> បាត់ដំបង: បក្ខពួកចោរចំនួន3នាក់ដែលជាមុខសញ្ញាដ៏សកម្មក្នុងការដើរលួចគោរបស់ប្រជាពលរដ្ឋដើម្បីភ្លាសយកសាច់ ត្រូវបានអស់លក្ខណ៍នៅក្នុងភូមិសាស្ត្រទឹកដីស្រុកបាណន់ ខេត្តបាត់ដំបងបន្ទាប់ពីពួកគេបានធ្វើសកម្មភាព ភ្លាសគោចំនួនពីរក្បាលរបស់ប្រជាពលរដ្ឋដែលរស់នៅភូមិបឹងចែងឃុំស្នឹង ស្រុកបាណន់ កាលពីពីថ្ងៃទី 10-3-15 វេលាម៉ោង00,46នាទីរំលងអធ្រាតរួចមក។គួរបញ្ជាក់ថា កន្លងមកនៅតាមបណ្តាស្រុកមួយចំនួន ក្នុងខេត្តបាត់ដំបង គឺតែងតែមានករណីលួចគោដើម្បីភ្លាសយកសាច់ បានកើតឡើងជាញឹកញាប់ ដោយបន្សល់នៅតែក្បាល ឆ្អឹងនិងស្បែកតែប៉ុណ្ណោះ សំរាប់ទុកអោយម្ចាស់គោវិញ ហើយក៏គេមិនដែលឃើញសមត្ថកិច្ចស្រុកណាមួយធ្វើការបង្ក្រាបបានម្តងណានោះឡើយ ។\
> ដោយសារតែបញ្ហាចោរកម្មនេះបានកើតឡើងញឹកញាប់ខ្លាំងពេក ទើបលោកស្នងការខេត្ត
> បានដាក់បទបញ្ជាយ៉ាងតឹងរុឹងទៅលើមន្ត្រីនគរបាលទាំងអស់ ពិសេសគឺលោកស្នងការរង ជេត វណ្ណនីដើម្បីដាក់ផែនការអោយបានច្បាស់លាស់ក្នុងការតាមប្រមាញ់មុខសញ្ញាទាំងនេះអោយបាន។នៅពេលរំលងអធ្រាតមុនពេលកើតហេតុ លោកសាន ស៊ាប អាយុ32ឆ្នាំ រស់នៅភូមិ
> បឹងចែង ឃុំស្នឹង បានបាត់មេគោចំនួនពីរក្បាលពីផ្ទះដោយមេគោទាំងពីរនោះសុទ្ធតែផើមទាំងអស់ភ្លាមៗនោះដែរម្ចាស់គោបានរាយការយ៉ាងបន្ទាន់ទៅកំលាំងសមត្ថកិច្ចដើម្បីអោយជួយអន្តរាគមន៍។ក្រោយពីទទួលបានព័ត៌មាននេះភ្លាមលោក ប៊ុត សំបូរ អធិការនគរបាលស្រុកបាណន់បានចាត់កំលាំងចេញប្រតិបត្តិការគ្រប់ច្រកល្ហកដើម្បីតាមរក
មុខសញ្ញាដែលសង្ស័យ ប៉ុន្តែក្នុងការរុករកនេះគឺបានប្រទះឃើញតែក្បាលគោ ឆ្អឹងគោ និងស្បែកគោតែប៉ុណ្ណោះ ស្ថិតនៅត្រង់ចំនុចអូរប្រកែក ក្នុងភូមិសំបួរមាស ឃុំស្នឹងដែលក្រុមចោរបានបន្សល់ទុកអោយ។
> ស្របពេលជាមួយគ្នានោះដែរ កំលាំងមួយចំនួនបានឃាត់រថយន្តមួយគ្រឿងដែលមានការសង្ស័យ នៅត្រង់ចំនុចឃុំកន្ទឺ2 តាមបណ្តោយផ្លូវក្បែមាត់ស្ទឹងសង្កែ ដោយរថយន្តនោះម៉ាកកាមរីស៊ែរីឆ្នាំ89 ព៌ណទឹកប៊ិចចាស់ ពាក់ស្លាកលេខ ង9629 ភព2ដែលអ្នកបើកបរមានឈ្មោះ ឈិត ឌីណូ ភេទប្រុស អាយុ35ឆ្នាំ រស់នៅភូមិថ្មី ឃុំត្រាង ស្រុកកំរៀងដើម្បីនាំយកមកសាកសួរ។
