ភ្នំពេញ៖ ជនសង្ស័យ២នាក់ត្រូវបានប្រជាពលរដ្ឋនាំគ្នាព្រួតវាយម្នាក់មួយដៃមួយជើងឡើងទ្រោមខ្លួន រួចទើបប្រគល់ទៅឱ្យសមត្ថកិច្ច បន្ទាប់ពីពួកគេបានធ្វើសកម្មភាពជិះម៉ូតូឆក់កាបូបដៃពីក្នុងកន្ត្រក់កង់នារីម្នាក់ ដែលទើបតែចេញពីកន្លែងធ្វើការបំណងត្រឡប់ទៅផ្ទះវិញ តែត្រូវបានអ្នកដំណើរដែលប្រទះឃើញបានដេញធាក់បណ្តាលឱ្យ ដួល ។ ហេតុការណ៍នេះបានកើតឡើងកាលពីវេលាម៉ោង៨នឹង១៥នាទីយប់ថ្ងៃទី២១ ខែកុម្ភះ ឆ្នាំ២០១៥ ជិតនឹងអង្គការលីកាដូ តាមបណ្តោយផ្លូវព្រះមុន្នីវង្ស កែងនឹងផ្លូវលេខ៤៣៦ ស្ថិតក្នុងសង្កាត់បឹងត្របែក ខណ្ឌចំការមន ។
ជនសង្ស័យទាំង២នាក់ខាងលើទី១មានឈ្មោះ ហុក ចិន្តា អាយុ១៦ឆ្នាំ មុខរបរមិនពិតប្រាកដ ស្នាក់នៅ ផ្ទះជួល សង្កាត់ផ្សារអូរឬស្សីទី៤ ខណ្ឌ៧មករា ជាអ្នកឌុប ។ ទី២ឈ្មោះ ហម សុភក្ត្រ អាយុ១៧ឆ្នាំ មុខរបរជាសិស្ស ស្នាក់នៅផ្ទះ លេខ៦៤ ផ្លូវលេខ១៨២ សង្កាត់ផ្សារអូរឬស្សីទី៤ ខណ្ឌ៧មករា ជាអ្នកធ្វើសកម្មភាពឆក់កាបូប ។
ចំណែកនារីរងគ្រោះមានឈ្មោះ ជន រដ្ឋា អាយុ១៩ឆ្នាំ ធ្វើការនៅក្នុងអាគារផាកវ៉េ មានទីលំនៅក្នុងសង្កាត់ផ្សារដើមថ្កូវ ខណ្ឌចំការមន ហើយរបស់របរដែលបាត់បង់ក្នុងកាបូបនោះ មានទូរស័ព្ទដៃម៉ាកអិនចូចពិល មួយគ្រឿង និងលុយចំនួន៤០ដុល្លារ ។
តាមសម្តីរៀបរាប់ពីនារីរងគ្រោះបានឱ្យដឹងថា នៅមុនពេលកើតហេតុរូបនាងបានជិះកង់ចេញពីកន្លែង នៅក្នុងអាគារផាកវ៉េ បំណងត្រឡប់ទៅផ្ទះវិញ ដោយមានដាក់កាបូបដៃនៅក្នុង
កន្ត្រក់កង់ ខណះជិះដល់ចំណុច កើតហេតុខាងលើស្រាប់តែលេចមុខជនសង្ស័យ២នាក់ ជិះម៉ូតូស្ទេបពណ៍ខ្មៅលាយក្រហមមួយគ្រឿង ពាក់ស្លាក លេខភ្នំពេញ1AF-4872 ជិះមកពីក្រោយរួចបានធ្វើសកម្មភាពឆក់កាបូបដៃពីក្នុងកន្ត្រក់កង់របស់ជនរងគ្រោះបាន សម្រេចហើយព្យាយាមជិះគេចខ្លួន ប៉ុន្តែត្រូវបានអ្នកដំណើរដែលបានឃើញហេតុការណ៍នេះបានជិះ
ដេញតាម និងបានធាក់ម៉ូតូជនសង្ស័យឱ្យដួល ។ ភ្លាមៗនោះក៏ត្រូវបានប្រជាពលរដ្ឋនៅជិតនោះ បាននាំគ្នាព្រួតវាយម្នាក់មួយដៃមួយជើងឡើងទ្រោមខ្លួនទាំង២នាក់រួចទើបប្រគល់ទៅឱ្យសមត្ថកិច្ច ចំណែកកាបូបដៃនារីរងគ្រោះ ដែលជនសង្ស័យឆក់បាននោះ ត្រូវពួកគេគ្រវែងចោលបាត់តែម្តង ។
សមត្ថកិច្ចបានឱ្យដឹងថា ជនសង្ស័យទាំង២នាក់ខាងត្រូវបាននាំខ្លួនយកទៅសាកសួរនៅបុស្តិ៍នគរបាល រដ្ឋបាលបឹងត្របែកដើម្បីធ្វើការសួរនាំ និងកសាងសំណុំរឿងបញ្ចូនទៅអធិការដ្ឋាននគរបាលខណ្ឌចំការមន រង់ចាំដោះស្រាយតាមនីតិវិធី ៕
