ខេត្តសៀមរាប៖ ពលរដ្ឋប្រមាណជិត១០០នាក់នៅឃុំត្បែង ស្រុកបន្ទាយស្រី បានលើកគ្នាមកតុលាការខេត្តដើម្បីលើកទឹកចិត្តឲ្យតំណាងរបស់ពួកគេ ខណៈដែលតុលាការកោះហៅមកបំភ្លឺ ករណីបំផ្លាញដំឡូងរបស់ពលរដ្ឋ១៦គ្រួសារក្នុងភូមិជាមួយគ្នា។
ហេតុការតុលាការកោះហៅពលរដ្ឋចំនួន៦នាក់មកបំភ្លឺនេះ ធ្វើឡើងនៅថ្ងៃទី២៤ខែកុម្ភៈឆ្នាំ២០១៥ស្ថិតនៅមុខបរិវេណតុលាការខេត្ត ។
តំណាងពលរដ្ឋម្នាក់ឈ្មោះ ធួន លឿម ភេទប្រុស រស់នៅភូមិចំបក់៣ដើម ឃុំត្បែង ស្រុកបន្ទាយស្រី បានប្រាប់ឲ្យដឹងថា ពួកគាត់មកថ្ងៃនេះមានគ្នាប្រមាណជិត១០០នាក់មកពី៥ភូមិគឺភូមិត្បែងវត្ត,ត្បែងកើត,គូលេនថ្មី,ត្បែងលិច,ចំបក់បីដើម ក្នុងឃុំត្បែង ស្រុកបន្ទាយស្រី ដែលនាំគ្នាមកលើកទឹកចិត្តឲ្យពលរដ្ឋចំនួន៦នាក់ ត្រូវពលរដ្ឋមួយក្រុមទៀតដែលមាន១៦គ្រួសាររស់នៅភូមិឃុំជាមួយគ្នា បានប្តឹងរឿងបំផ្លិចបំផ្លាញផលដំណាំរបស់ពួកគាត់។
លោកបន្តថា
តាមពិតការចោទប្រកាន់របស់ពលរដ្ឋទាំង១៦គ្រួសារនោះ គឺជារឿងមិនពិតទេ ព្រោះខាងអាជ្ញាធរស្រុក បានកោះហៅមកប្រជុំរួចម្តងមកហើយ ដោយចាត់ទុកថា ដីទាំងនោះជាដីកំពុងមានទំនាស់ ដូច្នេះអាជ្ញាធរមិនអនុញ្ញាតឲ្យពលរដ្ឋណាម្នាក់ចូលទៅបង្កបង្កើនផលនៅទីនោះបានទេ គឺរង់ចាំរកដំណោះស្រាយឲ្យឃើញសិន។ ប៉ុន្តែខាងភាគីពលរដ្ឋ១៦គ្រួសារបានចូលទៅបង្កបង្កើនផលនៅទីនោះ ហើយត្រូវពលរដ្ឋម្ខាងទៀតដកយកផលដំណាំមួយចំនួន។
លោកបន្ថែមថា ពលរដ្ឋដែលត្រូវតុលាការកោះហៅមកបំភ្លឺទាំង៦រូបនោះមាន ឈ្មោះ ទី១/គង់អេង ទី២/ឈ្មោះ ធួន លឿម ទី៣/យ៉េម យ៉ន,ទី៤/ខេម លឿន, ទី៥/ ឈឿន សម្បត្តិ,ទី៦/ង៉ោ ធូ
អ្នកទាំង៦នាក់នេះត្រូវបានសួរនាំដោយ កញ្ញា ទីវ គឹមកល្យាណ ព្រះរាជអាជ្ញារងអមសាលាដំបូងខេត្តសៀមរាប។លោកបន្ថែមទៀតថា រហូតមកដល់ម៉ោងនេះតុលាការកំពុងសួរនាំពួកគាត់នៅឡើយ។
លោក សូរ សុន អភិបាលស្រុកបន្ទាយស្រី បានប្រាប់ តាមទូរស័ព្ទនៅរសៀលថ្ងៃទី២៤ខែកុម្ភៈឆ្នាំ២០១៥នេះថា បញ្ហារឿងទំនាស់ដីធ្លីដ៏រ៉ាំរ៉ៃក្នុងភូមិចំបក់បីដើម ឃុំត្បែងនេះអាជ្ញាធរបានព្យាយាមសម្របសម្រួលឲ្យពួកគាត់មានការយោគយល់គ្នាជាច្រើនលើកមកហើយ ប៉ុន្តែពួកគេមិនអាចទទួលយកនូវសំណើររបស់អាជ្ញាធរនោះទេ ទើបពួកគេលើកគ្នាមកប្តឹងដល់តុលាការតែម្តង។លោកបន្តថា ពលរដ្ឋទាំងនោះមានការច្រណែនគ្នារឿងដែលអាជ្ញាធរបានសម្រេចសប្បទានដីឲ្យពលរដ្ឋកាលពីពេលកន្លងទៅ រីឯពលរដ្ឋដែលចូលទៅដកដំឡូង ពលរដ្ឋម្ខាងទៀតនោះត្រូវបានមកសម្របសម្រួលគ្នានៅអធិការស្រុកម្តងរួចមកហើយ ប៉ុន្តែពួកគេមិនព្រមស្តាប់ទើបពួកគេនាំគ្នាមកប្តឹងដល់តុលាការតែម្តង។
ទោះបីជាយ៉ាងនេះក្តី ការចូលខ្លួនមកបំភ្លឺរបស់ពលរដ្ឋទាំង៦នាក់នៅក្នុងតុលាការនេះ ប្រភពបានឲ្យដឹងថា តុលាការគ្រាន់តែហៅពួកគាត់មកបំភ្លឺម្នាក់ម្តងតែប៉ុណ្ណោះ ដោយមិនទាន់មានស្ថានទម្ងន់ទោសទៅលើពួកគាត់យ៉ាងណានោះទេ។
ទាក់ទិននឹងករណីខាងលើនេះកញ្ញា ទីវ គឹមកល្យាណ ព្រះរាជអាជ្ញារងអមសាលាដំបូងខេត្តសៀមរាបបានប្រាប់ តាមទូរស័ព្ទនៅរសៀលថ្ងៃទី២៤ខែកុម្ភៈថា កញ្ញាកំពុងជាប់ប្រជុំ ដូច្នេះបញ្ហានេះនៅមិនទាន់ដឹងយ៉ាងណានោះទេ៕
