បុរសចំណាស់វ័យខ្ទង់ ៧០ឆ្នាំម្នាក់ បានបាញ់សម្លាប់បងប្រុសបង្កើតខ្លួនឯង រួមជា មួយនឹងភរិយា រួចបន្ទាប់មកក៏សម្លាប់ប៉ូលិសដែលមកចូលធ្វើអន្តរាគមន៍នោះទៀត នៅក្នុងសង្កាត់ វ៉ាសឿង ភាគខាងត្បូងទីក្រុងសេអ៊ូល កាលពីព្រឹក ម៉ោង ៩ និង ៣០នាទី ថ្ងៃសុក្រ ទី២៧ ខែកុម្ភៈ ឆ្នាំ ២០១៥ នេះតែម្តង។ទីភ្នាក់ងារព័ត៌មានជប៉ុន ក្យូដូ ដកស្រង់សម្តីពីមន្ត្រីប៉ូលិសកូរ៉េខាងត្បូងនៅហ្នឹងកន្លែងកើត ហេតុទៀតថា បន្ទាប់ពីការបាញ់សម្លាប់សាច់ញាតិខ្លួនឯង និង ប៉ូលិសម្នាក់ហើយនោះ បុរស ខាងលើនេះក៏បានធ្វើអត្តឃាតដោយបាញ់កាំភ្លើងសម្លាប់ខ្លួនឯងទៀត។
គួរបញ្ជាក់ក្រុមគ្រួសារដែលមានសុទ្ធតែមនុស្សវ័យចំណាស់នេះ គឺទំនងជាកើតឡើង ដោយសារតែជម្លោះធ្ងន់ធ្ងរនៅក្នុងក្រុមគ្រួសារ ហើយបងស្រីថ្លៃរបស់ជនរងគ្រោះ ទាំងប្តី ប្រពន្ធខាងលើដែលមានវ័យជាង ៨០ឆ្នាំនោះ បានលោតចុះពីលើអគារស្នាក់នៅជាន់ទីពីរ របស់ខ្លួន ទើបអាចរួចជីវិតបាន ប៉ុន្តែគាត់បានទទួលរងរបួសជាទម្ងន់ផងដែរ។
ចំពោះការបាញ់ប្រហារសម្លាប់គ្នាយ៉ាងព្រៃផ្សៃនេះ ត្រូវបានប៉ូលិសអះអាងថាកម្រកើតមាន ខ្លាំងណាស់ ប៉ុន្តែហេតុការណ៍នៅថ្ងៃសុក្រ នេះ វាបានកើតមានឡើងបន្ទាប់ពីការបាញ់ប្រហារ កាលពីពីរថ្ងៃមុនដែរ ដែលជនបង្កបានសម្លាប់មនុស្សពីរនាក់ រួចក៏ធ្វើអត្តឃាតដោយបាញ់ សម្លាប់ខ្លួនឯងថែមទៀត៕
