ខេត្តសៀមរាប៖ កម្លាំងរដ្ឋបាលព្រៃឈើខាងជើងបឹងទន្លេសាប និងរដ្ឋបាលព្រៃឈើខេត្តដែលដឹកនាំដោយលោក ជួន សុបញ្ញា ព្រះរាជអាជ្ញារងអមសាលាដំបូងខេត្តសៀមរាបបានធ្វើសកម្មភាពឆ្មក់ចាប់រថយន្តម៉ាកនីសាន់ណាវ៉ារ៉ាពណ៌ខ្មៅមួយគ្រឿងដឹកឈើគ្រញូងល្មើសច្បាប់
បំរ៉ុងឆ្លងដែនទៅរកទីផ្សារដែលមានតម្លៃខ្ពស់នៅក្នុងដីឡូត៍មួយកន្លែង នៅវេលាម៉ោង៧ព្រឹកថ្ងៃទី១០ខែមិនាឆ្នាំ២០១៥ស្ថិតនៅតាមផ្លូវលំ ក្នុងភូមិទ្រាំង សង្កាត់ស្លក្រាម ក្រុងសៀមរាប។
លោក ម៉ុង ប៊ុនលីម នាយផ្នែករដ្ឋបាលព្រៃឈើបន្ទាយស្រីបានប្រាប់ តាមទូរស័ព្ទនៅព្រឹកថ្ងៃទី១០ខែមិនានេះថា កម្លាំងជំនាញរដ្ឋបាលព្រៃឈើ ដែលដឹកនាំផ្ទាល់ដោយលោក ឯម មុន្នី នាយរងអធិការដ្ឋានខាងជើងបឹងទន្លេសាប និងផ្នែករដ្ឋបាលព្រៃឈើបន្ទាយស្រី និងសង្កាត់រដ្ឋបាលព្រៃឈើបាគង ក្រោមការបញ្ជារផ្ទាល់ដោយលោក ជួន សុបញ្ញា ព្រះរាជអាជ្ញារងអមសាលាដំបូងខេត្តសៀមរាប។លោកបន្តថា ការចុះបង្ក្រាបរថយន្តដឹកឈើប្រណិតប្រភេទគ្រញូងខុសច្បាប់ចំនួន១គ្រឿងនេះ កម្លាំងជំនាញបានដកហូតឈើគ្រញូងចំនួន១១៥ដុំស្មើនឹង០,៥៦ម៉ែត្រគូប ស្មើនឹង៦៧២គីឡូក្រាមនិងរថយន្តម៉ាកនីសាន់ណាវ៉ារ៉ាពណ៌ខ្មៅមួយគ្រឿង គ្មានស្លាកលេខ។ លោកបន្ថែមថា ក្នុងប្រត្តិបត្តិនោះទទួលបានជោគជ័យ ដោយសារកម្លាំងជំនាញទទួលបានព័ត៌មានច្បាស់ការ ទើបសហការធ្វើការបំបែកករណីនេះបានសម្រេច ប៉ុន្តែដោយសារកម្លាំងជំនាញរវល់ឆែកឆេរឡាន ទើបធ្វើឲ្យជនល្មើសចំនួន៣នាក់គេចខ្លួនបាត់ភ្លាមៗតែម្តង ។លោកបន្ថែមទៀតថា វត្ថុតាងទាំងអស់ត្រូវបានកម្លាំងជំនាញប្រមូលយកទៅរក្សាទុកនៅស្នាក់ការផ្នែករដ្ឋបាលព្រៃឈើបន្ទាយស្រី ក្នុងឃុំព្រះដាក់ ស្រុកបន្ទាយស្រី ខេត្តសៀមរាប។
ជំនួញឈើគ្រញូង ល្មើសច្បាប់ត្រូវបានគេមើលឃើញថា កំរើកឡើងវិញ ហើយឈើគ្រញូងទាំងនោះមានប្រភពចេញពីតំបន់ជួរភ្នំដងរែក ក្នុងខេត្តឧត្តរមានជ័យឆ្លងកាត់តាមខេត្តសៀមរាប ឆ្ពោះទៅកាន់តំបន់ព្រំដែន ដែលមានតម្លៃខ្ពស់កប់ពពក ហើយជំនួញដ៏ស្រួចស្រើបមួយនេះត្រូវបានគេលាក់ការយ៉ាងជិត ដោយមានអ្នករត់ការជាសមត្ថកិច្ចឡេមឡឺមមួយចំនួនផងដែរ ទើបធ្វើឲ្យក្រុមឈ្មួញទាំងនោះទទួលបានជោគជ័យក្នុងរបរល្មើសច្បាប់របស់ពួកគេ៕
