កំពង់ឆ្នាំង ឈើប្រណិតជាច្រើនប្រភេទ រាប់ម៉ែត្រគូប នៅក្នុងខណ្ឌ័រដ្ឋបាលព្រៃឈើ កំពង់ឆ្នាំង ត្រូវបានប្រគល់អោយក្រុមហ៊ុន ទ្រី ភាព ដឹកជញ្ជូនចេញ ដែលមន្ត្រីរដ្ឋបាលព្រៃឈើកំពង់ឆ្នាំង បានប្រាប់អោយដឹងថា ក្រុមហ៊ុនទ្រី ភាព ដេញថ្លៃបានពីក្រសួងកសិកម្មរួចហើយ ។
ការប្រគល់ឈើប្រណិតទាំងនេះ គឺពុំមានមន្ត្រីណាម្នាក់ ហ៊ានបង្ហាញឯកសារ ពីការដាក់អោយដេញថ្លៃនោះ អោយអ្នកសារព័ត៌មានដឹងឡើយ ដោយគ្រាន់តែប្រាប់ថា៖ឈើប្រណិតទាំងនោះ ដែលបង្ក្រាបបានពីបទល្មើស ក្នុងរយៈកាលកន្លងមក ត្រូវបានក្រុមហ៊ុន ទ្រី ភាព ជាអ្នកដេញថ្លៃបាន ពីក្រសួងកសិកម្ម ។ ចំណែកមន្ត្រីរដ្ឋបាលព្រៃឈើ ពុំបានពាក់ពន្ឋ័ក្នុងរឿងនេះទេ គ្រាន់តែទទួលបទបញ្ជាពីថ្នាក់លើ អោយប្រគល់ឈើទៅក្រុមហ៊ុន ទ្រី ភាព តែប៉ុណ្ណោះ។
នៅក្នុងការប្រគល់ឈើប្រណិតខាងលើនេះ មន្ត្រីក្នុងខណ្ឌ័រដ្ឋបាលព្រៃឈើកំពង់ឆ្នាំង និយាថា មិនអាចប្រាប់ពីចំនួនឈើ ដែលដេញថ្លៃបាន និង ចំនួនឈើដែលត្រូវប្រគល់អោយក្រុមហ៊ុនខាងលើនេះ ពិតប្រាកដនោះទេ តែបានត្រឹមប្រាប់អោយដឹងថា៖ឈើទាំងនេះ ជាឈើបង្ក្រាបបានតាមដំណាក់កាល ដែលតុលាការខេត្ត បានចេញសាលក្រមដកហូតជាសម្បត្តិរដ្ឋរួចហើយ ។ ការប្រគល់នេះ គឺប្រគល់អោយក្រុមហ៊ុន ទៅតាមសំនុំរឿនិមួយៗ លុះពេលស្ទូចឈើ ដាក់លើរថយន្តពេញហើយ ទើបដឹងចំនួន និង បន្តស្ទូចដាក់រថយន្តផ្សេងទៀត រហូតអស់ឈើ ដែលក្រុមហ៊ុនដេញថ្លៃបាន ។
ជុំវិញករណីនេះ សមត្កកិច្ចមួយចំនួន ដែលបានសហការបង្ក្រាបបទល្មើសព្រៃឈើ បាននិយាយថា៖ នៅក្នុងពេលបង្ក្រាបបាន លើកគ្នាស្ទាក់ចាប់ ដូចស្រមោច ពេលខ្លះសមត្ថកិច្ច បានផ្សងនិងគ្រោះថ្នាក់ គ្រប់បែបយ៉ាង ព្រោះរថយន្តដឹកឈើជនល្មើស សុទ្ឋតែជើងខ្លាំង និង ប្រើប្រាស់ថ្នាំញៀន អ្នកខ្លះហ៊ានបើករថយន្តល្មើស បុករថយន្តសមត្ថកិច្ចទៀតផង ។ កន្លងមករថយន្តសមត្ថកិច្ច មិនតិចទេ ដែលរងគ្រោះមានក្រឡាប់ មានធ្លាក់ស្រែ ដោយសារតែរថយន្តដឹកឈើល្មើសច្បាប់ទាំងនោះ ដេញបុក និង កៀរ ។ ប៉ុន្តែពេលលក់ឡាយឡុងដេញថ្លៃ និង ប្រគល់អោយក្រុមហ៊ុន ស្រាប់តែធ្វើស្ងាត់ៗ មិនអោយសមត្ថកិច្ចចំរុះ និង អ្នកកាសែតដឹងទៅវិញ គឺមិនតម្លាភាពទាល់តែសោះ ។ ម្យ៉ាងវិញទៀត ក្នុងការប្រគល់ឈើប្រណិតទាំងនេះ ក្រុមហ៊ុន និង មន្ត្រីរដ្ឋបាលព្រៃឈើ មានតែ២ភាគី គ្មានសមត្ថកិច្ចចំរុះ គ្មានស្ថាប័នតុលាការ ដូចពេលចាប់នោះទេ ។ ចំណែកតម្លៃឈើប្រណិតដែលក្រុមហ៊ុនត្រូវដឹកចេញ គឺមានរាប់សែនដុល្លា និង មិនដឹងថា អប្បហារបស់សមត្ថកិច្ចចំរុះ ដែលខំបង្ក្រាបនោះបានប៉ុន្មានទៅ ។
ករណីនេះ លោក ស៊ិន កុសល នាយខណ្ឌ័រដ្ឋបាលព្រៃឈើ កំពង់ឆ្នាំង មិនអាចសុំការបំភ្លឺបានទេចំណែកមន្ត្រីជំនាញវិញ បានត្រឹមតែឆ្លើយដាក់គ្នា អោយអ្នកកាសែតសុំឯកសារពីអ្នកនេះ ពីអ្នកនោះ គ្មានអ្នកហ៊ានអោយឡើយ ។កន្លងមកនៅក្នុងខណ្ឌ័រដ្ឋបាលព្រៃឈើកំពង់ឆ្នាំង ត្រូវបានចោរលួចកាត់សោរឃ្លាំង យកឈើប្រណិតៗអស់ជាច្រើនសន្លឹក ហើយតុលាការខេត្ត បានស្រាវជ្រាវជាច្រើនឆ្នាំ តែរកមិនឃើញឡើយ រហូតមកដល់ពេលនេះ ៕
