បុរសម្នាក់អាងខ្លួនជាកម្លាំងសមត្ថកិច្ច បានចុះពីលើរថយន្តមកទះកំផ្លៀងយុវជនម្នាក់៣ដៃ ដោយសារតែយុវជនម្នាក់ ដែលគេស្គាល់ថា ជាបុគ្គលិកក្រុមហ៊ុនភីហ្សា បានជិះម៉ូតូទៅគៀររថយន្តរបស់ខ្លួនតែបន្តិចបន្ទួចប៉ុណ្ណោះ បង្កការភ្ញាក់ផ្អើលដល់អ្នកដំណើរតាមដងផ្លូវចោមរោមមើលជាច្រើននាក់ ។ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង៧នឹង២៥នាទីយប់ថ្ងៃទី២២ ខែកុម្ភះ ឆ្នាំ២០១៥ ខាងត្បូងស្ថានីយ៍ប្រេងឥន្ឋសូគីម៉ិច ច្រមុះជ្រូកស្ទឹងមានជ័យ តាមបណ្តោយផ្លូវព្រះមុន្នីរ៉េត ស្ថិតក្នុងសង្កាត់ស្ទឹងមានជ័យ ខណ្ឌមានជ័យ ។
ប្រភពពត៌មានបានឱ្យដឹងថា នៅមុនពេលកើតហេតុ គេបានឃើញយុវជនម្នាក់ ដែលគេស្គាល់ថា ជាបុគ្គលិកធ្វើការនៅក្រុមហ៊ុនភីហ្សា បានជិះម៉ូតូទ្រីមសេ១២៥ ស៊េរីឆ្នាំ២០១០ ពណ៍ខ្មៅ ពាក់ស្លាកលេខ ភ្នំពេញ 1-AQ8722 ដឹកនំភីហ្សាទៅឱ្យភ្ញៀវ តាមបណ្តោយផ្លូវព្រះមុន្នីរ៉េត ក្នុងទិសដៅពីកើតទៅលិច ខណះមកដល់ខាង កើតនឹងស្ថានីយ៍ប្រេងឥន្ឋនះសូគីម៉ិច ក៏បានជ្រុលចង្កូតទៅគៀរជាមួយនឹងរថយន្ត កាមេរីឆ្លាម ពណ៍ខ្មៅ គ្មានស្លាកលេខមួយគ្រឿង ផ្នែកខាងស្តាំតែបន្តិចបន្ទួចតែប៉ុណ្ណោះ ។
ភ្លាមបុរសជាម្ចាស់រថយន្ត បានបើកគៀរម៉ូតូឱ្យឈប់ ហើយចុះមកពីលើរថយន្ត ទះយុវជនម្នាក់នោះ៣កំផ្លៀង ហើយបានស្រែកខ្លាំងៗថា ខ្លួនជាកម្លាំងសមត្ថកិច្ច បង្កការភ្ញាក់ផ្អើលដល់អ្នកដំណើរតាមផ្លូវចោមរោមមើល និងហួសចិត្តគ្រប់គ្នា ។
ប្រភពបន្តថា ដោយមើលឃើញពី ទង្វើអសីលធម៌បែបនេះ ប្រជាពលរដ្ឋជាច្រើននាក់បាននាំគ្នាជួយអន្តរាគមន៍ និងបានឃាត់បុរសម្នាក់នោះ កុំឱ្យវាយទៅលើយុវជនជាម្ចាស់ម៉ូតូបន្តទៀត និងទាក់ទងទៅសមត្ថកិច្ចឱ្យចុះមកអន្តរាគមន៍ភ្លាមៗផងដែរ ។
ដោយសារតែការចចារមិនត្រូវគ្នានោះ សមត្ថកិច្ចមូលដ្ឋាន បានខ្លួនទាំងជនបង្ក និងជនរងគ្រោះ យកទៅ សួរនាំបន្ត នៅបុស្តិ៍នគរបាលរដ្ឋបាលស្ទឹងមានជ័យ រង់ចាំដោះស្រាយគ្នាតាមនីតិវិធី ៕
