ប្រទេសអូស្ត្រាលី បានប្រកាសនៅថ្ងៃអង្គារ ទី០៣ ខែមីនា ឆ្នាំ២០១៥ នេះថា ខ្លួននឹង បញ្ជូនទ័ពបន្ថែមប្រមាណ ៣០០នាក់ ទៅកាន់ប្រទេសអ៊ីរ៉ាក់ ដើម្បីធ្វើការហ្វឹកហ្វឺនដល់ទ័ព ជំនាញនៅទីនោះ ឲ្យកាន់តែមាន សមត្ថភាពខ្ពស់បន្ថែមទៀត ដើម្បីទៅប្រយុទ្ធ តទល់ជាមួយ ក្រុមរដ្ឋអ៊ីស្លាម ISIS ។ទីភ្នាក់ងារព័ត៌មានចិនស៊ិនហួ បានដកស្រង់សម្តី របស់នាយករដ្ឋមន្ត្រី អូស្ត្រាលីលោក តូនី អាប់បុតត៍ ទៀតថា នេះជាផ្នែកមួយ នៃការបំពេញបេសកកម្ម រួមគ្នាជាមួយនឹងប្រទេស នូវែលសេឡង់ ដែលបានប្រកាស កាលពីសប្តាហ៍មុននេះថា ខ្លួននឹងបញ្ជូនទ័ព
ហ្វឹកហ្វឺនទៅ កាន់ប្រទេសអ៊ីរ៉ាក់ ចំនួន ១៤២នាក់ ។ដោយឡែកចំពោះទ័ពអូស្ត្រាលី ដែលគ្រោងនឹងបញ្ជួន ទៅអ៊ីរ៉ាក់ ទាំង៣០០នាក់នោះ នឹងត្រូវចូលរួមជាមួយទ័ព ២០០នាក់ទៀតដែលមានស្រាប់។
បើតាមសម្តី របស់លោកនាយករដ្ឋមន្ត្រី នៅចំពោះមុខ អ្នកសារព័ត៌មាន នានានៅថ្ងៃអង្គារ នេះ ការប្រយុទ្ធជាមួយក្រុម ISIS កន្លងមក គឺទទួលបាន ជោគជ័យយ៉ាងខ្លាំង ប៉ុន្តែជំនួយបន្ថែម ទៀតក៏ត្រូវបញ្ជូនបន្តផងដែរ ដើម្បីជួយដល់ប្រតិបត្តិការ នានារបស់កងទ័ពអ៊ីរ៉ាក់ ។ សម្រាប់ទ័ព ថ្មីដែលគ្រោងបញ្ជូនទៅនេះ នឹងត្រូវដាក់ឲ្យឈរជើង នៅភាគខាងជើង ទីក្រុងបាកដាដ រយៈពេល ២ឆ្នាំ ៕
