ភ្នំពេញ នារីម្នាក់វ័យប្រហែលជាង២០ឆ្នាំ បានទទួលរងរបួសធ្លាយកដៃ ហើយត្រូវបានអ្នកឃើញហេតុការណ៍ជួយដឹកបញ្ជូនយកទៅព្យាបាលនៅមន្ទីរពទ្យឯកជនក្បែរកន្លែងកើតហេតុភ្លាមៗផងដែរ នារីរងគ្រោះរងរបួសដោយសារជនសង្ស័យ២នាក់ជិះម៉ូតូ ០១ គ្រឿង ដកកាំភ្លើងខ្លីបាញ់០១គ្រាប់ ប្លន់យកកាបូប។
ហេតុការណ៍ភ្ញាក់ផ្អើល កើតឡើងវេលាម៉ោង ០៦និង៥០ នាទី ព្រឹកថ្ងៃទី២៣ ខែកុម្ភះ ឆ្នាំ២០១៥ នៅមុខរោងចក្រកាត់ដេរ៦ជាន់ តាមបណ្តោយផ្លូវវ៉េងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ រាឃធានីភ្នំពេញ។
សាក្សីប្រាប់ឲ្យដឹងថា មុនពេលកើតហេតុ ពួកគាត់បានឃើញនារីរងគ្រោះជិះម៉ូតូ ម៉ាក Click ពណ៍ស លាយទឹកក្រូច ពាក់ស្លាកលេខ ភ្នំពេញ 1AG-6430 ម្នាក់ឯង តាមបណ្តោយផ្លូវវ៉េងស្រេង ក្នុងទិសដៅពីលិចទៅកើត លុះមកដល់ចំណុចកើតហេតុ ស្រាប់តែលិចមុខជនសង្ស័យ ០២នាក់ ស្លៀកពាក់ស៊ីវិល ជិះម៉ូតូ ០១គ្រឿង ម៉ាក សេ១២៥ ពណ៍ខ្មៅ មិនចាំស្លាកលេខ បានជិះមកអែបនារីរងគ្រោះ រួចធ្វើ សកម្មភាពឆក់កាបូបបានសម្រេច ហើយជិះគេចខ្លួនទៅទិសខាងកើត។ដោយឃើញបែបនេះ នារីរងគ្រោះបានព្យាយាមជិះម៉ូតូតាមពីក្រោយស្រែកថា ចោរៗ ធ្វើឲ្យជនសង្ស័យភ័យស្លន់ស្លោខំបន្ថែមល្បឿងម៉ូតូ ជ្រុលចង្កូត បុកម៉ូតូ ០១គ្រឿងផ្សេងទៀត បណ្តាលឲ្យដួល។
សាក្សីប្រាប់បន្តថា ភ្លាមៗនោះនារងគ្រោះបានស្ទុះទៅប្រតាយប្រតប់ជាមួយជនសង្ស័យ ដើម្បីដណ្តើមយកកាបូបមកវិញ ធ្វើជនសង្ស័យខឹងទប់ អារម្មណ៍មិនបានដកកាំភ្លើងខ្លី០១ដើមមិនស្គាល់ម៉ាកពីចង្កេះបាញ់សំដៅទៅលើនារីរងគ្រោះចំកដៃខាងឆ្វេងធ្លាយទៅម្ខាង បង្កការភ្ញាក់ផ្អើលដល់អ្នកដំណើរចោមរោមមើលជាច្រើននាក់ ។
ប្រជាពលរដ្ឋប្រាប់បន្តទៀតថា ក្នុងស្ថានភាពបែបនេះ ជនសង្ស័យទាំង ២នាក់ បានស្រវ៉ាយកកាបូបនារីរងគ្រោះ និងលើកម៉ូតូរបស់ពួកវា ជិះគេចខ្លួនបាត់ស្រមោល។ចំណែក ជនរងគ្រោះ ត្រូវបានអ្នកឃើញហេតុការណ៍ជួយដឹកបញ្ជូនយកទៅព្យាបាលនៅមន្ទីរពទ្យឯកជនក្បែរកន្លែងកើតហេតុភ្លាមៗផងដែរ ។
សាក្សីប្រាប់បញ្ជាក់ថា ចំណែកសមត្ថកិច្ខមូលដ្ឋានបាន ត្រឹមតែចុះមកដល់កន្លែងកើតហេតុ នាំយកម៉ូតូជនរងគ្រោះទៅរក្សាទុក រង់ចាំនារីរងគ្រោះមកដាក់ពាក្យបណ្តឹងតែប៉ុណ្ណោះ។
