ខេត្តកំពង់ឆ្នាំង៖ កម្លាំងនគរបាល នៃស្នងការដ្ឋាន ខេត្តកំពង់ឆ្នាំង សហការណ៍ជាមួយកម្លាំង នគរបាលនៃអធិការដ្ឋានក្រុងកំពង់ឆ្នាំង ប៉ុស្តិ៍រដ្ឋបាលសង្កាត់កំពង់ឆ្នាំង អាជ្ញាធរមូលដ្ឋានភូមិ-ឃុំ បានចុះបង្ក្រាបបទល្មើសគ្រឿងញៀន នៅផ្ទះសំណាក់សាន់ដេ២ ស្ថិតក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។
ប្រភពព័ត៌មានពីសមត្ថកិច្ច បានអោយដឹងថា ដោយទទួលបានសេចក្តីរាយការណ៍ ពីម្ចាស់ផ្ទះសំណាក់សាន់ដេ២ ស្ថិតក្នុងភូមិ ឃុំខាងលើ ថា មានបទល្មើសប្រើប្រាស់គ្រឿងញៀនកើតឡើង នៅក្នុង ផ្ទះសំណាក់របស់ខ្លួន ក្នុងបន្ទប់លេខ៤០ កម្លាំងសមត្ថកិច្ច ក៍បានសហការណ៍គ្នា ចុះទៅបង្ក្រាបដល់ទីកន្លែងតែម្តង ។
ក្នុងការប្រតិបត្តិការបង្ក្រាបខាងលើ សមត្ថកិច្ច ឃាត់ខ្លួនបានជនសង្ស័យចំនួន២នាក់ ១-ឈ្មោះ ទន វាសនា ភេទប្រុស អាយុ៣១ឆ្នាំ រស់នៅក្រុងកំពង់ឆ្នាំង និង ២-ឈ្មោះ ចាំង បូរ៉ា ភេទស្រី អាយុប្រមាណ២៧ឆ្នាំ រស់នៅខេត្តកំពង់ធំ និងវត្ថុតាងថ្នាំញៀន១កញ្ចប់ធំ និង១៥កញ្ចប់តូច ឧបករណ៍សម្រាប់ប្រើប្រាស់គ្រឿងញៀនមួយចំនួន វិទ្យុទាក់ទង១គ្រឿង ចង្ក្រានហ្គាស១ និងបារីហ្វីន១កញ្ចប់ ។
បច្ចុប្បន្នជនល្មើសទាំងពីរនាក់ រួមវត្ថុតាង ត្រូវបានសមត្ថកិច្ច បញ្ជូនទៅកាន់ស្នងការដ្ឋាន នគរបាលខេត្តកំពង់ឆ្នាំង ដើម្បីកសាងសំណុំរឿង បញ្ជូនខ្លួនទៅតុលាការ ចាត់ការទៅតាមនីតិវិធី ៕