> បាត់ដំបង: មានការភ្ញាក់ផ្អើលយ៉ាងខ្លាំងពីសំណាក់ប្រជាពលរដ្ឋ ក៏ដូចជាសមត្ថកិច្ច រហូតដល់
> កំលាំងបង្ការ ពន្លត់អគ្គីភ័យខេត្ត កាលពីវេលាម៉ោង8,30នាទីយប់ ថ្ងៃទី8-3-15 បន្ទាប់ពីមាន
> សេចក្តីរាយការណ៍ថាមានអគ្គីភ័យមួយបាន និងកំពុងឆាបឆេះអនុវិទ្យាល័យអូរដំបង1 ដែលស្ថិត
> ក្នុងភូមិ វត្តតាមិម ឃុំអូរដំបង1 ស្រុកសង្កែ ខេត្តបាត់ដំបង រួចមក ។
> លោកគឹម ប៊ុនធឿន នាយការិយាល័យ ពន្លត់អគ្គីភ័យ នៃស្នងការដ្ឋាននគរបាលខេត្ត
> បានបញ្ជាក់ថា នៅមុនពេលកើតហេតុមានទូរស័ព្ទមួយខ្សែ បានរាយការថា មានភ្លើងកំពុងឆាបឆេះនៅក្នុងសាលាអនុវិទ្យាល័យ ភ្លាមៗនោះលោកបានរៀបចំកំលាំងយ៉ាងប្រញ៉ាប់ប្រញ៉ាល់ដើម្បីចេញប្រតិបត្តិការ
> ដោយនៅពេលនោះដែរក៏មានប្រជាពលរដ្ឋ ក៏ដូចជាសមត្ថកិច្ចមូលដ្ឋានបានចេញឆ្ពោះទៅចំនុចកើតហេតុដើម្បីជួយទប់ស្កាត់សភាពការ ប៉ុន្តែនៅពេលទៅដល់ស្រាប់តែគេឃើញមានតែផ្សែងហុយៗចេញពី
> គំនរសំរាមដែលសាលាបានចាក់ចោលនៅខាងក្រោយសាលាទៅវិញ ធ្វើអោយអ្នកដែលចង់ដឹងអំពីព្រឹត្តិហេតុនេះមានការខកចិត្តយ៉ាងខ្លាំង និងគ្រវីក្បាលដោយការហួសចិត្ត។
> ប៉ុន្តែបើយោងតាមសំដីរបស់ប្រជាពលរដ្ឋដែលមានលំនៅដ្ឋាននៅក្បែទីនោះបានលើកឡើងថា
> ពួកគាត់មានការភិតភ័យយ៉ាងខ្លាំងនៅពេលដែលឃើញគំនរសំរាមនោះចាប់ផ្តើមឆេះ ព្រោះសំរាមនៅទីនោះវាច្រើនពេក ដែលបានមកពីការប្រមូលពីក្នុងទីធ្លាសាលា មកពីការហូបចុករបស់សិស្ស និង បានមកពីអ្នកលក់ចំណីអាហារនៅក្នុងសាលា ហើយការចាក់ចោលនេះវាស្ថិតនៅក្បែនឹងជញ្ជាំងសាលាហើយក៏នៅក្បែនឹងផ្ទះប្រជាពលរដ្ឋផងដែរ ដោយឃើញដូច្នេះទើបពួកគាត់សំរេចចិត្តទូរស័ព្ទរាយការ
> ទៅកំលាំងអគ្គីភ័យខេត្តដើម្បីមកជួយអន្តរាគមន៍ ជៀសវាងការឆេះរាលដាលកាន់តែធំវានាំតែពិបាក។ដោយឃើញបែបនេះទើបកំលាំងជំនាញបានដាក់ទឹកបាញ់បង្ហូរដើម្បីអោយភ្លើង ផ្សែងនេះរលត់។ពាក់ព័ន្ធទៅនឹងគំនរសំរាមនេះដែរលោក ពិន សារេត នាយកសាលាអនុវិទ្យាល័យអូរដំបង1បានបញ្ជាក់ប្រាប់កម្ពុជាថ្មីថា លោកក៏មានការព្រួយបារម្ភដែរ នៅពេលដែលមានរឿងកើតឡើងបែបនេះ
> ដោយសារតែកន្លងមកក្រុមហ៊ុនសុិនទ្រី មិនដែលបានចុះទៅដល់សាលាដើម្បីទំនាក់ទំនងទាល់តែសោះដូច្នេះហើយបានជាលោកចេះតែទុកបណ្តោយអោយគេចាក់សំរាមនៅត្រង់ហ្នឹងព្រោះនៅទីនោះ> ដីវាមានសភាពក្រឡុកជ្រៅអាចធ្វើជាកន្លែងចាក់សំរាមបាន ប៉ុន្តែដល់ពេលដែលមានបញ្ហាបែបនេះគឺលោកបានទាក់ទងទិញដីអោយគេដឹកមកដើម្បីចាក់លុបទីនេះអោយអស់ រួចទើបចាន់ផ្តើម
> អោយគេសាងសង់ជាឡ សំរាប់ដុតសំរាមដែលប្រមូលបានវិញ ជៀសវាងការដុតពាសវាលពាសកាលវានាំអោយមានផ្សែងប៉ះពាល់ដល់ការសិក្សារបស់សិស្ស។ លោកក៏បានទទួលស្គាល់ដែរអំពីកំហុសទាំងនេះ ហើយការហៅរថយន្តពន្លត់អគ្គីភ័យខេត្តនេះគឺរូបលោកផ្ទាល់ជាអ្នកហៅបើមិនដូច្នេះទេភ្លើងវាអាចរាលដាលកាន់តែធំ។នៅទីបំផុតភ្លើងក៏បានរលត់ទៅវិញដោយសារតែការទប់ស្កាត់របស់កំលាំងសមត្ថកិច្ចជំនាញ៕
