សៀមរាប នៅក្រុងសៀមរាបនាព្រឹកថ្ងៃទី ១០ ខែ មីនា ឆ្នាំ២០១៥នេះ ព្រះសង្ឃ គណៈអភិបាលខេត្ត ថ្នាក់ដឹកនាំមន្ទីរ មន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ សិស្ស និស្សិត គរុសិស្ស និង បងប្អូនអាជីវករ ប្រជាពលរដ្ឋ ប្រមាណជាង៣ពាន់នាក់បាននិមន្តនិង
អញ្ជើញចូលរួមក្នុងការអបអរសាទរ ដែលក្រុងសៀមរាបបានទទួលបានជ័យលាភី ទីក្រុងស្អាត (ផ្ការំដួលបីទង) ដែលប្រព្រឹត្តធ្វើទៅ ក្រោមអធិបតីភាពឯ.ឧ ឃឹម ប៊ុនសុង អភិបាលនៃគណៈអភិបាល ខេត្តសៀមរាប នៅសួនច្បារមុខសណ្ឋាគារមហាអង្គរ ។
ក្នុងកិច្ចស្វាគមន៍របស់លោក សូរ ប្លាតុង អភិបាលនៃគណៈអភិបាលក្រុងសៀមរាប ក៏បានលើកឡើងថា ខេត្ត សៀមរាប គឺជាតំបន់រមណីយដ្ឋានវប្បធម៌ដ៏សម្បូរបែប នៅក្នុងតំបន់អាស៊ី ក៏ដូចនៅលើពិភពលោកផងដែរ ។ ដោយកត្តា នេះហើយ ទើបគណៈកម្មាធិការជាតិបានវាយតម្លៃទីក្រុងស្អាត និង រៀបចំទិវាជាតិទីក្រុងស្អាតជាលើកទី៣ ក្រោមប្រធានបទ(ជោគជ័យទីក្រុងស្អាតជោគជ័យទេសចរណ៍។លោកក៏បានបន្តទៀតថា នេះជាកិត្តិយសរបស់ខេត្តប្រវត្តិសាស្ត្រនៃយើងក្នុងចំណោមទីក្រុងស្អាតទាំង០៥ចំណាត់ផ្ការំដួលបីទង ទូទាំងព្រះរាជាណាចក្រកម្ពុជា ក្នុងនោះក៏មានខេត្តសៀមរាបផងដែរ ។
ដើម្បីអបអរសាទរ(ទិវាជាតិទីក្រុងស្អាត)នោះលោកឃឹមប៊ុនសុង ក៏បានអាននូវសារលិខិតរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង ជាប្រធានកិត្តិយសនៃគណៈកម្មាធិការជាតិវាយតម្លៃទីក្រុង ស្អាត នាឱកាសទិវាជាតិទីក្រុងស្អាត ក្រោមធានបទ ( ជោគជ័យទីក្រុងស្អាត ជោគជ័យទេសចរណ៍) និង ពិធីប្រកាសជ័យលាភីទីក្រុងស្អាតសម្រាប់ឆ្នាំ២០១៥.២០១៨។ ក្នុងសារលិខិតនេះគឺដើម្បីជាការក្រើនរំលឹកនិងលើកទឹកចិត្តដល់ភាគីពាក់ព័ន្ធ ក្នុងការចូលរួមចលនាប្រឡងប្រណាំងទីក្រុងស្អាត សំដៅចូលរួមធ្វើឲ្យកម្ពុជាស្អាត កម្ពុជាបៃតង ពិសេស វិស័យឯកជន ដែលជាដៃគូអភិវឌ្ឍន៍ និង ការចូលរួមពីប្រជាពលរដ្ឋគ្រប់រូប ដែលជាកត្តាកំណត់ជោគជ័យ ក្នុងចលនា ប្រឡងប្រណាំងទីក្រុងស្អាតនេះ។ ក្នុងខ្លឹមសារលិខិតនោះដែរ ក៏បានធ្វើការអំពាវនាវ គ្រប់ភាគីពាក់ព័ន្ធទាំងអស់ អាជ្ញាធរ គ្រប់លំដាប់ថ្នាក់ មន្ទីរ អង្គភាព វិស័យឯកជន អង្គការសង្គមស៊ីវិល ដៃគូអភិវឌ្ឍន៍ និង ប្រជាពលរដ្ឋ មេត្តាផ្តល់ការគាំទ្រ ក្នុងការអនុវត្តឲ្យបានផុលផុស ក្នុងស្មារតីទទួលខុសត្រូវនៃចលនាប្រឡងប្រណាំងទីក្រុងស្អាត ក្នុងការទាក់ទាញភ្ញៀវ ទេសចរណ៍ជាតិ អន្តរជាតិ ហើយសក្តិសមនឹងកិត្តិនាម( កម្ពុជាព្រះរាជាណាចក្រអច្ឆរិយៈ) ។ មានប្រសាសន៍នោះដែរលោកឃឹមប៊ុនសុងក៏បានគូសបញ្ជាក់ថា ខេត្តសៀមរាបជាដួងព្រលឹងនៃ
ព្រះរាជាណាចក្រកម្ពុជាហើយបានកំពុងកែប្រែមុខមាត់ថ្មី ក្នុងការទទួលស្វាគមន៍ភ្ញៀវជាតិ អន្តរជាតិ ដែលចូលមកទស្សនាកម្សាន្ត ។ ម្យ៉ាងទៀតពីមួយឆ្នាំទៅមួយឆ្នាំ ខេត្តប្រវត្តិសាស្ត្រមួយនេះ បានទាក់ទាញដល់ភ្ញៀវទេសចរណ៍មានការកើនឡើងផងដែរ ។ ដើម្បីរក្សានូវកិត្យានុភាព នៃ ផ្ការំដួលបីទង អាជ្ញាធរ ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ទាំងព្រះសង្ឃ សិស្ស និស្សិត និងមហាជនប្រជាជនទូទាំងខេត្តត្រូវប្រកាន់ភ្ជាប់នូវប្រធានបទ(សៀមរាបផ្ទះខ្ញុំ) ដោយកន្លងមកសហភាពសហព័ន្ធយុវជនកម្ពុជាខេត្តក៏ដូចអាជ្ញាធរគ្រប់លំដាប់ថ្នាកបានអនុវត្ត ហើយទទួលបានជោគជ័យផងដែរ។ដោយកត្តាទាំងនោះហើយដែលបានធ្វើឆ្នាំ២០១៥នេះ ខេត្តសៀមរាបបានទទួលជ័យលាភី ទីក្រុងស្អាត (ផ្ការំដួលបីទង) ។ ដើម្បីរក្សាឲ្យបាននូវជោគ ជ័យនេះ យើងគ្រប់រូបត្រូវតែប្រកាន់ខ្ជាប់ (សៀបរាបផ្ទះខ្ញុំ) ដើម្បីធ្វើឲ្យទីក្រុងបុរាណដ៏ចំណាស់នេះ កាន់តែមានសោភណ្ឌ័ ភាពស្រស់ត្រកាល ប្រកបដោយពណ៌បៃតង ក្នុងការទាក់់ទាញអារម្មណ៍ភ្ញៀវទេសចរណ៍ ចូលមកទស្សនាកម្សាន ។ក្នុងនោះឯកឧត្តមក៏បានសង្កត់ធ្ងន់ទៅលើបរិស្ថាន អនាម័យក្នុងក្រុងផងដែរ ។
ក្នុងឱកាសធ្វើការដង្ហែពានរង្វាន់ជ័យលាភី ផ្ការំដួលបីទងនោះ ក៏បានធ្វើការចែកជាក្រុមៗ ក្នុងការចុះធ្វើបរិស្ថាន អនាម័យនៅតាមដងស្ទឹង និង វិថីនានាក្នុងក្រុងប្រវត្តិសាស្ត្រនេះផងដែរ ៕
