំង៣នាក់ប្រើប្រាស់ និងចែកចាយគ្រឿងញៀន រួមនិងវត្ថុតាងថ្នាំញៀន២កញ្ចាប់តូចលុយ២០ម៉ឺនរៀល ម៉ូតូ៥គ្រឿង សម្ភារៈជក់មួយចំនួនត្រូវបានជំនាញរៀបចំសំណុំរឿងដើម្បីបញ្ជូនខ្លួនទៅកាន់តុលាការ ដើម្បីចាត់ការទៅតាមនិតិវិធីច្បាប់ ៕
