រដ្ឋមន្ត្រីការបរទេស អាម៉េរិកលោក ចន ឃឺរី បាននិយាយថា សហរដ្ឋអាម៉េរិក និងប្រទេស បារាំង បាន ព្រមព្រៀងគ្នាកាលពីថ្ងៃសៅរ៍ ទី០៧ ខែមីនាថា កិច្ចចរចានុយក្លេអ៊ែរកាលពីពេលថ្មីៗនេះ ជាមួយប្រទេសអ៊ីរ៉ង់ ចាំបាច់ត្រូវធ្វើឲ្យបានខ្លាំងក្លា ហើយលោកបានសង្កត់ធ្ងន់ថា មានការងារថែមទៀត ដែលត្រូវធ្វើឲ្យសម្រេច បាន ដើម្បីតភ្ជាប់គម្លាតដែលនៅសេសសល់។
ទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃអាទិត្យ ទី០៨ ខែមីនា ឆ្នាំ២០១៥ បានឲ្យដឹងដោយផ្អែកតាម ការលើកឡើងរបស់លោក ឃឺរី បន្ទាប់ពីបញ្ចប់ជំនួបជាមួយមន្ត្រីទូតកំពូលបារាំងលោក ឡូរ៉ង់ ហ្វេបបឺស នៅ ទីក្រុង ប៉ារីសថា «យើងទាំងអស់គ្នាដែលនៅក្នុងប្រទេស P៥ បូក១ ត្រូវតែប្តេជ្ញាចិត្តដើម្បីធានាថា អ៊ីរ៉ង់មិន ទទួលបានអាវុធនុយក្លេអ៊ែរ។ យើងបានធ្វើឲ្យវាប្រសើរឡើងហើយ ប៉ុន្តែពួកគេនៅតែធ្វើឲ្យមានគម្លាត ហើយ យើងត្រូវតែបិតនូវគម្លាតដែលចន្លោះប្រហោងនោះ»។
លោក ឃឺរី បន្ថែមថា «យើងបានទទួលសិទ្ធិក្នុងការចរចា។ វាអាស្រ័យទៅលើប្រទេសអ៊ីរ៉ង់នោះទេ ប្រសិនបើ ប្រទេសចង់អភិវឌ្ឍន៍កម្មវិធីនុយក្លេអ៊ែរក្នុងន័យសន្តិភាព អ៊ីរ៉ង់ត្រូវតែបង្ហាញពិភពលោកទាំងមូលឲ្យបានដឹងថា អ្វីដែលខ្លួនបានអះអាង គឺពិតប្រាកដ»។
នៅក្នុងជំនួបជាមួយលោក ឃឺរីនោះដែរ រដ្ឋមន្ត្រីការបរទេសបារាំងលោក ហ្វេបបឺស បានកត់សម្គាល់ឃើញថា នៅមានការងារជាច្រើនទៀតដែលត្រូវធ្វើ ដើម្បីឈានទៅដល់ការសម្រេចបានចុងក្រោយ និងប្រកបដោយ និរន្តភាពលើផែនការនុយក្លេអ៊ែររបស់រដ្ឋាភិបាលទីក្រុង តេហេរ៉ង់នេះ។
