ភ្នំពេញ ៖ លោក ហេង ពៅ អតីតស្នងការនគរបាលរាជធានីភ្នំពេញ និង គូកន២នាក់ ត្រូវ សាលាឧទ្ឋរណ៍ កាលពីថ្ងៃទី២៦ ខែមីនា ឆ្នាំ២០១៤ កាត់ទោស៤សំណុំរឿងធំៗ ។ សំណុំរឿងនេះ រួមមាន ការរក្សាទុកប្រាក់ដុល្លារក្លែងក្លាយ ការបង្ខាំងមនុស្សខុសច្បាប់២ករណី និង ករណីបាញ់សម្លាប់លោក ថុង អ៊ុយប៉ាង ចាងហ្វាងកាសែតកោះសន្តិភាព ក្នុងឆ្នាំ១៩៩៨ ។
ក្រុមប្រឹក្សាជំនុំជម្រះសាលាឧទ្ឋរណ៍ បានធ្វើការសួរដេញដោល ម្តងមួយសំណុំរឿងៗ។ អនុប្រធានសាលាឧទ្ឋរណ៍ លោក សេង ស៊ីវុត្ថា បានថ្លែងក្នុងសវនាការ ថា ឈ្មោះ ហេង ពៅ អាយុ៥៦ឆ្នាំ និង ប្រពន្ឋឈ្មោះ ងិន សុធាវី (គេចខ្លួន) ត្រូវបានអយ្យការអមសាលាដំបូងរាជធានី ភ្នំពេញ ចោទប្រកាន់ពីបទរក្សាទុកប្រាក់ ដុល្លារក្លែងក្លាយ ប្រព្រឹត្តកាលពីថ្ងៃទី៣១ ខែកក្កដា ឆ្នាំ២០០៦ នៅក្រុងតាខ្មៅ ខេត្តកណ្តាល ។
ក្នុងប្រតិបត្តិការឆែកឆេរនេះ គឺសមត្ថកិច្ចបាន រឹបអូសប្រាក់ដុល្លារក្លែងក្លាយចំនួន៣០០សន្លឹក សុទ្ឋតែក្រដាស១០០ដុល្លារ ។ ក្រោយរឹបអូស បានវត្ថុតាង គណៈកម្មការចម្រុះបានរៀបចំសំណុំឯកសារប្តឹងលោក ហេង ពៅ និង ប្រពន្ឋ ឡើង តុលាការ ។ យោងតាមអង្គហេតុនេះ សាលាដំបូងរាជធានីភ្នំពេញ កាលពីថ្ងៃទី១៣ ខែកក្កដា ឆ្នាំ២០០៧ បានផ្តន្ទាទោស លោក ហេង ពៅ ១៤ឆ្នាំ និង ប្រពន្ឋ ដាក់២០ឆ្នាំ គិតពីថ្ងៃចាប់ខ្លួនបាន ។
ប៉ុន្តែសាល ក្រមនេះ ត្រូវបានលោក ហេង ពៅ ប្តឹងឧទ្ឋរណ៍ ។ លោក ហេង ពៅ បាននិយាយក្នុងសវនាការ ថា ការឆែកឆេររកប្រាក់ដុល្លារក្លែងក្លាយ នេះ គឺធ្វើឡើង ដោយមិនមាន មេធាវីចូលរួម សម្រាប់បំពេញនីតិវិធីតុលាការ នោះទេ ។ លោក ហេង ពៅ បញ្ជាក់ថា “ ធ្វើឡើង ដោយអត់មេធាវី លោក ម៉ក់ ជីតូ មានទំនាស់នឹងខ្ញុំ ក្រដាសប្រាក់ក្លែងក្លាយ នោះគឺលោក ម៉ក់ ជីតូ ជាអ្នកយកមកដាក់លើទុកជំនួយការរបស់ខ្ញុំ ដែលអ្នកណាក៏អាចចេញ ចូលបានដែរ ” ។ លោក តាន់ សេណារ៉ុង តំណាងមហាអយ្យការ បានសន្និដ្ឋាន ថា សូមឲ្យក្រុមប្រឹក្សាជំនុំជម្រះ ពិនិត្យឡើងវិញចំពោះសំណុំរឿងនេះ ។ លោក ថា “អង្គហេតុនេះពិតជាមិនច្បាស់លាស់មិនអាច ទទួលយកបាន ក្រដាសប្រាក់នេះត្រូវឆ្លងកាត់ធនាគារជាតិ សិន ទើបអាចយកជាការបាន សូមឲ្យសម្រេច ជាមោឃៈ ” ។
