ដោយ សុខ គឹមសៀន
នៅម៉ោង២និង៣០នាទីរសៀលថ្ងៃទី២៧ ខែកុម្ភៈ ឆ្នាំ២០១៥ ក្នុងភូមិបឹងស្ទេង ឃុំខ្លូងពពក ស្រុកទឹកផុស បុរសជាជនសង្ស័យលួចគោម្នាក់ត្រូវបានប្រជាលពរដ្ឋប្តឹងសមត្ថកិច្ចចាប់ខ្លួន បន្ទាប់ពីបានលួចចាប់គោញី១ក្បាលដែលគេលែងអោយស៊ីស្មៅនៅចំណុចព្រៃស្តុកក្រៀល បំណង
យកលក់ដើម្បីយកលុយដោះបំណុលសងអង្គការដែលគេជំពាក់៣ពាន់ដុល្លា។
នគរបាលព្រហ្មទណ្ឌ័កំរិស្រាលនៃស្នងដ្ឋាននគរបាលខេត្តបានអោយដឹងថា៖ជនសង្ស័យខាងលើនេះមានឈ្មោះ នៅ ធីម អាយុ៣៥ឆ្នាំ រស់នៅភូមិតាំងធ្នង់ ឃុំជៀប ស្រុកទឺកផុស ខេត្តកំពង់ឆ្នាំង។ មុនពេលចាប់ខ្លួនសមត្ថកិច្ចនគរបាលមូលដ្ឋានបានទទួលសេចក្តីរាយការណ៍ពីប្រជាពលរដ្ឋថាៈ មានជនសង្ស័យម្នាក់បានលួចចាប់និងដឹកយកគោញី១ក្បាល ដែលម្ចាស់គេលែងអោយស៊ីស្មៅនៅចំណុចខាងលើ ពេលទទួលបានព័ត៌មានសមត្ថកិច្ចក៏បានតាមស្រាវជ្រាវចាប់ខ្លួនជនសង្ស័យរូបនោះបានយកមកសារសួរតាមនិតិវិធី។
នៅចំពោះមុខសមត្ថកិច្ចជនសង្ស័យខាងលើបានសារភាពថា៖រូបគេពិតជាបានលួចគោញី១ក្បាលនោះមែន បំណងយកទៅលក់យកលុយសងអង្គការដែលគេនៅជំពាក់៣ពាន់ដុល្លា។ ពីមុនមកកាលគេនិងប្រពន្ធមិនទាន់លែងលះគ្នា រូបគេបានខ្ចីលុយអង្គការចំនួន៤អង្គការ មានអេលីស៊ីដា២កន្លែង ក្រេឌីត១កន្លែង និងស្ថាបនា១កន្លែង យកប្រាក់សរុបបានចំនួន៦ពាន់ដុល្លា ហើយក្រោយមកបានសងគេជាបន្តបន្ទាប់អស់ចំនួន៣ពាន់ដុល្លា មកដល់ពេលនេះនៅជំពាក់គេ៣ពាន់ដុល្លាទៀត។ ក្រោយពីប្រពន្ធបានលែងលះគ្នាទៅបន្ទុកនៃការសងប្រាក់អង្គការបានធ្លាក់មកលើខ្លួនគេជាអ្នកសងខ្លួនឯង ដោយអង្គការមកបង្ខំទារប្រាក់ជារៀងរាល់ខែ ខ្លួនគ្មានលុយសង ទើបខ្លួនបានសម្រេចចិត្តមកលួចគោញីគេ១ក្បាលនេះបំណងយកទៅលក់ អាចបានប្រាក់ពី៣០០ទៅ៤០០ដុល្លា ដើម្បីយកលុយសងអង្គការ។ឲ ប៉ុន្តែពេលកំពុងលួចដឹកគោ ក៏ត្រូវសមត្ថកិច្ចចាប់ខ្លួនបានតែម្តង។
ជនសង្ស័យរូបនេះត្រូវបានសមត្ថកិច្ចនគរបាលស្រុកទឹកផុស កសាងសំណុំរឿងបញ្ជូនខ្លួនមកកាន់ស្នងការដ្ឋាននគរបាលខេត្ត កសាងសំណុំរឿងបញ្ជូនខ្លូនជនល្មើសទៅកាន់សាលាដំបូងខេត្តនៅល្ងាចថ្ងៃទី២៨ ខែកុម្ភៈ ឆ្នាំ២០១៥នេះ។
ចំណែកគោញី១ក្បាលសម្បុរចំប៉ា មានកំពស់១.១៥ម៉ែត្រ ត្រូវបានសមត្ថកិច្ចរក្សាទុកនៅអធិការដ្ឋាននគរបាលស្រុកទឹកផុស។ ដោយឡែកម្ចាស់គោមិនទាន់ដឹងថាជារបស់អ្នកណានៅឡើយទេ ហេតុនេះសមត្ថកិច្ចសុំអំពាវនាវអោយម្ចាស់គោមកទាក់ទងសុំយកគោ នៅអធិការដ្ឋាននគរបាលស្រុកទឺកផុស និងសុំអោយមានលិខិតបញ្ជាក់ពីអាជ្ញាធរមូលដ្ឋានផង៕
