ជនរងគ្រោះ១ក្នុងចំនោម២នាក់បានរងគ្រោះបាក់ចង្កេះ និងបែកប្រដាប់ភេទ ក្នុងហេតុការណ៍គ្រោះថ្នាក់ចរាចរមូយ រថយន្តយីឌុបបុកម៉ូតូអូសជាង១០០ម៉ែត្រ កាលពីយប់ថ្ងៃទី ០៩ មីនា ២០១៥ នៅចំនុចកណ្តាលទីរួមក្រុងសិរីសោភ័ណ លើកំណាត់ផ្លូវជាតិលេខ៦ ត្រង់ផ្លូវបំបែកជាបួនទៅកាន់ខេត្តសៀមរាប ។
តាមសាក្សី ដែលឃើញហេតុការណ៍បានអោយដឹងថា រថយន្តដឹងទំនិញធនយីឌុបក្បាលពីបៃតងខ្ចី ពាក់ស្លាកលេខ ភ្នំពេញ 3A 3069 បើកក្នុងល្បឿនលឿនពីលិចទៅកើត សំដៅទៅខេត្តសៀមរាប លុះដល់ចំនុចកើតហេតុក៏បុកម៉ូតូមួយគ្រឿងម៉ាកស្មាស ពណ៌ខ្មៅពាក់ស្លាកលេខ សៀមរាប 1D 9753 ជិះគ្នា២នាក់ បណ្តាលអោយអ្នកបើកម៉ូតូរងរបួសបាក់ឆ្អឹងចង្កេះ និងបែកប្រដាប់ភេទ ខ្ទាតទៅខាងជើងនៃផ្លូវ ចំណែកម្នាក់ទៀតដែលជាអ្នករួមដំណើរក្រោយពីរថយន្តបុកបានស្ទុះងើបរត់តាមផ្លូវលេខ៣តែម្តង ។ រីឯម៉ូតូជនរងគ្រោះភាបជាប់ពីក្រោមក្បាលរថយន្ត អូសទៅមុខ១៥០ម៉ែត្រ និងបន្តទៅបុកគ្រែចំនួនមួយដែលទុកនៅលើចំណីថ្នល់ ទើបទៅមុខលេងរួច ។ សាក្សីបន្តអោយដឹងទៀតថា មុននិងរថយន្តទៅមុខលេងរួម គេឃើញតៃកុង និងព្រូរថយន្តយីឌុបបើកទ្វារលោតរត់បាត់ស្រមោលបណ្តោយអោយរថយន្តទៅមុខដោយខ្លួនឯង ។
ក្នុងហេតុការណ៍នេះ សមត្ថកិច្ចប៉ូលីសចរាចរជើងគោកនៃស្នងការនគរបាលខេត្តបន្ទាយមានជ័យ ពុំទាន់បានធ្វើការសន្និដ្ឋានជាក់លាក់នៅឡើយទេ គឺគ្រាន់តែធ្វើការវាស់វែង និងនាំជនរងគ្រោះទៅមន្ទីពេទ្យ និងនាំយករថយន្តមករក្សាទុកនៅស្នងការ ៕
