ភ្នំពេញ៖សិស្សវិទ្យាល័យពងទឹកពីរនាក់បានរងរបួសធ្ងន់ និងស្រាល ហើយត្រូវបានដឹកបញ្ជូនភ្លាមៗនៅមន្ទីរពេទ្យកាល់ម៉ែត្រ ដោយសារថយន្តក្រុមហ៊ុន ស៊ឹងហ្គាពួរ ផលិតកេសក្រដាស បើកបុកពីក្រោយពេញទំហឹងនៅមុខច្រកចូលសាលាវិទ្យាល័យពងទឹក តាមបណ្តោយផ្លូវជាតិលេខ៣
ក្នុងភូមិវត្តស្លែង សង្កាត់ពងទឹក ខណ្ឌដង្កោ រាជធានីភ្នំពេញ កាលពីវេលាម៉ោង១៣ និង១៥នាទី ថ្ងៃទី២៥ ខែមីនា ឆ្នាំ២០១៤។
សមត្ថកិច្ចប្រាប់ឲ្យដឹងថា រថយន្តបង្កហេតុម៉ាក KIA ពណ៌ខៀវ ពាក់ស្លាកលេខ ភ្នំពេញ 2S-7951 ជារថយន្តរបស់ក្រុមហ៊ុន ស៊ឹងហ្គាពួរ ផលិតកេសក្រដាស បើកបរដោយឈ្មោះ សំ បញ្ញា ភេទប្រុស អាយុ១៩ឆ្នាំ ស្នាក់នៅផ្ទះជួលក្បែរវត្តជំពូវ័ន សង្កាត់ចោមចៅ ខណ្ឌពោធិសែនជ័យ និងមានស្រុកកំណើតនៅភូមិវត្តក្តី ឃុំវាលពង់ ស្រុកឧតុង្គ ខេត្តកំពង់ស្ពឺ។ ដោយឡែកជនរងគ្រោះទាំងពីរនាក់មិនទាន់ស្គាល់អត្តសញ្ញាណនោះទេ ជាសិស្សរៀននៅសាលាវិទ្យាល័យពងទឹក ត្រូវបានដឹកបញ្ជូនសង្គ្រោះបន្ទាន់នៅមន្ទីរពេទ្យកាល់ម៉ែត្រ ជិះម៉ូតូ សេ១២៥ ពណ៌ខ្មៅ ពាក់ស្លាកលេខ ភ្នំពេញ 1AS-8966 ។
សាក្សីដែលឃើញផ្ទាល់ភ្នែកប្រាប់ថា មុនពេលកើតហេតុភាគីរថយន្តបង្ក និងម៉ូតូជនរង គ្រោះបើកបរស្របទិសគ្នា គឺពីត្បូងទៅជើង ដោយម៉ូតូបើកបរខាងមុខ លុះមកដល់ចំណុចកើតហេតុខាងលើ ម៉ូតូឈប់បន្តិច ដើម្បីបត់ចូលរៀនក្នុងសាលាវិទ្យាល័យពងទឹក ស្រាប់តែរថយន្តមកពីក្រោយបុកពេញទំហឹងតែម្តង បណ្តាលសិស្សស្រីទាំងពីរនាក់ដួលបោកទៅលើថ្នល់ ដោយម្នាក់រងរបួសធ្ងន់ និងម្នាក់ទៀតរបួសស្រាល ដោយឡែករថយន្តបង្កហេតុបានបួងចង្កូតទៅខាងឆ្វេងដៃជ្រុលធ្លាក់ផ្លូវ ប៉ុន្តែមិនក្រឡាប់នោះទេ ដោយគ្រាន់តែខូចខាតផ្នែកខាងមុខរថយន្តតិចតួចប៉ុណ្ណោះ។
ប្រភពព័ត៌មានពីសាក្សីប្រាប់បន្តថា ភ្លាមៗនោះជនរងគ្រោះទាំងពីរនាក់ត្រូវបានរថយន្តសាមុយដឹកយកសង្គ្រោះនៅមន្ទីរពេទ្យ។ ចំណែករថយន្តបង្កហេតុ និងម៉ូតូជនរងគ្រោះត្រូវបាននគរបាលចរាចរខណ្ឌដង្កោចុះធ្វើការវាស់វែង នាំយកទៅរក្សាទុក ដើម្បីដោះស្រាយតាម ច្បាប់៕