> លោកអធិការបានលើកឡើងបន្ថែមថា នៅចំពោះមុខសមត្ថកិច្ច អ្នកបើកបររូបនេះមិនបានសារភាពអ្វីឡើយ ប៉ុន្តែជាចៃដន្យ ស្រាប់តែទូរស័ព្ទរបស់ជននេះបានបន្លឺឡើង ទើបតំរូវអោយសមត្ថកិច្ចចាប់យកមកទទួលដើម្បីបន្លំសំលេងនិងចង់ដឹងការពិត ពេលនោះដែរបក្ខពួករបស់គេបានហៅអោយអ្នកបើកបររថយន្តរូបនេះទៅទទួលពួកគេនៅចំនុចខាងជើងភ្នំចាក់អង្កាម ដែលមានចំងាយពីកន្លែងភ្លាសសាច់ប្រហែល1km ក្នុងភូមិសាស្ត្រភូមិសំបួរមាស។
> គ្រាន់តែឮប្រព័ន្ធទូរស័ព្ទម្ខាងបានបញ្ជាក់អំពីទីតាំងយ៉ាងច្បាស់បែបនេះភ្លាម សមត្ថកិច្ច
> បានយករថយន្តបង្កនោះបើកឆ្ពោះទៅរកបក្ខពួកវានៅកន្លែងណាត់តែម្តង លុះនៅពេលទៅដល់គ្រាន់តែឃើញរថយន្តគ្នាវាភ្លាមក្រុមចោរចំនួនពីរនាក់ បានលីសែងសាច់គោដែលពួកគេភ្លាសបានដើរតំរង់មករករថយន្ត ដែលធ្វើអោយសមត្ថកិច្ចស្ទុះចេញទៅក្របួចមុខសញ្ញាទាំងនេះភ្លាម ប៉ុន្តែមានម្នាក់បានខំប្រឹងរត់ដើម្បីគេចខ្លួនរហូតធ្វើអោយគ្រិច កជើងម្ខាង។
> ជនទាំងពីរនាក់នោះមានឈ្មោះ ចាន់ ប៊ុន ភេទប្រុស អាយុ47ឆ្នាំ រស់នៅភូមិត្រាំសេះ
> ឃុំបត់កណ្តោល ស្រុកបាកាន ខេត្តពោធិសាត់ និងឈ្មោះមេត ធី ហៅហ៊ាត ភេទប្រុស អាយុ40ឆ្នាំជាជនជាតិខ្មែរអុីស្លាម រស់នៅក្រុងប៉ោយប៉ែត ដែលស្នាក់នៅបណ្តោះអាសន្នក្នុងក្រុងបាត់ដំបងនៅចំពោះមុខសមត្ថកិច្ច ក្រុមទាំងនេះបានសារភេពថា កន្លងមកពួកគេធ្លាប់បានប្រព្រឹត្តនៅក្នុងស្រុក
> ព្រះនេត្រព្រះ ក្នុងខេត្តបន្ទាយមានជ័យ នៅស្រុកមោងឫស្សី និងនៅក្នុងស្រុកបាណន់។
> លោកវរ:សេនីយ៍ឯក ជេត វណ្ណនី ស្នងការរងនគរបាលយុត្តិធ៌ម បានលើកឡើងថា ដុំ:ពេលជិតមួយឆ្នាំហើយដែលសមត្ថកិច្ចទាំងអស់បានខិតខំប្រឹងប្រែង ព្យាយាមតាមប្រមាញ់ក្នុងរឿងនេះប៉ុន្តែមិនដែលបានទាន់នូវសកម្មភាពរបស់ក្រុមនេះទាល់តែសោះ លុះនៅថ្ងៃកើតហេតុខាងលើ
> លោកក៏បានចូលរួមដឹកនាំ និងបញ្ជាកំលាំង ព្រោះលោកគិតថា ក្រុមនេះគឺមិនទាន់ទៅណាឆ្ងាយនោះឡើយ នៅទៅបំផុតក៏បានក្រសោបដោយជោគជ័យ ដើម្បីបញ្ជូនខ្លួនក្រុមនេះទៅទទួលទោសនៅតុលាការ។
