> បាត់ដំបង: ពិធីអាពាហ៍ពិពាហ៍មួយដែលនឹងប្រព្រឹត្តិឡើងនៅថ្ងៃទី26និង27ខែកុម្ភ:ឆ្នាំ2015នេះនៅត្រង់ចំនុចភូមិអូរខ្ជាយខាងត្បូង ឃុំអូរដំបង1 ស្រុកសង្កែ ខេត្តបាត់ដំបង ត្រូវបានប្រែក្លាយ
> ទៅជាពិធីខួបកំណើតវិញ ដោយសារតែកូនក្រមុំដែលមានអាយុមិនទាន់គ្រប់ការស្របច្បាប់
> ផងនោះបានរត់ចោលរោងការតាំងពី3ថ្ងៃមុន មូលហេតុគឺមិនពេញចិត្តទៅនឹងកូនកំលោះ ។
> ការភ្ញាក់ផ្អើល និងមានសាច់ញាតិខ្លះបង្ហូរទឹកភ្នែកផងនោះបានកើតឡើងនាព្រឹកថ្ងៃទី26-2-15
> ត្រង់ចំនុចរោងការមួយស្ថិតនៅចំនុចកើតហេតុខាងលើ ដោយសារតែដល់ថ្ងៃចូលរោងការទៅហើយស្រាប់តែបាត់កូនក្រមុំពីផ្ទះដោយមិនដឹងមូលហេតុ ធ្វើអោយឪពុក ម្តាយ និងកូនកំលោះដែលជា
> សាមុីខ្លួនបំរុងក្រាបផ្ទឹម ត្រូវខកបំនងយ៉ាងខ្លាំង ហើយក៏និយាយលែងចេញផងដែរ ។
> តាមការរៀបរាប់ពីលោកមេភូមិអូរខ្ជាយបានប្រាប់កម្ពុជាថ្មីថា នៅក្នុងពិធីអាពាហ៍ពិពាហ៍នេះ
> គឺកូនកំលោះមានឈ្មោះ នុន វណ្ណ: អាយុ30ឆ្នាំ ដែលជាកូនរបស់លោក នឿន នុន និងអ្នកស្រីសុិន រ៉េន
> ចំណែកកូនក្រមុំមានឈ្មោះ គុជ វណ្ណថៃ អាយុ16ឆ្នាំ(1999) ត្រូវជាកូនរបស់លោក គុជ អ៊ាប
> និងអ្នកស្រី ធួក ធឿន ដែលគ្រួសារទាំងពីនេះមានអាស័យដ្ឋាននៅភូមិអូរខ្ជាយទាំងអស់ ថែមទាំងជាសាច់ញាតិនឹងគ្នាថែមទៀតផង ។លោកមេភូមិបានបន្តថា នៅមុនពេលរៀបការគឺកូនក្រមុំជាប់ធ្វើការនៅឯក្នុងប្រទេសថៃ
> លុះក្រោយពីទទួលដំណឹងថាត្រូវអោយត្រឡប់មកស្រុកខ្មែរវិញដើម្បីរៀបការ គឺនាងមិនបានប្រកែកឡើយហើយក៏វិលមកវិញតាមសំណូមពររបស់អាណាព្យាបាល ប៉ុន្តែលុះនៅថ្ងៃទី23-2-15 ដែលខ្វះតែ3ថ្ងៃទៀតប៉ុណ្ណោះនឹងត្រូវចូលរោងការស្រាប់តែបាត់កូនក្រមុំពីផ្ទះដោយមិនមានដំណឹងអ្វីបន្តិចទាល់តែសោះ
> ធ្វើអោយឪពុក ម្តាយ មានការខ្វល់ខ្វាយយ៉ាងខ្លាំង ព្រោះទីមួយអាចពាក់ព័ន្ធទៅនឹងកិត្តិយស ហើយទីពីរគឺត្រូវសងបណ្តាការចំនួន5.000ដុល្លារអោយទៅខាងប្រុសថែមទៀត ។
> លោក អ៊ុត ពឿត មេឃុំអូរដំបង1 បានលើកឡើងថា ក្នុងការសុំច្បាប់រៀបអាពាហ៍ពិពាហ៍នេះ
> លោកក៏បានដឹងដែរព្រោះក្រុមគ្រួសារបានមកដល់សាលាឃុំ ប៉ុន្តែក្រោយពេលត្រួតពិនិត្យគឺសង្គេត
> ឃើញថាកូនក្រមុំកើតនៅឆ្នាំ1999ដូច្នេះគឺនាងទើបតែមានអាយុ16ឆ្នាំតែប៉ុណ្ណោះ ដែលច្បាប់មិនអាច> អនុញ្ញាតិអោយរៀបការបានឡើយ ហើយពេលនោះគេក៏ត្រឡប់ទៅផ្ទះវិញទៅ លុះនៅពេលមានរឿងកើតឡើងទើបដឹងថា គ្រួសារនេះបានលួចរៀបការស្ងាត់ៗបំពាននឹងផ្លូវច្បាប់ ថែមទាំងមានរឿងកើតឡើងថែមទៀតផង ។
> ដោយសារតែខ្លាចខាតបង់នូវទឹកប្រាក់ជាច្រើន ព្រោះភ្ញៀវក៏បានអញ្ជើញអស់ដោយត្រៀមចូលទៅពិសារភោជនាហារនៅថ្ងៃទី27នេះផង ទើបក្រុមគ្រួសារទាំងសងខាងពិភាក្សាគ្នាសំរេចផ្លាស់ប្តូរ ពិធីអាពាហ៍ពិពាហ៍នេះទៅជាពិធីខួបកំណើត ឬក៏ជាពិធីជប់លៀងវិញដើម្បីទទួលយកចំណងដៃធ្វើម៉េចបើរឿងវាក្លាយទៅជាយ៉ាងនេះទៅហើយ តែជាសំនាងល្អដែលខាងកូនកំលោះមិនបានប្តឹងផ្តល់អ្វីឡើយដោយសារតែវាជាសាច់ញាតិនឹងគ្នាផង ចំណែកកូនក្រមុំគេមិនទាន់ដឹងថាតើបច្ចុប្បន្ននាងបានទៅដល់ទីណានោះទេ ៕
