ខេត្តព្រះវិហារ
តាមសេចក្ដីរាយការណ៍ពីតំបន់ព្រំដែនប្រាសាទព្រះវិហារបានអោយដឹងថាបនល្បែងស៊ីសងខុសច្បាប់ទ្រង់ទ្រាយធំមួយកន្លែងកំពុងបើកលេងគគ្រឹកគគ្រេងស្ថិតនៅក្នុងបរិវេណទីបញ្ជាការវរសេនាតូចអន្តរាគមន៍លេខ៣៨២ស្ថិតនៅភូមិបង្គោលប្រាំបីឃុំស្រអែមស្រុកជាំក្សាន្តដោយទាក់ទាញអ្នកញៀនល្បែងខ្ទង់រយនាក់ក្នុង១ថ្ងៃៗទៅលេងនៅទីនោះ។
ប្រជាពលរដ្ឋរស់នៅក្នុងមូលដ្ឋានបានរាយការណ៍ប្រាប់អ្នកសារព័ត៌មានអោយដឹងថាបនល្បែងស៊ីសងទ្រង់ទ្រាយធំៗអាចកើតមានទ្បើងដោយសារតែអាជ្ញាធរដែនដីឃុបឃិតគ្នាជាមួយមេបនល្បែងស៊ីសងផ្ទាល់តែម្ដងព្រោះចង់បានលាភសក្ការបង់ថ្លៃការពារសន្ដិសុខក្នុងមូលដ្ឋានប្រចាំខែចាប់ពី១លានរៀលទ្បើងទៅក្នុង១អង្គភាពសមត្ថកិច្ចជាថ្នូអនុញ្ញាតបើកអោយលេងដោយសេរី។
ប្រជាពលរដ្ឋបានលើកទ្បើងថាអោយតែឮកើតមានបនល្បែងស៊ីសងខុសច្បាប់នៅក្នុងតំបន់ពួកគាត់រស់នៅហើយគឺពួកគាត់នឹងក្លាយជាជនរងគ្រោះនៅពេលណាមួយអាចកើតមានអំពើហិង្សាក្នុងគ្រួសារនិងសង្គម។ពិសេសមានការព្រួយបារម្ភយ៉ាងខ្លាំងទាំងយប់ទាំងថ្ងៃចំពោះការកើតមានចោរកម្មលួចឆក់ប្លន់ទ្រព្រសម្បត្តិនៅតាមមូលដ្ឋាន។
ប្រភពព័ត៌មានពីសមត្ថកិច្ចដែលស្និទ្ធស្នាលជាមួយអ្នកសារព័ត៌មានបានអោយដឹងថាបនល្បែងស៊ីសងខុសច្បាប់ទ្រង់ទ្រាយធំខាងលើរួមមានយូគី,អាប៉ោងនិងសង្វៀនបញ្ជល់មាន់ខ្នាយដែកដែលក្រុមអ្នកចូលលេងសុទ្ធតែមានជីវភាពធូរធារមានទឹកលុយធំទើបអាចហ៊ានចូលទៅលេងល្បែងនៅទីនោះជាមួយនឹងគេបាន។ល្បែងស៊ីសង៣ប្រភេទនេះចាក់ភ្នាល់ក្នុងម្នាក់ៗរាប់រយដុល្លារអាមេរិកទ្បើងទៅ។
ប្រភពព័ត៌មានដដែលបានបង្ហើបអោយដឹងថាមេបនល្បែងឈ្មោះគង់មកពីខេត្តកំពង់ចាមបានម៉ៅការបង់ជួលទីតាំងដើម្បីបើកបនល្បែងចំនួន៤ពាន់ដុល្លារអាមេរិកក្នុង១ខែសំរាប់ល្បែងយូគី,អាប៉ោងនិងសង្វៀនបញ្ជល់មាន់។បើគិតបូកសរុបកញ្ចប់លុយចំណាយបង់អោយអាជ្ញាធរដែនដីថែមទៀតគឺម្ចាស់បនល្បែងត្រូវចំណាយប្រមាណ៨ពាន់ដុល្លារអាមេរិកក្នុង១ខែឯណោះ។
អ្នកសារព័ត៌មានមិនអាចជួបទំនាក់ទំនងសុំការបំភ្លឺពីប្រធានអង្គភាពវរសេនាតូចអន្តរាគមន៍លេខ៣៨២បានទេពាក់ព័ន្ធទៅនឹងសេចក្ដីរាយការណ៍ព័ត៌មានខាងលើនេះដោយសារតែខំព្យាយាមស្រាវជ្រាវរកលេខទូរស័ព្ទរបស់គាត់មិនបាន។
Ads
