ជំលោះគ្នារវាងក្មេងតូចៗរហូតបង្កឱ្យក្លាយជាអំពើហិង្សារឈានដល់មានអ្នករងរបួសធ្ងន់៣នាក់ ដោយសារតែឃើញគេយកដុំថ្មគប់ប្អូនប្រុសរបស់ខ្លួនបណ្តាលឱ្យបែកក្បាយ ក៏ខឹងសម្បារទៅវាយភាគីបង្ក ២ ៣ដៃ ហើយបងប្អូនឳពុកម្តាយ ភាគីម្ខាងទៀតឃើញដូច្នេះក៏នាំគ្នាមកព្រួតវាយបណ្តាលឱ្យរបួសធ្ងន់ និងនាំគ្នាមកតវ៉ានៅបុស្តិ៍រកខុសត្រូវរៀងខ្លួន ។ ហេតុការណ៍នេះបានកើតឡើងកាលពីវេលាម៉ោង៨នឹង១០នាទីយប់ថ្ងៃទី២៥ ខែកុម្ភះ ឆ្នាំ២០១៥ នៅម្តុំបុរីកីឡា ស្ថិតក្នុងភូមិ១២ សង្កាត់វាលវង់ ខណ្ឌ៧មករា ។
ជនរងគ្រោះ២នាក់បងប្អូនខាងលើទី១មានឈ្មោះ សិត វាយោ អាយុ៥ឆ្នាំរបួសបែកក្បាល និងម្នាក់ទៀត ឈ្មោះ សិត ចន្ទ្រា អាយុ១៧ឆ្នាំ ត្រូវគេព្រួតវាយឡើងទ្រោមខ្លួន ។ ចំណែកកុមារម្ខាងទៀត ឈ្មោះ ភួន ធារ៉ា របួសត្រង់ភ្នែក អាយុ៩ឆ្នាំ អ្នកទាំង៣រស់នៅកន្លែងកើតហេតុ ផ្ទះជិតៗគ្នា ។
ប្រភពពត៌មានពីសាក្សីដែលបានឃើញហេតុការណ៍នេះបានឱ្យដឹងថា នៅមុនពេលកើតហេតុក្មេងតូចៗ ទាំង២នាក់នេះបានលេងជាមួយគ្នា មួយសន្ទុះក្រោយក៏បានឈ្លោះប្រកែកគ្នា ហើយឈ្មោះ ភួន ធារ៉ា ក៏បានរើស ដុំថ្មគប់ក្បាល ឈ្មោះសិត វាយោ បណ្តាលឱ្យបែកហូរឈាមជោគក្បាល និងបានស្រែកយំដើរទៅផ្ទះ ។ ពេលដើរទៅដល់ផ្ទះឈ្មោះ សិត ចន្ទ្រា ឃើញប្អូនប្រុស
របស់ខ្លួនមានសភាពដូច្នេះក៏បានសួរនាំ រួចក៏បានដើរទៅវាយឈ្មោះ ភួន ធារ៉ា ដែលគប់ប្អូនខ្លួនបណ្តាលឱ្យរបួសត្រង់ភ្នែក ឃើញដូចនេះឳពុកម្តាយ និងបងប្អូនជាច្រើននាក់របស់គេ បាននាំគ្នាមកព្រួតវាយមកលើឈ្មោះ សិត ចន្ទ្រា បណ្តាលឱ្យរងរបួសយ៉ាងដំណំ បង្កឱ្យមានការភ្ញាក់ផ្អើលយ៉ាងខ្លាំង និងអ្នកជិតខាងនោះមកអន្តរាគមន៍ឃាត់ភាគីទាំង២ផងដែរ ។
បន្ទាប់មកពួកគេទាំងសងខាងបាន នាំគ្នាទៅដាក់ទៅបុស្តិ៍នគរបាលរដ្ឋវាលវង់ បំណងដាក់ពាក្យបណ្តឹងរៀងខ្លួន ប៉ុន្តែត្រូវបានសមត្ថកិច្ចធ្វើការសម្រប សម្រួលដោយពួកគេសុតសឹតតែជាក្មេងដូចគ្នា ហើយភាគីទាំង២បំរុងនឹងត្រូវរ៉ូវគ្នាទៅហើយនោះ ក៏ឈ្មោះ សិត ចន្ទ្រា ទ្រាំទ្រនឹងរបួសឈឺខ្លាំងពេកមិនបានក៏ត្រូវបានក្រុមគ្រួសារដឹកយកទៅព្យាបាលនៅមន្ទីរពេទ្យ ក៏មានការកើតទុកមិនសុខចិត្ត និងបានប្រកែកមិនព្រមទៅវិញ ។
ចំពោះករណីរខាងលើនេះបានអូសបន្លាយមាណជា៣ទៅ ៤ម៉ោង ហើយបាននាំគ្នីគ្នាមកតវ៉ារកខុសត្រូវរៀងខ្លួន ពិបាកដល់សមត្ថកិច្ចផងដែរ ប៉ុន្តែនៅមិនទាន់មានដំណោះ ស្រាយនៅឡើយទេ រង់ចាំព្រឹកនេះថាកូនរបស់ពួកគាត់មានសភាពជំងឺធ្ងន់ធ្ងន់ ឬធូរស្រាលយ៉ាងណា ៕
