សៀមរាប កាលព្រឹកថ្ងៃទី ២៧ ខែ កុម្ភះ ឆ្នាំ២០១៥ នៅទីបញ្ជាការតំបន់ប្រតិបត្តិការសឹករងសៀមរាប បានបើកកិច្ចប្រជុំបូកសរុបលទ្ធផលការងារយោធាឆ្នាំ២០១៤និងផែនការសកម្មភាពឆ្នាំ២០១៤ ក្រោមកិច្ចដឹកនាំប្រជុំរបស់លោកឃឹមប៊ុនសុងអភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តសៀមរាបនិង ឯកឧត្តមឧត្តមសេនីយ៍ទោព្រហ្មសំអុលមេបញ្ជាការរងយោធភូមិភាគទី៤និង ដោយមានការអញ្ជើញចូលរួមពីបណ្តាអស់លោក លោកស្រីជា មេបញ្ជាការ បញ្ជាការរង នាយសេនាធិការ កងពលតូច នាយទាហាន នាយទាហានរង កងឯកភាពចំណុះតំបន់ប្រតិបត្តិការសឹករងសៀមរាបផងដែរ ។
បន្ទាប់ពីលោកឧត្តមសេនីយ៍ត្រី ស៊ិន ភត មេបញ្ជាការតំបន់ប្រតិបត្តិការសឹករងសៀមរាប ធ្វើកិច្ចស្វាគមន៍ និង បើកកិច្ចប្រជុំ ព្រមទាំងបានធ្វើការណែនាំមួយចំនួន ដល់បណ្តាកងឯកភាពចំណុះឲ្យតំបន់ប្រតិបត្តិការសឹករងសៀមរាប ដើម្បីជាទុននៃប្រទីបក្នុងការធ្វើបទអន្តរាគមន៍រួចមក លោកវរៈសេនីយ៍ទោ គង់ ឃួន នាយការិយាល័យទី៣ នៃតំបន់ប្រតិបត្តិការសឹករងសៀមរាប
បានធ្វើសេចក្តីរាយការណ៍បូកសរុបពីលទ្ធផលការងារយោធា ដែលអង្គភាពតំបន់ប្រតិបត្តិការសឹករងសៀមរាបអនុវត្តបានក្នុងឆ្នាំ២០១៤ ព្រមទាំងការអានទិសដៅផែនការសម្រាប់អនុវត្តបន្តការងារយោធា ឆ្នាំ២០១៥ ដោយលោកវរៈសេនីយ៍ឯក វិញ វឿនរួចមក ក្នុងនោះដែរក៏មានការឡើងធ្វើបទអន្តរាគមន៍របស់លោកមេបញ្ជាការវរៈសេនាតូចការពារព្រំដែនលេខ៤០៨ និង កិច្ចពិភាក្សាដោយផ្តោតលើការគ្រប់ គ្រងកម្លាំង គ្រឿងបរិក្ខាបំពាក់ ការងារហ្វឹកហ្វឺន អប់រំចិត្តសាស្ត្រ និង វិធីការពារទីតាំងផងដែរ ។
មានប្រសាសន៍នោះដែរលោក ឃឹម ប៊ុនសុង និង ឯកឧត្តមឧត្តមសេនីយ៍ទោ ព្រហ្ម សំអុល ក៏បានធ្វើការឯកភាពទៅលើលទ្ធផលការងារយោធាដែលទទួលបានក្នុងឆ្នាំ២០១៤និងផែនការអនុវត្តបន្តការងារយោធាឆ្នាំ២០១៥ព្រមទាំងបានផ្តល់នូវបទពិសោធន៍និងអនុសាសន៍វិធានការល្អៗមួយចំនួន ក្នុងការដឹកនាំបញ្ជាដល់កងកម្លាំងឯកភាព ចំណុះតំបន់ប្រតិបត្តិការសឹករងសៀមរាប សំដៅធ្វើឲ្យអង្គភាពទាំងមូល អនុវត្តលើការបំពេញភារកិច្ចស្នូល សម្រេច បានជោគជ័យ ដែលក្រសួងការពារជាតិ និង រាជរដ្ឋាភិបាលប្រគល់ជូន។
