ខេត្តព្រះសីហនុគ្រួសារលោក ហយ ម៉ាង ដែលមានទីលំនៅក្រុមទី១៩ ភូមិ២ សង្កាត់លេខ៤ ក្រុង ខេត្តព្រះសីហនុ ជាគ្រួសាររងដោយសារគ្រោះអគ្គីភ័យកាលពីថ្ងៃទី១៨ ខែកុម្ភះ ឆ្នាំ២០១៥កន្លងមក បានទទួលអំណោយសង្គ្រោះពីសហភាព សហព័ន្ធយុវជនកម្ពុជាខេត្តព្រះសីហនុ កាលពីរសៀលថ្ងៃទី០៧ ខែមិនា ឆ្នាំ២០១៥កន្លងមកនេះ ។
ឯកឧត្តម ស្រ៊ុន ស្រ៊ន់ អភិបាលរងខេត្ត និងជាប្រធានសហភាព សហពន្ធ័យុវជនកម្ពុជាខេត្តព្រះសីហនុ បានដឹកនាំក្រុមការងារនាំយកអំណោយទៅចែកជូនគ្រួសារជនរងគ្រោះអគ្គីភ័យ ព្រមទាំងបានពាំនាំនូវការសាកសួរសុខទុក្ខ ពីសំណាក់ឯកឧត្តម ហ៊ុន ម៉ានី ប្រធានសហភាព
សហពន្ធ័យុវជនកម្ពុជា ដែលឯកឧត្តមតែងតែគិតគូរពីសុខទុក្ខ និងជីវភាពរស់នៅរបស់បងប្អូនប្រជាពលរដ្ឋរងគ្រោះនៅទូទាំងប្រទេស ជាពិសេសប្រជាពលរដ្ឋដែលជួបប្រទះនូវគ្រោះធម្មជាតិនានា គ្រោះអគ្គីភ័យ ជនក្រីក្រ ចាស់ជរាគ្មានទីពឹង ដើម្បីធ្វើយ៉ាងណាជួយសម្រួលទុកលំបាកខ្វះខាតក្នុងជីវភាពរស់នៅប្រចាំថ្ងៃ ។
ឯកឧត្តមអភិបាលរងខេត្ត ក៏បានសម្តែងនូវការចូលរួមរំលែកទុក្ខ និងចូលរួមសោកស្តាយគ្រួសាររងគ្រោះអគ្គីភ័យបាត់បង់លំនៅឋានដោយសារអគ្គីភ័យកាលពីខែកុម្ភៈកន្លងមកនេះ ។ ដោយសារមើលឃើញនូវការលំបាកខ្វះខាតទីជម្រក ស្បៀងអាហារប្រចាំថ្ងៃ ហើយទើបសហភាពសហព័ន្ធ យុវជនខេត្តព្រះសីហនុ ប្រមូលថវិកាផ្ទាល់ខ្លួនពីសមាជិក ដើម្បីចែកជូនគ្រួសាររងគ្រោះ នេះគឺជាវប្បធម៌នៃការចែករំលែកនូវពេលមានទុក្ខលំបាក ខ្វះខាតរបស់
បងប្អូនប្រជាពលរដ្ឋររងគ្រោះដោយមិនមានប្រកាន់និន្នាការនយោបាយ ពណ៌សម្បុរ ធ្វើយ៉ាងណាជួយប្រជាពលរដ្ឋបានទាន់ពេលវេលា មិនទុកឪ្យប្រជាពលរដ្ឋណាម្នាក់ស្លាប់ដោយខ្វះខាតស្បៀងនោះទេ ។
ឯកឧត្តម ស្រ៊ុន ស្រ៊ន ថ្លែងថា សហភាពសហព័ន្ធយុវជនកម្ពុជាខេត្តព្រះសីហនុតែងតែចូលរួមសហការជាមួយគ្រួសារជនរងគ្រោះ និងជនក្រីក្រនៅក្នុងខេត្តព្រះសីហនុ ដើម្បីគៀងគររកជំនួយឧបត្ថម្ភយកមកចែកជូន និងជួយសម្រួលជីវភាពរស់នៅបងប្អូនប្រជាពលរដ្ឋ ដើម្បីមានទីជម្រកសមរម្យឡើងវិញ ចូលរួមកាត់បន្ថយភាពក្រីក្ររបស់ប្រជាពលរដ្ឋ ស្របតាមគោលនយោបាយកំណែទម្រង់ស៊ីជម្រៅរបស់រាជរដ្ឋាភិបាលអណត្តិទី៣ ។
អំណោយដែលចែកជូនគ្រួសារជនរងគ្រោះភ្លើងឆេះផ្ទះ មានស៊ីម៉ងចំនួន ០២តោន អង្ករ៥០គីឡូក្រាម ទឹកសុទ្ធមួយកេស ទឹកផ្លែឈើ០១កេស និងថវិការ ១លានរៀល ។ ដោយឡែកគ្រួសារសមាជិកសហភាព សហពន្ធ័យុវជនកម្ពុជាខេត្តព្រះសីហនុ រងគ្រោះថ្នាក់ចរាចរណ៌នៅអូរសំអាត ស្ថិតក្នុងសង្កាត់លេខ៣ ក្រុងព្រះសីហនុបានទទួលថវិការ ១លានរៀលផងដែរ៕