សំណុំរឿងទី២ ៖ លោក ហេង ពៅ ត្រូវបានចោទប្រកាន់ ពីបទបង្ខាំងមនុស្សខុសច្បាប់ ដែលប្រព្រឹត្តកាលពីខែមីនា មេសា ឆ្នាំ២០០៣ ។ ជនរងគ្រោះ គឺជាជនសង្ស័យ ក្នុងបទល្មើសប្លន់ ដែលក្រុមលោកហេង ពៅ ឃាត់ខ្លួនបញ្ជូនទៅតុលាការ ហើយតុលាការ បានសម្រេចមិនឃុំខ្លួន ក៏ ត្រូវលោក ហេង ពៅ បញ្ជាឲ្យចាប់ខ្លួនបង្ខាំងទុកនៅ អធិការដ្ឋាននគរបាល ខណ្ឌទួលគោក រយៈពេលជាង២ខែ ដោយគ្មានដីកាសម្រេចពីតុលាការ។ អង្គហេតុនេះ សាលាដំបូងរាជធានីភ្នំពេញ បានផ្តន្ទាទោសលោក ហេង ពៅ ដាក់ពន្ឋនាគារ ៥ឆ្នាំ ។
លោក ហេង ពៅ បដិសេធ ថា រាល់ការបង្ខាំងជនរងគ្រោះឈ្មោះចាន់ សៀប គឺធ្វើឡើងតាម ការបញ្ជារបស់ថ្នាក់លើប៉ុណ្ណោះ ។ លោក ថា “ ថ្នាក់លើអ្នកបញ្ជា ហើយឈ្មោះ ចាន់ សៀប ឲ្យប្រាក់ ៤ម៉ឺនដុល្លារ បញ្ចប់រឿងតែខ្ញុំមិនព្រមយក ខ្ញុំអត់បានបញ្ជាទេ ” ។ តំណាងមហាអយ្យការ សូមឲ្យសាលាឧទ្ឋរណ៍ ពិនិត្យមើលគុណសម្បត្តិរបស់លោក ហេង ពៅ ដែលបានពលិទាំងកម្លាំងកាយ កម្លាំងចិត្ត ដើម្បីជួយប្រទេសជាតិ ទុកជាស្ថានសម្រាលទោស សម្រាប់គាត់ ។ សំណុំរឿងទី៣ ៖ លោក ហេង ពៅ និង កូនចៅ ឈ្មោះ លី រ៉ាស៊ី ត្រូវបានចោទប្រកាន់ពីបទ បង្ខាំងមនុស្សខុសច្បាប់ ប្រព្រឹត្តកាលពីថ្ងៃទី២ ខែមីនា ឆ្នាំ២០០៥ ដល់ថ្ងៃទី៧ ខែឧសភា ឆ្នាំ២០០៥ ។
ជនរងគ្រោះ ឈ្មោះ ហេង គឹមលាង គឺជាអ្នកយកប្រាក់ទៅសូកប៉ាន់ចៅក្រម ឲ្យដោះលែង ជនល្មើសក្រុមប្រដាប់អាវុធ ប្លន់កក្រើក ក្នុងសង្កាត់អូរឫស្សីទី២ ដែលត្រូវក្រុម លោក ហេង ពៅ ឃាត់ខ្លួនបញ្ជូន ទៅតុលាការ ហើយតុលាការឃុំខ្លួន ក្រុមជនល្មើសបានមួយរយៈ ក៏ សម្រេច ដោះលែងឲ្យមានសេរីភាពឡើងវិញ ។ ប៉ុន្តែក្រុមលោក ហេង ពៅ បានចាប់ខ្លួនមកវិញ ដោយគ្មានការសម្រេចពីតុលាការ ហើយបន្តចាប់ឈ្មោះ ហេង គឹមលាង ទៀត ។
ក្រោយមកជនល្មើសទាំងអស់ត្រូវបញ្ជូនទៅតុលាការម្តងទៀត នៅសល់តែឈ្មោះ ហេង គឹមលាង ប៉ុណ្ណោះ ត្រូវឃុំខ្លួននៅកន្លែងប៉ូលិស ជាច្រើនខែ ។ អង្គហេតុនេះ សាលាដំបូងរាជធានីភ្នំពេញ បានផ្តន្ទាទោស លោក ហេង ពៅ និង លី រ៉ាស៊ី ដាក់ពន្ឋនាគារ ម្នាក់ៗ៧ឆ្នាំ និងសង ទៅជនរងគ្រោះ ២៥០០០ ដុល្លារ ។
