នៅព្រឹកថ្ងៃទី២៥ ខែមិនា ឆ្នាំ២០១៤ កម្លាំងចំរុះរដ្ឋបាលជលផលខេត្តកំពង់ឆ្នាំង ក្រោម ការ ចង្អុល បង្ហាញ ពីលោក សេង ប៊ុនឈឿន នាយខណ្ឌ័រដ្ឋបាលជលផលខេត្តកំពង់ឆ្នាំង ដឹកនាំដោយលោក លី ឡា នាយរងខណ្ឌរដ្ឋបាលខេត្ត សហការណ៍ជាមួយកម្លាំង រដ្ឋបាលជល ផលសង្កាត់
កំពង់លែង និងផ្នែកផ្សារឆ្នាំង បានចុះយុទ្ធនាការរុញបំផ្លាញសម្រាស់ចំនួន២៥កន្លែង នៅក្នុងឃុំប្រឡាយមាសនិងឃុំផ្លូវទូក ស្រុកកំពង់លែង ខេត្តកំពង់ឆ្នាំង ។
នាយរងខណ្ឌរដ្ឋបាលជលផលខេត្តកំពង់ឆ្នាំង លោក លី ឡា បានអោយដឹងថា លទ្ធផលនៃការបង្ក្រាបទាំង២៥កន្លែងនេះមានទំហំ៨ពាន់ម៉ែត្រក្រឡា និងបង្គោល៣០០ដើម ត្រូវបានបំផ្លាញចោលទាំងស្រុង ដោយឡែកសម្រាស់អូសរុញយកទៅទំលាក់នៅតាមតំបន់អភិរក្ស ។
សូមរមលឹកថា ជាលទ្ធផលក្នុងការបង្ក្រាបរយៈពេល១ខែមកនេះ កម្លាំងរដ្ឋបាលជលផលបានបំផ្លាញចោលនូវវត្ថុតាងចំនួន៤១ករណី កំណត់ហេតុពិន័យ២ករណី កំណត់ហេតុបញ្ជូនទៅតុលាការ០១ករណី បំផ្លាញវត្ថុតាងចោលមានស្បៃមុង៦៣កន្លែង របាំងសាច់អួន៤៥កន្លែង របាំងព្រួលភ្ជិតព្រែក១០កន្លែង សម្រាស់២៤៨កន្លែង មកពាក់២កន្លែង លួស្បៃមុង៦៣គ្រឿង លូសាច់អួន៧៣គ្រឿង លប១២គ្រឿង ចាក់លែងកូនត្រីចំរុះ៣៩៥គ.ក្រ បង្គោល៨៩១៦ដើម និងព្រួល១៦ផែន ។ វត្ថុតាងដែលស្នើសុំតុលាការរឹបអូស ទូកភ្ជាប់ម៉ាស៊ីន១គ្រឿង អាំងវែទ័រ១គ្រឿង អាគុយ១គ្រឿង ដងឆក់១គូ ។ រីឯវត្ថុតាងស្នើសុំពិន័យហើយដោះលែងវិញមាន បាឡាភ្ជាប់ម៉ាស៊ីន១គ្រឿង ម៉ាស៊ីនបូមទឹក១គ្រឿង សាច់ជន១វង់ ដងជន១គូ ធុងក្លាសេ១គ្រឿង ទោសដាក់ពន្ធនាការចំនួន២នាក់ និងសេចក្តីសម្រេចពិន័យ ២លានរៀល ។
លោក លី ឡា នាយរងខណ្ឌរដ្ឋបាលជលផលខេត្តកំពង់ឆ្នាំង បានផ្សព្វផ្សាយ និងណែនាំដល់ប្រជានេសាទជនជាតិខ្មែរឥស្លាម មិនអោយប្រើឧបករណ៍មងបង្ក្រាប ដែលជាឧបករណ៍មិនមានចែងក្នុងប្រកាសលេខ ៤៥៨ ប្រក.កសក របស់ក្រសួងកសិកម្ម រុក្ខាប្រមាញ់និងនេសាទរួមទាំងឧបករណ៍ចែរ៉ាមិនអោយប្រើម៉ាស៊ីនខ្យល់ ។
នាយខណ្ឌរដ្ឋបាលជលផលខេត្តកំពង់ឆ្នាំង លោកសេង ប៊ុនឈឿនបានអះអាងថា លោកនឹងបន្តធ្វើការបង្ក្រាប នូវរាល់បទល្មើស ដែលបានកើតឡើងក្នុងដែនសមត្ថកិច្ចរបស់ខ្លួន អោយបានល្អប្រសើរ ស្របតាមបទបញ្ជាលេខ០១ របស់ប្រមុខរាជរដ្ឋាភិបាលកម្ពុជា ដោយមានគោលការណ៍ បង្ក្រាបផ្ទាល់ពេលជួបជាក់ស្តែង បង្ក្រាបពេលក្រុមជនល្មើសធ្វើការហ៊ុំចាប់ត្រី និងបន្តធ្វើការផ្សព្វផ្សាយ ណែនាំស្តីពីច្បាប់ជលផល ជូនប្រជានេសាទ និងបន្តធ្វើការបង្ក្រាបរាល់បទល្មើសនេសាទ ដូចភ្លៀងរលឹម ស្របពេលរាជរដ្ឋាភិបាលកម្ពុជា កំពុងដំណើរការកំណែទម្រង់ស៊ីជម្រៅលើគ្រប់វិស័យ ៕
