អំពើឃាតកម្មដ៏គួរឲ្យរន្ធត់មួយបានកើតឡើងនៅភូមិគគីរ ឃុំកក់ ស្រុកពញាក្រែក ដែលស្ត្រីមេម៉ាយម្នាក់ត្រូវបានជនមិនស្គាល់មុខវាយសម្លាប់ និងអូសទៅចង.កក្នុងអណ្តូងចាស់ខាងក្រោយផ្ទះជាមួយនឹងឬសឈីនៅមាត់អណ្តូង និងចៅប្រុសម្នាក់អាយុ២ឆ្នាំ ត្រូវជនល្មើសវាយរហូតសន្លប់ទុកចោលនៅលើផ្ទះ។
តាមព័ត៌មានពីអធិការដ្ឋាននគរបាលស្រុលបានឲ្យដឹងដា ជនរងគ្រោះមានឈ្មោះ វិត វ៉ាន់ ភេទស្រី អាយុ៤០ឆ្នាំ និងចៅប្រុសម្នាក់អាយុ២ឆ្នាំ មានទីលំនៅក្នុងភូមិគគីរ ស្រុកពញាក្រែក ខេត្តត្បូងឃ្មុំ។ រីឯប្រភពពីប្រជាពលរដ្ឋនៅក្នុងភូមិបានឲ្យដឹងថា នៅវេលាម៉ោងប្រហែល១០ ទៅ១១យប់ថ្ងៃទី៧ ខែមិនា ឆ្នាំ២០១៥ គេបានលឺសម្លេងក្មេងប្រុសរងគ្រោះស្រែកយំចំនួន២លើក ប៉ុន្តែពុំមានអ្នកណាចាប់អារម្មណ៍នោះទេ ព្រោះនាំគ្នាគិតថាស្ត្រីរងគ្រោះវាយចៅរបស់ខ្លួន។
លុះព្រឹកឡើងថ្ងៃទី៨ ខែមិនា ឆ្នាំ២០១៥ ជីតាឪពុកក្មេងរងគ្រោះបានឡើងទៅលើផ្ទះក៏ស្រាប់តែឃើញក្មេងប្រុសកំពុងសន្លប់ ក៏បានផ្ទើលឆោឡោថា ស្ត្រីរងគ្រោះដែលជាយាយបានវាយចៅរហូតដល់សន្លប់ ហើយគេចខ្លួនមិនដឹងទៅណា ក៏នាំអ្នកភូមិដើររកស្ត្រីរងគ្រោះដែលជាយាយ រហូតដល់អណ្តូងខាងក្រោយផ្ទះក៏ប្រទះឃើញសាកសពស្ត្រីរងគ្រោះចង.កនៅក្នុងអណ្តូង និងបានធ្វើការប្តឹងដល់សមត្ថកិច្ច ដើម្បីចុះមកពិនិត្យសាកសព។
ក្រោយពីធ្វើកោសល្យវិច្ច័យរួចមកឃើញថា ស្ត្រីរងគ្រោះមិនមែនស្លាប់ដោយសារចង,កនៅទេ គឺត្រូវគេវាយសម្លាប់ រួចអូសយកទៅចង.កនៅក្នុងអណ្តូងនោះ។ បច្ចុប្បន្នសមត្ថកិច្ចកំពុងចងក្រងវត្ថុតា និងសំណុំរឿង ដើម្បីស៊ើបអង្កេតឈានទៅរកមុខជនល្មើសយកមកផ្តន្ទាទោសតាមផ្លូវច្បាប់ឲ្យខាងតែបាន។
