បន្ទាយមានជ័យៈ ផ្លូវថ្មីចំនួន៣ខ្សែរប្រវែងជាង១២០០ម៉ែត្រក្នុងភូមិចំនួន៣នៃឃុំសារង្គ នៃស្រុកស្វាយចេក ខេត្តបន្ទាយមានជ័យត្រូវបានបើកការដ្ឋានស្ថាបនាពីសំណាក់ លោក អាត់ ខែម ស្នងការនគរបាលខេត្ត តំណាងអោយឯកឧត្តមឧបនាយករដ្ឋមន្ត្រី កែ គឹមយ៉ាន ប្រធានក្រុមការងារចុះជួយខេត្តបន្ទាយមានជ័យ កាលពីថ្ងៃទី២៨ កុម្ភះ ២០១៥ ។
លោក អាត់ ខែម ស្នងការនគរបាលខេត្តបន្ទាយមានជ័យ និងជាក្រុមការងារគណៈបក្សប្រជាជនចុះជួយស្រុកស្វាយចេក បានលើកឡើងថា ដោយមានការស្នើសុំពីប្រជាពលរដ្ឋលើបញ្ហាផ្លូវ និងមើលឃើញពីភាពសំបាករបស់ប្រជាពលរដ្ឋក្នុងការធ្វើដំណើរ ឯកឧត្តម
ឧបនាយករដ្ឋមន្ត្រី កែ គឹមយ៉ាន ប្រធានក្រុមការងារចុះជួយខេត្តបន្ទាយមានជ័យ បានផ្តល់ចំនួន៣ខ្សែរខាងលើ ទៅតាមសំនូមពររបស់ពលរដ្ឋ ។ ផ្លូវដែលត្រូវស្ថាបនាមាន៣ខ្សែរ មានប្រវែងសរុបជាង១២០០ម៉ែត្រ ទទឹង៥ម៉ែត្រ ស្ថិតនៅក្នុងភូមិចំនួ៣គឺ ភូមិផ្លាស់កង់ ភូមិភាសខាងជើង ភូមិជ្រុង ជាអំណោយរបស់គណបក្សប្រជាជនកម្ពុជា ដោយមានការចូលរួម
ឧបត្ថម្ភពីសំណាក់លោក អ៊ឹង សេងហួ សមាជិកក្រុមការងារគណៈបក្សប្រជាជន និងរូបលោកផ្ទាល់ ហើយការសាងសង់ផ្លូវនេះត្រូវចែកចេញជា២ដំណាក់កាល គឺទី១ត្រូវកាយដីលើកផ្លូវអោយមានកំពស់១ម៉ែត្រដើម្បីការពារទឹកលិច និងទី២ត្រូវរកគ្រួសក្រហមមកក្រាលដើម្បីអោយផ្លូវស្អាតហើយជាប់បានយូ ។ តាមការគ្រោងទុកការស្ថាបនាផ្លូវនេះត្រូវចំណាយ ប្រេងយ៉ាងហោចណាស់៣ពាន់លីត្រ និងថវិការពី៦ ទៅ ៧ ពាន់ដុល្លាអាមេរិចដែរ ។
លោកបន្តទៀតថា ផ្លូវដែលត្រូវសាសង់នេះជាផ្លូវថ្មីជនួសផ្លូវចាស់ដែលមានស្ថានលំបាក និងបត់បែនច្រើន ធ្វើអោយពលរដ្ឋពីបាកក្នុងការធ្វើដំណើរ និងដឹកកសិផល ។ លោកបន្តទៀតថា កន្លងមកប្រជាពលរដ្ឋពលរដ្ឋភ័យក្លាចរឿងអត់ផ្លូវធ្វើដំណើរ តែក្រោមការដឹកនាំរបស់រដ្ឋាភិបាលនៃគណៈបក្សប្រជាជនកម្ពុជាដែលមានសម្តេច ហ៊ុន សែន ជាប្រមុខបានប្រែក្លាយ
ប្រទេសមានសុខសន្តិភាព អភិវឌ្ឍន៍ ផ្លូវខ្វាត់ខ្វែងគ្រប់ទីកន្លែង និងមានអគ្គីសនីដល់លំនៅដ្ឋានតាមទីជនបទ ។ អ្វីដែលរដ្ឋាភិបាលកំពុងបារម្ភ បន្ទាប់ពីមានផ្លូវស្អាតភ្ជាប់ពីតំបន់មួយទៅតំបន់មួយធ្វើអោយគ្រោះថ្នាក់ចរាចរកើនឡើងជាលំដាប់ ។
ជាមួយនិងការចុះបើកការដ្ឋានស្ថាបនាផ្លូវនេះផងដែរលោក ក៏បានពាំនាំអំណោយជាសារ៉ុង ពីគណៈបក្សប្រជាជនកម្ពុជាជូនដល់ប្រជាពលរដ្ឋក្នុងឃុំសារង្គ ដែលបានចូលរួម ៕
