ខេត្តសៀមរាបនៅព្រឹកថ្ងៃទី០៩ខែមីនាឆ្នាំ២០១៥ នៅស្នងការដ្ឋាននគរបាលការពារបេតិកភណ្ឌមុខប្រាសាទអង្គរនៃខេត្តសៀមរាបមានធ្វើពិធីប្រកាសតែងតាំងមុខតំណែងនិងបំពាក់ឋានន្តរសក្តិជូនដល់មន្ត្រីនគរបាលជាតិនៃនាយកដ្ឋាននគរបាលការពារបេតិកភណ្ឌ ចំនួន១០៩រូប មកពីអង្គភាពនគរបាលការពារបេតិកភណ្ឌប្រាសាទព្រះវិហារប្រាសាទបន្ទាយឆ្មានិងរមណីយដ្ឋានអង្គរក្រោមអធិបតីភាពលោក ឧត្តមសេនីយ៍ឯកតាន់ ចាយប្រធាននាយកដ្ឋាននគរបាលការពារបេតិកភណ្ឌ ។
នៅមុនការប្រារព្វពិធីក៏មានធ្វើពិធីបួងសួងក្រុងពាលីដែលប្រព្រឹត្តធ្វើទៅតាមគន្លងប្រពៃណី ទំនៀមទម្លាប់នៃ ព្រះពុទ្ធសាសនា ព្រះសម្មាសាម្ពុទ្ធ ព្រះបរមគ្រូនៃយើង ។ ក្នុងនោះដែរលោក លោកស្រី និង អស់លោកលោកស្រីលោកអាចារ្យក៏បានធ្វើពិធីឧទ្ទិសបួងសួងសូមនូវព្រះបារមីដ៏ស័ក្តសិទ្ធិ ដែលគង់ប្រថាប់ថែរក្សានៅលើទឹកដីប្រវត្តិសាស្ត្រអង្គរដ៏បវរនៃយើងក៏ដូចនៅក្នុង
កម្ពុជារដ្ឋទាំងមូល ព្រមទាំងបារមីព្រះអង្គចេកព្រះអង្គចម លោកយាយទេព តាដំបងដែក លោកតារាជ ព្រះអង្គតូច ព្រះអង្គធំ គង់នៅខ្នងភ្នំគូលែន និង បារមីអរុក្ខអរក្សអ្នកតាគ្រប់ទិសទី និង ទេវតាគង់ថែ រក្សានៅតាមប្រាង្គប្រាសាទនានា នៅលើទឹកដីដ៏ស័ក្តសិទ្ធិតាមជួយថែរក្សានូវថ្នាក់ដឹកនាំប្រទេសកម្ពុជា ព្រមទាំងកងកម្លាំងនគរបាលជាតិនិងប្រជាពលរដ្ឋភ្ញៀវជាតិអន្តរជាតិដែលបានអញ្ជើញចូលរួមនៃព្រឹត្តិការអង្គរសង្ក្រាន្តឆ្នាំ២០១៥ឲ្យជួបនូវតែសេចក្តីសុខសប្បាយនិងសុខសន្តិភាព មានការអភិវឌ្ឍន៍សេដ្ឋកិច្ចជាតិរីកចម្រើនតទៅអនាគត ។
ក្នុងការប្រកាសតែងតាំងមុខតំណែងនិងបំពាក់ឋានន្តរសក្តិដល់មន្ត្រីនគរបាលជាតិនៃអគ្គនាយកដ្ឋាននគរបាលការពារបេតិកភណ្ឌ ទាំង១០៩នាក់ ក្នុងនោះត្រូវបានតែងតាំងមុខតំណែមន្ត្រីនគរបាល ចំនួន១១នាក់ និងបានតម្លើងឋានន្តរសក្តិចំនួន៩៨នាក់ ក្នុងនោះថ្នាក់ អនុសេនីយ៍ឯក ៣០នាក់ ថ្នាក់អនុសេនីយ៍ទោ ២៩នាក់ ថ្នាក់អនុសេនីយ៍ត្រី២១នាក់និងថ្នាក់
ព្រឹន្ទបាលឯក១៨នាក់ផងដែរ។ ក្នុងនោះដែរក៏មានការប្រគល់នូវសម្ភារៈការិយាល័យម៉ូតូប្រដេញជូនដល់អង្គភាពគោលដៅទាំងបីនូវម៉ូតូកុំព្យូទ័រវិទ្យុទាក់ទងនិងបំពាក់អាវុធខ្លីផងដែរ ។
មានប្រសាសន៍សំណេះសំណាលនោះលោកឧត្តមសេនីយ៍ឯកតាន់ ចាយក៏បានលើកឡើងថាលទ្ធផលដែលយើងទទួលបានមកនេះពិតជាការខិតខំប្រឹងប្រែងយ៉ាងសកម្មរបស់មន្ត្រីនគរបាលយើងដែលបានអនុវត្តនូវបទបញ្ជារបស់នាយកដ្ឋានអង្គភាពការិយាល័យផ្នែកនិងប៉ុស្តិ៍។ ឯកឧត្តមក៏បានបន្តទៀតថាដើម្បីឆ្លើយតបឲ្យបានសក្តិសមទៅនឹង
