កំពង់ស្ពឺះក្មេងស្រីម្នាក់បុើងខ្ទាតចំងាយ១៥ម៉ែត្របានរងរបួសជាទំងន់ដោយសារឡានលុចសុិស៣៣០បុកពីក្រោយ។ក្រោយបង្កតៃកុងឡានមិនបានឈប់នោះទេបានបន្ថែមល្បឿនបើករត់តែត្រូវសមត្ថកិច្ចតាមទាន់ខណះដែលឡានបង្កបែកកង់ទៅមុខលែងរួច។
ករណីគ្រោះថ្នាក់ចរាចរណ៍នេះកើតឡើងនៅវេលាម៉ោង១៤និង១៥នាទីថ្ងៃទី២២កុម្ភៈ២០១៥នៅតាមបណ្តោយផ្លូវជាតិលេខ៤ចន្លោះគីឡូម៉ែត្រ៣២-៣៣ស្ថិតក្នុងភូមិកែវឩត្តមឃុំត្រពាំងគងស្រុកសំរោងទងខេត្តកំពង់ស្ពឺ។ក្មេងស្រីរងគ្រោះឈ្មោះហេងសុីវរីវដ្ឋាអាយុ១៨ឆ្នាំរស់នៅភូមិផ្សារចាស់សង្កាត់ស្វាយក្រវាន់ក្រុងច្បារមនខេត្តជិះម៉ូតូម៉ាកហ្សុយស៑ុយគីឡេតពណ៌សអត់ស្លាកលេខ។ចំណែកឡានបង្កម៉ាកលុចសុីស៣៣០ពណ៌ខ្មៅពាក់ស្លាកលេខអ្នកបើកបរមានឈ្មោះទូចមរកតភេទប្រុសអាយុ៤២ឆ្នាំរស់នៅខេត្តសៀមរាប។
បើតាមក្មេងស្រីរងគ្រោះរៀបរាប់គឺរូបនាងធ្វើដំណើរតាមម៉ូតូម្នាក់ឯងទិសដៅពីលិចទៅកើតលុះមកដល់ចំណុចកើតហេតុស្រាប់តែត្រូវឡានលុចសុីសមួយគ្រឿងដែលធ្វើដំណើរស្របទិសគ្នាមកបុកពីក្រោយពេញទំហឹងបណ្តាលអោយនាងបុើងខ្ទាតចំងាយ១៥ម៉ែត្ររងរបួសជាទំងន់។ក្មេងស្រីរងគ្រោះបន្តថាក្រោយបុកនាងអោយរងរបួសហើយឡាននោះមិនបានឈប់មើលនាងនោះទេគឺបានបន្ថែមល្បឿនបើករត់ទៅទិសខាងកើតបាត់ចំណែកនាងត្រូវបានឡានសង្គ្រោះគ្លីនិកអ៑ុំសារ៉នដឹកយកទៅសង្គ្រោះ។ប្រភពពីសមត្ថកិច្ចបានអោយដឹងដែរថាក្រោយ
កើតហេតុសមត្ថកិច្ចបានដេញតាមរថយន្តបង្កដល់ផ្សារថ្នល់ទទឹងទើបជួបខណះដែលរថយន្តនោះបែកកង់ទៅមុខលែងរួច។ក្រោយឃាត់បានក្រុមមនុស្សនៅក្នុងរថយន្តបង្កនោះបានចុះមកជេរច្រាសឆ្អេះដាក់សមត្ថកិច្ចដោយយកអំណាចផ្កាយ៣ម្នាក់មកគំរាមសមត្ថកិច្ចតែទោះជាយ៉ាងណាសមត្ថកិច្ចមិនតបតនោះទេគឺយករថយន្តបង្កនោះមករក្សាទុកនៅអធិការដ្ឋាននគរបាលស្រុកដើម្បីធ្វើការដោះស្រាយជាមួយភាគីជនរងគ្រោះ។
ពេលនាំរថយន្តមកដល់កន្លែងសមត្ថកិច្ចស្រី្តពីរនាក់ដែលអះអាងថាជាបងប្អូនអ្នកបើកបរបានចេញមុខមកនិយាយជាមួយភាគីជនរងគ្រោះហើយនិយាយថាទារថ្លៃខូចខាតប៉ុន្មានបើច្រើនពេកគេគ្មានលុយអោយនោះទេទុកអោយបងប្អូនគេដែលធ្វើជាប៉េអឹមពាក់ផ្កាយ៣ចេញមុខដោះស្រាយវិញតែស្ត្រីនោះមិនបានប្រាប់ថាតើលោកផ្កាយ៣ដែលនិយាយនោះមានឈ្មោះអ្វីទេ។អ្វីដែលគេជឿជាក់គឺថាមានមេប៉េអឹមស្រុកសំរោងទងម្នាក់ឈ្មោះវិនឡេងហួងហៅហួរចេញមុខមកកាងភាគីឡានបង្កដោយនិយាយថាមេប្រើអោយមក។
ដូច្នេះលោកផ្កាយ៣នោះមានតែលោកហួរទេទើបស្គាល់ឈ្មោះ។លោកសានវុទ្ឋីនាយរងផ្នែកចរាចរណ៍ក៏បននអោយដឹងដែរថាស្ត្រីដែលមកដោះស្រាយនោះមិយាយមួយម៉ាត់ណាក៏ផ្កាយ៣ដែររកតែសមត្ថកិច្ចនិយាយអ្វីមិនកើត។ទីបំផុតភាគីបង្កបានព្រមព្រៀងសងសំណងទៅភាគីជនរងគ្រោះចំនួន៤៥០ដុល្លារដើម្បីបញប់រឿង។
ឪពុកម្តាយក្មេងស្រីរងគ្រោះបានអោយដឹងដែរថាពួកគាត់មិនចង់បានលុយសំណង៤៥០ដុល្លារនេះទេតែដោយសារលោកសាយសេតអធិការរងទួលបន្ទុកចរាចរណ៍និយាយអារកាត់ដោយបង្ខំអោយពួកគាត់យកទើបពួកគាត់យកទាំងបង្ខំបែបនេះ។តែទោះជាយ៉ាងណាគិតថាជាគ្រោះទៅចុះណាមួយមិនចង់មានរឿងវែងឆ្ងាយផងព្រោះឮថាបងប្អូនគេធ្វើប៉េអឹមពាក់ផ្កាយ៣ផងទើបព្រមបញ្ចប់ត្រឹមនេះ។
