ខេត្តកណ្តាល៖ ស្រី្តម្នាក់មានផ្ទៃពោះ៧ខែត្រូវបាន សមត្ថកិច្ចនគរបាលក្រុងតាខ្មៅចាប់ខ្លួនកសាងសំណុំរឿងបញ្ជូនទៅកាន់សាលាដំបូង ខេត្តកណ្តាលនៅរសៀល ថ្ងៃទី២៦ ខែមីនា ឆ្នាំ២០១៤ ដើម្បីចាត់ការតាមនីតិវិធីច្បាប់ បន្ទាប់ពីស្ត្រីខាងលើនេះធ្វើសកម្មភាពលួចកាត់ខ្សែ.កប្លាទីនរបស់ស្ត្រី ម្នាក់កំពុងឈរទិញសាច់គោនៅក្នុងផ្សារតាខ្មៅថ្មី កាលពីវេលាម៉ោង៨ និង៣០នាទី ថ្ងៃទី២៦ ខែមីនា ឆ្នាំ២០១៤ ។
មន្ត្រីនគរបាលក្រុងតាខ្មៅបានឲ្យដឹងថា ជនសង្ស័យដែលត្រូវបានឃាត់ ខ្លួនមានឈ្មោះ យន ភួង ភេទស្រី អាយុ២២ឆ្នាំ មានផ្ទៃពោះជាង៧ខែ បច្ចុប្បន្នស្នាក់នៅផ្ទះជួលក្នុងភូមិប្រ៉ក សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ និងមានស្រុកកំណើតនៅភូមិព្រៃឃ្នេសៃ ឃុំព្រៃឃ្នេស ស្រុកមេសាង ខេត្តព្រៃវែង ។
ជនសង្ស័យបានធ្វើសកម្មភាពលួចកាត់ខ្សែ.កប្លាកទីនមួយខ្សែទម្ងន់២ជី៣ហ៊ុន របស់ជនរងគ្រោះឈ្មោះ យ៉ា ម៉ានី ភេទស្រី អាយុ៣១ឆ្នាំ មានទីលំនៅក្នុងភូមិថ្មី សង្កាត់/ក្រុងតាខ្មៅ ខេត្តកណ្តាល ខណៈដែលជនរងគ្រោះកំពុងឈរភ្លេចខ្លួនទិញសាច់គោនោក្នុងផ្សារ ៕