ការយកចិត្តទុកដាក់របស់រាជរដ្ឋាភិបាលក្រសួងមហាផ្ទៃនិងអគ្គស្នងការដ្ឋាននគរបាលជាតិដែលទាក់ទងដល់នាយកដ្ឋាននគរបាលការពារបេតិកភណ្ឌនៃផែនការពង្រឹងដល់នគរបាលទេសចរណ៍ និងនគរបាលការពារបេតិកភណ្ឌដើម្បីលើកកម្ពស់កិត្តិយសរបស់កងកម្លាំង
នគរបាលជាតិនិងសកម្មចូលរួមក្នុងការអនុវត្តគោលនយោបាយទេសចរជាតិនិងការពារសម្បត្តិវប្បធម៌ បេតិកភណ្ឌវប្បធម៌ជាតិឲ្យបានគង់វង្ស ។ លោកតាន់ ចាយក៏បានលើកឡើងសូចនករមួយចំនួនដែលជាសសរស្តម្ភដ៏រឹងមាំដល់កម្លាំងនគរបាលការពារបេតិកភណ្ឌក្នុងការប្រតិបត្តិឲ្យបានជាប្រចាំនៅតាមគោលដៅចំណុចឈរជើងរបស់ខ្លួនក្នុងការការពារបេតិកភណ្ឌវប្បធម៌ប្រវត្តិសាស្ត្ររបស់ជាតិទាំងនៅលើដីក្រោមដីក្រោមទឹកឲ្យបានស្ថិតថេរគង់វង្សព្រមទាំងត្រូវចងចាំនូវសេចក្តីមិនប្រមាថក្នុងការងារទាំងឡាយដែលជាហេតុនាំឲ្យសម្រេចនូវ
ផលប្រយោជន៍គ្រប់សព្វយ៉ាង។ ក្នុងនោះឯកឧត្តមសង្កត់ធ្ងន់ផងដែរចំពោះមន្ត្រីនគរបាលការពារបេតិកភណ្ឌទាំងអស់ត្រូវបង្កើនយកចិត្តទុកដាក់ តាមដាននូវរាល់សកម្មភាពរបស់ភ្ញៀវខិលខូចមួយចំនួនដែលមានបំណងមិនល្អក្នុងការថតរូបភាពអាសអាភាសនៅតាមប្រាង្គប្រាសាទបុរាណយើងដែលធ្វើឲ្យប៉ះពាល់ដល់កិត្តនាមកិត្តិយសនៃវប្បធម៌ជាតិយើង។ ម្យ៉ាង
ទៀងមន្ត្រីយើងទាំងអស់ត្រូវធ្វើការប្តេជ្ញាធ្វើឲ្យតំបន់បេតិកភណ្ឌវប្បធម៌ ជាទីឋានសុខមនោរម្យនៃមនុស្សជាតិលើពិភពលោកផងដែរ។លោកតាន់ ចាយក៏បានធ្វើការផ្តាំផ្ញើដល់មន្ត្រីនគរបាលការពារបេតិកភណ្ឌទាំងបីអង្គភាពត្រូវគោរពនិងអនុវត្តឲ្យបាននូវភារកិច្ចដ៏ឧត្តុង្គឧត្តមគឺត្រូវចេះសាមគ្គីផ្ទៃក្នុងគោរពនូវតួនាទីភារកិច្ចរបស់ខ្លួនមានភាពអំណត់អត់់ធ្មត់ ឧស្សាហ៍ព្យាយាមបង្កើននូវការបណ្តុះបណ្តាលវិជ្ជាជីវៈចំណេះដឹងដោយខ្លួនឯងនិងរួមសហការឲ្យបានល្អជាមួយអាជ្ញាធរមូលដ្ឋាននិងកម្លាំងសមត្ថកិច្ចពាក់ព័ន្ធហើយក៏រក្សាឲ្យបានកត្តាទាំងបួនដែល
បានលើកឡើងដោយប្រកាន់ឲ្យបានខ្ជាប់ខ្ជួននិងបន្តប្រពៃណីរបស់អង្គភាពឲ្យកាន់តែរឹងមាំនិងជាទំនុកចិត្តរបស់ក្រសួងមហាផ្ទៃនិងអគ្គស្នងការដ្ឋាននគរបាលជាតិ។ដើម្បីអបអរសាទរនៅថ្ងៃបុណ្យចូលឆ្នាំថ្មីប្រពៃណីជាតិនាថ្ងៃខាងមុខ ឧត្តមសេនីយ៍ឯកតាន់ ចាយក៏ បានរៀបចំពិធីបាយសាមគ្គីជាមួយបងប្អូនមន្ត្រីនគរបាលការពារបេតិកភណ្ឌក្នុងភាពសប្បាយរីករាយក្រៃលែងផងដែរ៕ដោយគឿនវ៉េត
