នៅតាមបណ្តោយផ្លូវជាតិលេខ៥ ក្រុងកំពង់ឆ្នាំងយ៉ាងហោចណាស់យុវជនម្នាក់ បានស្លាប់ភ្លាមៗនៅកន្លែងកើតហេតុ និងម្នាក់ទៀតរងរបួសធ្ងន់ ដោយសារតែជិះម៉ូតូមួយគ្រឿងឌុបគ្នា ទៅបុកបង្គោលភ្លើង តាមបណ្តោយផ្លូវជាតិលេខ៥ មុខសាលាបំពេញវិជ្ជា ក្នុងភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង កាលពីវេលាម៉ោង១០និង០៥នាទីយប់ ថ្ងៃទី២៦ ខែកុម្ភៈ ឆ្នាំ២០១៥ ។
មន្ត្រីនគរបាលចរាចរណ៍ ក្រុងកំពង់ឆ្នាំង បានអោយដឹងថា ជនរងគ្រោះនៅក្នុងហេតុការណ៍ខាងលើនេះ ទី១.ឈ្មោះ ឌី ជាង អាយុ២៥ឆ្នាំ ជាកម្មករបើកបររ៉ឺម៉កម៉ូតូដឹកធុងហ្គាសអោយគេ ក្នុងពេលកើតហេតុ ជាអ្នកបើកម៉ូតូស្មាស់រ៉ឺវូ ពណ៌ក្រហម អត់ស្លាកលេខ បានស្លាប់ដោយបាក់ ក និងបែកចង្កា ទី២.ឈ្មោះ អ៊ូ សុភ័ស្ត អាយុ២២ឆ្នាំ មុខរបរកម្មកររោងចក្រ និងជាម្ចាស់ម៉ូតូជិះពីក្រោយ បានបែកក្បាលរងរបួសធ្ងន់ ពួកគេទាំង២នាក់ រស់នៅក្នុងភូមិត្រពាំងបី សង្កាត់
ផ្សារឆ្នាំង ក្រុងកំពង់ឆ្នាំង ។ មុនពេលកើតហេតុ ពួកគេបានបើកម៉ូតូឌុបគ្នាមកពីរោងចក្រ ក្នុងទិសដៅពីត្បូងមកជើង ក្នុងល្បឿនយ៉ាងលឿន លុះមកបើកដល់ចំណុចកើតហេតុ ជាផ្លូវកោងខ្លាំងបត់មិនទាន់ ក៏បានបុកបង្គោលខ្សែភ្លើង នៅខាងស្តាំដៃ បណ្តាលអោយឈ្មោះ ឌី ជាង ជាអ្នកបើកបរហោះផ្លោងទៅបុកជាមួយបង្គោលភ្លើង បណ្តាលឲ្យបាក់ក និងបែកចង្កាស្លាប់ភ្លាមៗនៅកន្លែងកើតហេតុ ចំណែកឈ្មោះ អ៊ូ សុភ័ស្ត បែកក្បាលសន្លប់ស្តូកស្តឹង រងរបួសធ្ងន់ ។
ក្រោយពេលកើតហេតុ សមត្ថកិច្ចបានហៅរថយន្តសាមុយ មន្ទីពេទ្យខេត្ត ដឹកជនរងគ្រោះទាំង២ ទៅកាន់មន្ទីពេទ្យខេត្ត ដើម្បីសង្គ្រោះព្យាបាល និង ទុកសពប្រគល់ជូនក្រុមគ្រួសារមកទទួលយកទៅធ្វើបុណ្យតាមប្រពៃណី ។ ចំណែកម៉ូតូបានខូតខាតមួយកំណាត់មុខ ត្រូវបានសមត្ថកិច្ច យកទៅរក្សាទុក នៅក្នុងអធិការដ្ឋាននគរបាល ក្រុងកំពង់ឆ្នាំង ។
គួរបញ្ជាក់អោយដឹងថា នៅចំណុចផ្លូវបត់កោងខ្លាំង៧៥% មុខសាលាបំពេញវិជ្ជាខាងលើនេះ កន្លងមកធ្លាប់កើតមានគ្រោះថ្នាក់ចរាចរណ៍ ជាច្រើនលើកក្នុង១ឆ្នាំៗ និង មានអ្នកស្លាប់ និងរបួសក៏មិនតិចដែរ និងខ្លះ បានបើកបុករបងសាលា និងបុករបងផ្ទះប្រជាពលរដ្ឋ នៅចំណុចនោះ បើគេបើកបរលឿនមិនប្រុងប្រយត្ន័ ពិសេសគឺស្រវឹងក្នុងពេលបើកបរតែម្តង ។
បើតាមសំណូមពររបស់ប្រជាពលរដ្ឋ បានស្នើសុំមន្ទីរសាធារណៈការខេត្ត ជួយដាក់ចំណាំងផ្លាត អោយបានធំៗ នៅចំណុចនេះផង ទើបអាចកាត់បន្ថគ្រោះថ្នាក់ចរាចរណ៍នៅទីនេះបាន ៕
