នៅវេលាម៉ោង១១ និង០០នាទី ថ្ងៃទី២៨ ខែកុម្ភៈ ឆ្នាំ២០១៥ រថយន្តក្រុងដែលត្រូវគេបង្ហើបអោយដឹងថាដឹកទំនិញគេចពន្ធក្នុងរថយន្តពេញ បានបុករថយន្តកាមរីហើមពីក្រោយខណៈរថយន្តកាមរីនោះបត់ចូលចាក់សាំងនៅស្ថនីយ៍ប្រេងឥន្ធនៈតេលា ស្ថិតក្នុងភូមិព្រៃពួច ឃុំជ្រៃ
បាក់ ស្រុករលប្អៀរ ខេត្តកំពង់ឆ្នាំង ។
សាក្សីពីកន្លែងកើតហេតុបានអោយដឹងថារថយន្តទាំងពីបើកបរក្នុងទិសដៅស្របគ្នា ពីជើងទៅត្បូង ដល់ចំណុចកើតហេតុ ខណៈរថយន្តកាមរីហើមពណ៌ស ពាកស្លាកលេខភ្នំពេញ 2D-7808 បត់ចូលចាក់សាំង ក៍ត្រូវរថយន្តក្រុងបោះពួយយ៉ាងលឿនបុកពីក្រោយពេញមួយទំហឹង បណ្តាលអោយរថយន្តកាមរីជារថយន្តតាក់ស៊ីដឹកមនុស្សពេញ ហើមខ្ទាតប៉ើងទៅបុកនឹងស្លាកយីហោស្ថានីយ៍ប្រេងឥន្ធនៈជាប់ តែមនុស្សជិះក្នុងរថយន្តកាមរីហើមនោះគ្មាននរណាម្នាក់គ្រោះថ្នាក់ស្លាប់បាត់បង់ជីវិតឡើយ រីឯរថយន្តក្រុងរ៉េចង្កូតបុកចូលផ្ទះប្រជាពលរដ្ឋអ្នកលក់គ្រឿងទេស បុកអូសមនុស្សចំនួន២នាក់ ចម្ងាយ៦ម៉ែត្រ ទៅបុករបងជាប់ទៅមុខលែងរួច ។ ហេតុការណ៍ខាងលើនេះ បានធ្វើអោយស្ត្រីម្ចាស់ផ្ទះម្នាក់ ឈ្មោះ កុយ សុផាត អាយុ៥៤ឆ្នាំ ដែលកំពុងអង្គុយលក់ ស្លាប់បាត់បង់ជីវិតដោយជាប់នៅនឹងកង់ក្រោយរថយន្តក្រុង និង
ចៅប្រុសម្នាក់ទៀតឈ្មោះ យិន ថា ហៅ ថេរ៉ាយុទ្ធ អាយុ៦ឆ្នាំ រងរបួសធ្ងន់ជាប់ក្រោមរថយន្ត។ ដោយឡែកស្ត្រីម្នាក់ទៀតដែលជិះលើរថយន្តកាមរីហើយបានរងរបួសធ្ងន់បែកក្បាល ។
ក្រោយកើតហេតុជនរងគ្រោះដែលរងរបួសត្រូវបានដឹកបញ្ជូនទៅសង្គ្រោះ នៅមន្ទីរពេទ្យ បង្អែក ខេត្តកំពង់ឆ្នាំង រីឯសាកសពស្ត្រី រងគ្រោះ ត្រូវបានប្រជាពលរដ្ឋ និងសមត្ថកិច្ចនាំគ្នាគាស់ យកចេញពីកង់រថយន្ត ដើម្បីធ្វើបុណ្យតាមប្រពៃណី ។
រថយន្តទាំងសងខាងត្រូវបានសមត្ថកិច្ចយកមករក្សាទុកនៅការិយាល័យកណ្តាលសណ្តាប់ធ្នាប់ នៃស្នងការដ្ឋាននគរបាលខេត្តកំពង់ឆ្នាំង ។ អ្នកបើកបររថយន្តក្រុងក្រោយកើតហេតុក៍បានរត់គេចខ្លួនបាត់ ។
បើតាមប្រភពបានបង្ហើបអោយដឹងថា រថយន្តក្រុងខាងលើគឺជារថយន្តដឹកទំនិញគេចពន្ធ នៅពេលយប់ៗហើយរថយន្តប្រភេទនេះមានប្រមាណជាង១០គ្រឿងឯណោះដែលចរាចរណ៍ទំនិញគេចពន្ធឆ្លងកាត់ផ្លូវជាតិលេខ៥ ពីប៉ោយប៉ែត ឆ្ពោះទៅរាជធានីភ្នំពេញដោយពុំដែលឃើញមានមន្ត្រីគយ ឬ សមត្ថកិច្ចជំនាញពាក់ព័ន្ធណាមួយបង្ក្រាបឡើយ ។