លោក ហេង ពៅ ប្រាប់តុលាការថា ក្រុមជនល្មើសទាំងនោះ បានប្លន់យ៉ាងកក្រើកពេញទីក្រុង ភ្នំពេញ ហើយខ្លួនបានបង្ក្រាបនិងរឹបអូសបានមាសជាង៦គីឡូក្រាម ។ ក្រោយមកបានចាប់បញ្ជូនទៅ តុលាការដើម្បីធ្វើការឃុំខ្លួនដាក់ពន្ឋនាគារ ។ ប៉ុន្តែឈ្មោះ ហេង គឹមលាង បានរត់ការយកប្រាក់ សូកប៉ាន់ចៅក្រម ដោះលែងក្រុមជនល្មើសវិញ ។ ក្រោយទទួលបានបញ្ជាពីថ្នាក់លើ ខ្លួនក៏ឃាត់ខ្លួន ឈ្មោះ ហេង គឹមលាង តែម្តង។
ចំណែក លី រ៉ាស៊ី ក៏បានឆ្លើយដូចគ្នានឹង ហេង ពៅ ផងដែរ ។ សំណុំរឿងទី៤ ៖ លោកហេង ពៅ លោក លី រ៉ាស៊ី លោក ហេង ផៃ និង លោក ហេង វ៉េង (គេចខ្លួន) ត្រូវបានចោទប្រកាន់ពីបទប៉ុនប៉ងធ្វើឃាតទៅលើលោក ថុង អ៊ុយប៉ាង ចាងហ្វាងកាសែត កោះសែត កាលពីថ្ងៃទី៨ ខែមិថុនា ឆ្នាំ១៩៩៨ នៅចំណុចក្នុងវត្តទឹកថ្លា សង្កាត់ទឹកថ្លា ខណ្ឌឫស្សីកែវ ខណៈក្រុមគ្រួសារ ថុង អ៊ុយប៉ាង ធ្វើពិធីបុណ្យឆ្លងចេតិយរបស់ឳពុករបស់លោក ។
ក្រុមជនល្មើស មានគ្នា២នាក់ បានបាញ់មកលើលោក ថុង អ៊ុយប៉ាង ចំដើមទ្រូងឆ្វេង ដើមទ្រូងស្តាំ តែមិនបណ្តាល ឲ្យគ្រោះថ្នាក់ដល់ជីវិតនោះទេ ។ ចំណែកជនល្មើសម្នាក់ ក៏ត្រូវអង្គរក្សលោកថុង អ៊ុយប៉ាង បាញ់ឲ្យ របួសដៃឆ្វេង ផងដែរ ។ អង្គហេតុនេះ សាលាដំបូងរាជធានីភ្នំពេញ បានផ្តន្ទាទោស ឈ្មោះ លី រ៉ាស៊ី ឈ្មោះ ហេង ផៃ ឈ្មោះ ហេង វ៉េង (គេចខ្លួន) ដាក់ពន្ឋនាគារម្នាក់ៗ១៨ឆ្នាំ ពីបទប៉ុនប៉ងឃាតកម្មគិតទុកជាមុន និង ផ្តន្ទាទោស ឈ្មោះ ហេង ពៅ ដាក់ពន្ឋនាគារ១៦ឆ្នាំ ពីបទសមគំនិតក្នុងប៉ុនប៉ងឃាតកម្មគិតទុកជាមុន ។
តុលាការ បានបង្គាប់ឲ្យពួកគេសងប្រាក់ដល់លោក ថុង អ៊ុយប៉ាង ចំនួន១៧ម៉ឺនដុល្លារ ។ ក្នុងសវនាការ ជនជាប់ចោទ ទាំង៣នាក់ បានបដិសេធថាពុំបានប្រព្រឹត្តដូចការចោទប្រកាន់ នោះទេ ។ ទោះបីយ៉ាងណា ក្រោយការសួរដេញដោល អស់ពេលជាច្រើនម៉ោង ចៅក្រមបានលើកពេល ប្រកាសសាលដីកាទៅ៤សំណុំរឿងនេះ ទៅថ្ងៃទី៧ ខែមេសា ឆ្នាំ២០១៤ ខាងមុខនេះ ៕ 
