សមាជិកសភា នៃគណបក្ស កាន់អំណាច របស់កូរ៉េខាងត្បូង បានធ្វើការ ដោះដូរ មតិយោបល់ គ្នាថា តើត្រូវទទួលយក ប្រព័ន្ធការពារគ្រាប់មីស៊ីល របស់អាមេរិក មកបំពាក់នៅ ក្នុងប្រទេស អាស៊ីបូព៌ា មួយ នេះដែរ ឬទេ ឆ្លើយតបចំពោះការគម្រាម កំហែងពីការអភិវឌ្ឍអាវុធ នុយក្លេអ៊ែរ និង គ្រាប់មីស៊ីល របស់កូរ៉េខាងជើង គ្រប់ពេលវេលានោះ។
ទីភ្នាក់ងារព័ត៌មានចិនស៊ិនហួ ចេញផ្សាយនូវសម្តីរបស់លោក យូ សឿងមីន ប្រធានប្រចាំការ នៃគណបក្ស កាន់អំណាច សែណឺរី នៅថ្ងៃចន្ទ ទី០៩ ខែមីនា នេះថា “ទស្សននានា ជុំវិញការ ដាក់ប្រព័ន្ធការពារ គ្រាប់មីស៊ីល THAAD នៅតំបន់ឧបទ្វីបកូរ៉េនោះ ត្រូវបានដោះដូរគ្នាទៅវិញ ទៅមកនៅក្នុងបក្សនេះ។ សម្រាប់ខ្លួនខ្ញុំផ្ទាល់ ក៏បានអះអាងរួចមកហើយ អំពីតម្រូវការសម្រាប់ ការដាក់ប្រព័ន្ធការពារមីស៊ីល ក្នុងរយៈពេលវែងនៅប្រទេសនេះ។”
គួរបញ្ជាក់ផងដែរថា ប្រព័ន្ធការពារមីស៊ីលឈ្មោះ THAAD គឺស្ថិតនៅក្នុងគោលដៅការពារ សន្តិសុខកម្រិត ខ្ពស់បំផុត ដែលបង្កើតឡើងដោយក្រុមហ៊ុន Lockheed Martin មានមូលដ្ឋាន ផ្ទាល់នៅ ឯសហរដ្ឋអាមេរិក។ THAAD មានលទ្ធភាពក្នុងការទប់ទល់នឹងគ្រាប់មីស៊ីលទាំង ឡាយនៅឯរយៈកម្ពស់ពី ៤០ ទៅ ១៥០ គីឡូម៉ែត្រ។ សម្រាប់សេចក្តីសម្រេចជាថ្មីស្តីពីការ បំពាក់ THAAD នៅកូរ៉េខាងត្បូង គណបក្សសែណឺរីនឹងធ្វើការសម្រេចនៅចុងខែមីនា៕
