( ពត៌មានរូបភាព វីដេអូ )សៀមរាប:ដើម្បីអនុវត្តនិងការធានាបាននូវសណ្តាប់ធ្នាប់សុវត្តិភាពចរាចរណ៍ផ្លូវគោកក្នុងខេត្តសៀមរាបឲ្យបានកាន់តែល្អប្រសើរថ្វេរដងស្របតាមអនុសាស្ត្រដ៏ខ្ពង់ខ្ពស់ពីសំណាក់សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា ដែលសម្តេចបានដាក់ចេញនៅ ពាក្យស្លោក ថ្ងៃនេះថ្ងៃស្អែក កុំឲ្យមានគ្រោះថ្នាក់ចរាចរណ៍។
ជាក់ស្តែងនៅយប់ថ្ងៃទី ២៦ខែមីនា ឆ្នាំ២០១៤នេះ លោកវរៈសេនីយ៍ឯក តេង ច្ទ័ន ណាត ស្នងការរងទទួលបន្ទុក ចរាចរណ៍និង លោកវរៈសេនីយ៍ទោ ជឹម សុវណ្ណ នាយការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តសៀមរាប។
បានដឹងនាំកម្លាំងនគរបាលក្នុងអង្គភាពដោយអនុវត្តតាមការណែនាំចង្អុលបង្ហាញជាប្រចាំពីសំណាក់ លោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាបផងនោះ។បានចុះអនុវត្តធ្វើការរឹតបណ្តឹង ច្បាប់ចរាចរណ៍ផ្លូវគោកនៅពេលយប់តាមបណ្តោយផ្លូវជាតិលេខ៦ក្នុងក្រុងសៀមរាប ដោយធ្វើការផ្អាកពិន័យទៅលើអ្នកបើកបរម៉ូតូនិងរថយន្តគ្រប់ប្រភេទដែលមិនមានលក្ខណ:បច្ចេកទេសគ្រប់គ្រាន់នៅក្នុងការបើកបរ ។
ដូចជា អ្នកបើកបរម៉ូតូមិនបានពាក់មួកសុវត្ថិភាព និងបំពាក់កញ្ចក់មើលក្រោយ ការត្រួតពិនត្យចំពោះអ្នកបើកបរស្ថិតនៅក្រោមឥទ្ធិពលនៃជាតិស្រវឹងក៏ដូចជាធ្វើការផ្អាកពិន័យទៅលើអ្នកបើកបររថយន្តគ្រប់ប្រភេទដែលមានរថយន្តតែគ្មានស្លាកលេខនិងខុសលក្ខណ:បច្ចេកទេសរបស់រថយន្តផងដែរ ។
លោកវរៈសេនីយ៍ឯក តេង ច្ទ័ន ណាត ព្រមទាំងលោកវរៈសេនីយ៍ទោ ជឹម សុវណ្ណបានមានប្រសាសន៍ឲ្យដឹងថានៅក្នុងការចុះអនុវត្តធ្វើការរឹតបណ្តឹង ច្បាប់ចរាចរណ៍ផ្លូវគោកនៅពេលយប់បើតាមស្ថានភាពជាក់ស្តែងយើងសង្កេតឃើញថាអ្នកដែលបើកបរម៉ូតូភាគច្រើនមិនបានពាក់មួកសុវត្ថិភាពនៅពេលយប់និងខ្លះទៀតនៅពេលដែលឃើញសមត្ថកិច្ចកពុងតែធ្វើការអនុវត្តច្បាប់បានបើកម៉ូតូរត់គេចពីសមត្ថកិច្ចដែលអាចបង្កឲ្យមានគ្រោះថ្នាក់ចរាចរណ៍ជាយថាហេតុផងដែរ ។
ក្នុងនោះសមត្ថកិច្ចក៏បានធ្វើការអំពាវនាវដល់អ្នកបើកបរទាំងអស់ពេលបើកបរត្រូវគោរពច្បាប់ស្តីពីច្បាប់ចរាចរណ៍ផ្លូវគោកនិងប្រុងប្រយ័ត្នជានិច្ចក្នុងការបើកបរ។ដោយត្រូវបើកបរតាមល្បឿនដែលច្បាប់បានកំណត់និងត្រូវបន្ថយល្បឿឲ្យស្របទៅតាមស្ថានភាពផ្លូវ។បើបើកបរសូមកុំសេពជាតិស្រវឹងបើសេពជាតិស្រវឹងសូមកុំបើកបរ។ ហើយពេលបើកបរត្រូវមានសុជីវធម៍និងត្រូវចេះយោគយល់អធ្យាស្រ័យគ្នាទៅវិញទៅមក។
មុនពេលបត់ ឫឈប់ត្រូវផ្តល់សញ្ញាដល់អ្នកដ៏ទៃ។ពេលបើកបរម៉ូតូត្រូវពាក់ម៉ួកសុវត្តិភាពបំពាក់កញ្ចក់មើលក្រោយឲ្យបានត្រឹមត្រូវនិងពេលបើកបររថយន្តត្រូវពាក់ខ្សែក្រវ៉ាត់សុវត្ថិភាពនិងមិនបើកបរឋិតនៅក្រោមឥទ្ធិពលនៃជាតិស្រវឹង។ក៏ដូចជាសូមឲ្យបងប្អូនទាំងអស់គ្នាចូលរួមគោរពច្បាប់ចរាចរណ៏ ដូចជាៈការគោរពភ្លើងសញ្ញា គំនូសសញ្ញា និងស្លាកសញ្ញាផ្សេងៗ ដែលទាក់ទងនឹងច្បាប់ចរាចរណ៍ឲ្យមានប្រសិទ្ធិភាពខ្ពស់ផងដែរព្រោះខេត្តសៀមរាបគឺជាតំបន់ទេសចរណ៍ផងនោះ ៕ ដោយ លោក ខេង ខេមរា 