ឯកឧត្តមទាំងពីរ ក៏បានកោតសរសើរផងដែរ ពីកិច្ចសហការចូលរួមរបស់កងកម្លាំងតំបន់ប្រតិបត្តិការសឹករងសៀមរាប ជាមួយអាជ្ញាធរ ខេត្ត កងកម្លាំងប្រដាប់អាវុធគ្រប់លំដាប់ថ្នាក់ ក្នុងកិច្ចការពារថ្នាក់ដឹកនាំកំពូលៗជាតិ អន្តរជាតិ ធ្វើកិច្ចប្រជុំនិងទស្សនៈកិច្ចនៅតំបន់ប្រវត្តិសាស្ត្រនៃខេត្តសៀមរាប។ ម្យ៉ាងទៀតនេះគឺជាសក្ខីភាពដែលឆ្លុះបញ្ចាំងកាន់តែប្រត្យក្ស នូវដំណើរឆ្ពោះទៅការពង្រឹង នូវស្វាយភាពម្ចាស់ការ លើការកសាងកម្លាំងស្នូល និង ពង្រីកពង្រឹង
សមត្ថភាពប្រយុទ្ធ ការបំពាក់បំប៉នអប់រំចិត្តសាស្ត្រ យុទ្ធសាស្ត្រ ក្នុងការឆ្លើយតបប្រកបដោយប្រសិទ្ធិភាពខ្ពស់ រាល់ការប៉ុងប៉ងនៃមហិច្ចតាឈ្លាន ពាន របស់បច្ចាមិត្តបរទេស ហើយកម្លាំងយុទ្ធជនជាសសរស្តម្ភដ៏រឹងមាំនៃប្រទេស ក្នុងការការពារកសាង ការអភិវឌ្ឍន៍ ប្រទេសជាតិ ដូច្នេះកម្លាំងត្រូវតែជាធនធានមួយ ប្រកបដោយសក្តានុពល កាយសម្បទាល្អមាំមួន មានក្រមសីលធម៌ សេចក្តីថ្លៃថ្នូរ និងម៉ឺងម៉ាត់ ។
លោក ឃឹម ប៊ុនសុង លោក ព្រហ្ម សំអុល ក៏បានលើកនូវបទបញ្ជារបស់ប្រមុខរាជរដ្ឋាភិបាល ក្រោមការដឹកនាំផ្ទាល់របស់សម្តេចតេជោ ហ៊ុន សែន នាយករដ្ឋមន្ត្រី លើការកំណែទម្រង់ផ្សេងៗ ដើម្បីជម្រុញនឹងលើកម្ពស់កំណើនសេដ្ឋកិច្ចជាតិ ក្នុងការកាត់បន្ថយភាពក្រីក្រ និង ការកំណែទម្រង់កងយោធពលខេមរភូមិន្ទ៍ គឺធ្វើឲ្យស្ថានភាព គុណភាព និង ត្រៀមលក្ខណៈខ្ពស់ ។
ឯកឧត្តមក៏បានធ្វើការផ្តាំផ្ញើដល់មេបញ្ជាការ មេបញ្ជាការរង នៃកងឯកភាពចំណុះតំបន់ប្រតិបត្តិការសឹករងសៀមរាប ត្រូវគោរពឲ្យបានល្អ ពីអង្គការវិន័យកងទ័ព ឲ្យមានការសាមគ្គីផ្ទៃក្នុងល្អ ព្រមទាំងបង្កើនការហ្វឹកហ្វឺន បណ្តុះបណ្តាល បង្កើនសមត្ថភាពយល់ដឹង ពីយុទ្ធវិធី យុទ្ធសាស្ត្រ របស់កងទ័ព ដើម្បីបង្កើននូវគុណភាពក្នុងជួរកងទ័ព ជាសំខាន់ការគ្រប់គ្រងកងកម្លាំង គ្រឿងសម្ភារៈបំពាក់ និង បរិក្ខា របស់កងទ័ព ការកសាងអង្គភាព ការបង្កបង្កើនផល
ចិញ្ចឹមសត្វ ក្នុងការដោះស្រាយជីវភាពទ័ព និង គ្រួសារទ័ព ព្រមទាំងចូលរួមសហការជាមួយអាជ្ញាធរមូលដ្ឋាន អនុវត្តនូវគោលនយោបាយភូមិ ឃុំ មានសុវត្ថិភាព ក្នុងការរក្សាសុវត្ថិភាព សន្តិសុខជូនប្រជាជនក្នុងមូលដ្ឋានអង្គភាពឈរជើង ជាពិសេសដោយខេត្តសៀមរាបជាមជ្ឈមណ្ឌលប្រមូលផ្តុំនូវ ភ្ញៀវទេសចរណ៍ជាតិ អន្តរជាតិចូលមក ទស្សនាកម្សាន្ត ដែលជាតំបន់សេដ្ឋកិច្ច នៃប្រភពចំណូលមិនចេះរីងស្ងួតរបស់ ព្រះរាជាណាចក្រកម្ពុជា ៕
ដោយគឿនវ៉េត
